ខេត្តស្ទឹងត្រែង ៖ មន្ត្រីផ្នែករដ្ឋបាលព្រៃឈើស្ទឹងត្រែង រឹបអូសឈើប្រណីតប្រភេទធ្នង់ចំនួន២៣កំណាត់ ដែលក្រុមអ្នករកស៊ីឈើយកទៅលាក់ក្នុងព្រៃនៃភូមិសាស្ត្រស្រុកសេសាន ។ មន្ត្រីផ្នែករដ្ឋបាលឱ្យដឹងថា សកម្មភាពបង្ក្រាប និងរឹបអូសឈើប្រណីតទាំងនោះធ្វើឡើងកាលពីព្រឹកថ្ងៃទី២ ឧសភា ២០១២ ស្ថិតក្នុងព្រៃក្រាស់នៃភូមិស្វាយរៀង ឃុំតាឡាត ស្រុកសេសាន ។ មុនឈានដល់ការបង្ក្រាបទីតាំងស្តុកឈើនេះ គឺដោយសារមន្ត្រីជំនាញដាក់ភ្នាក់ងារស៊ើបរុករុកជាច្រើនថ្ងៃកន្លងមកហើយ ។ ក្រោយពីទទួលបានព័ត៌មានច្បាស់ការណ៍ មន្ត្រីផ្នែកបានរៀបចំកម្លាំងទៅដល់ទីតាំងលាក់ឈើតាមការចង្អុលបង្ហាញរបស់ភ្នាក់ងារ ខណៈនោះក៏ប្រទះឈើធ្នង់ចំនួន២៣កំណាត់ មានមុខកាត់ពី៤០ទៅ៥០សង្ទីម៉ែត្រប្រមាណជា៦ម៉ែត្រគូប ។
មន្ត្រីដដែលឱ្យដឹងទៀតថា ក្រោយពីវាស់វែងរួចរាល់ មន្ត្រីរដ្ឋបាលព្រៃឈើសហការជាមួយនគរបាលប៉ុស្តិ៍ដឹកជញ្ជូនឈើដែលរឹបអូសបានយកទៅរក្សាទុកនៅសង្កាត់រដ្ឋបាលព្រៃឈើក្បាលរមាស ស្រែគរ ទុកជាសម្បត្តិរដ្ឋ រីឯក្រុមឈ្មួញឈើដែលប្រព្រឹត្តបទល្មើសទុកឱ្យមន្ត្រីសង្កាត់ជាអ្នកស្រាវជ្រាវរកដើម្បីនាំខ្លួនទៅចាត់ការតាមនីតិវិធីច្បាប់ ។
ដោយឡែកលោកទិត វី នាយសង្កាត់រដ្ឋបាលព្រៃឈើក្បាលរមាសស្រែគរ ដែលកាន់កាប់នៅក្នុងតំបន់ល្មើសនោះ មិនអាចទាក់ទងសាកសួរព័ត៌មានបានទេ នៅរសៀលថ្ងៃទី៣ ឧសភា ជុំវិញវិធានការបន្តលើក្រុមអ្នករកស៊ីល្មើសច្បាប់នៃឈើដែលរឹបអូសបាន ។
ប្រភពព័ត៌មានមួយឱ្យដឹងថា ភូមិស្រែគរ ស្រែសាមី ខ្សាច់ថ្មី និងភូមិស្វាយរៀង នៃស្រុកសេសាន ជាទីតាំងកាប់ឈើប្រណីតប្រភេទធ្នង់ដែលឈ្នួញទិញទឹកចិត្តប្រជាពលរដ្ឋឱ្យកាប់ឈើលក់ឱ្យពួកគេ ។ ម៉្យាងទៀតក្រុមអ្នកប្រព្រឹត្តបទល្មើសបានប្រើរូបភាពដឹកតាមរថយន្តកែច្នៃជញ្ជូនទៅលក់ឱ្យឈ្មួញធំនៅខេត្តរតនគីរី និងបន្តដឹកតាមរថយន្តយីឌុបបង្កប់តាមឈើមានច្បាប់ត្រឡប់ទៅកាន់ខេត្តក្រចេះ ដើម្បីនាំទៅលក់នៅប្រទេសវៀតណាម ។
គេសង្ស័យថា ការដឹកជញ្ជូនយ៉ាងរលូនជារៀងរាល់ថ្ងៃប្រហែលជាក្រុមឈ្មួញរកស៊ីឈើ ត្រូវរ៉ូវជាមួយសមត្ថកិច្ចមូលដ្ឋាន ។ នៅពេលថ្នាក់លើរឹតបន្តឹងខ្លាំងក្រុមមន្ត្រីថ្នាក់ក្រោមធ្វើជាយូរៗចាប់ម្តងកុំឱ្យមានការស្តីបន្ទោស ៕
ចែករំលែកព័តមាននេះ