ខេត្តកំពត ៖ គ្រោះធម្មជាតិមួយបង្កឡើងដោយខ្យល់ព្យុះបានកើតឡើងនៅក្នុងភូមិបីនៃឃុំសំឡាញ ស្រុកអង្គរជ័យ កាលពីរសៀលថ្ងៃទី៤ ឧសភា ២០១២ បណ្តាលឱ្យលំនៅឋានអ្នកភូមិចំនួន៧០ខ្នង ត្រូវខូចខាតក្នុងនោះ១១ខ្នងបានរលំខូចខាតទាំងស្រុង។
ជុំវិញហេតុការណ៍នៃគ្រោះមហន្តរាយខាងលើលោកវរសេនីយ៍ត្រី ពៅ សាមិត្ត អធិការនគរបាលស្រុកអង្គរជ័យ បានឱ្យកោះសន្តិភាពដឹងថា នៅរសៀលថ្ងៃទី៤ ឧសភា ខ្យល់ព្យុះមួយបានបក់បោកយ៉ាងខ្លាំងបំផ្លាញលំនៅឋានប្រជាពលរដ្ឋក្នុងភូមិបី ក្នុងឃុំសំឡាញ អស់ចំនួន៧០ខ្នង ក្នុងនោះរងការខូចខាតទាំងស្រុងចំនួន១១ខ្នង ។ ក្នុងពេលនោះដែរក៏មានរន្ទះបាញ់លើ អនុប្រធានភូមិម្នាក់ឱ្យរងរបួសយ៉ាងធ្ងន់ធ្ងរផងដែរ ។
លោកបន្តទៀតថា ចំពោះចំនួនផ្ទះដែលត្រូវខូចខាតក្នុងភូមិទាំងបីនោះមានភូមិត្រពាំងស្លា៥០ខ្នង ក្នុងនោះរលំទាំងស្រុង១១ខ្នង ភូមិប្រស្រែ១០ខ្នង ភូមិស្មោង១០ខ្នង ។ រីឯមនុស្សដែលរន្ទះបាញ់នេះជាអនុប្រធានភូមិចំប៉ី ឈ្មោះពុធ ថុង ភេទប្រុស អាយុ៥៩ឆ្នាំ រស់នៅភូមិចំប៉ី ឃុំចំប៉ី ស្រុកអង្គរជ័យ៕
ចែករំលែកព័តមាននេះ