ខេត្តកំពង់ស្ពឺ ៖ រន្ទះពេលភ្លៀងធំ នារសៀលម៉ោង២និង៤៥នាទី ថ្ងៃទី២ ឧសភា នៅភូមិពៀមរស់ ឃុំរស្មីសាមគ្គី ស្រុកឱរ៉ាល់ ធ្វើឱ្យបុរសម្នាក់រងរបួសធ្ងន់ និងស្ត្រីម្នាក់ស្លាប់ ។
មន្ត្រីកងរាជអាវុធហត្ថស្រុកឱរ៉ាល់ឱ្យដឹងថា រន្ទះភ្លើងបានបាញ់ស្ត្រីម្នាក់នោះស្លាប់ដោយឆេះខ្លោចរោលពេញទាំងខ្លួនប្រាណ និងបុរសម្នាក់ទៀតរងរបួសធ្ងន់កំពុងទទួលការព្យាបាល ។
លោកអនុសេនីយ៍ឯកសោម ពុទ្ធតារា មេបញ្ជាការប៉េអឹមស្រុកឱរ៉ាល់ប្រាប់ថា អ្នកស្លាប់គឺស្ត្រីឈ្មោះទូច សារីម ហៅយាយហ៊ឺ អ្នកលក់ដូរគ្រឿងទេសនៅក្នុងភូមិ ។ នៅពេលកើតហេតុគាត់នៅក្នុងផ្ទះតៀមពុំហ៊ានចេញក្រៅទេព្រោះមានខ្យល់ និងភ្លៀងធំ និងបុរសឈ្មោះ ភឿង អ៊ីម អាយុ៥២ឆ្នាំ ជាមន្ត្រីសង្កាត់រដ្ឋបាលព្រៃឈើរស្មីសាមគ្គីជ្រកហូបកាហ្វេនៅទីនោះដែរ។
សពស្ត្រីទូច សារីម ត្រូវបងប្អូនអ្នកភូមិជួយធ្វើបុណ្យ ។ ចំណែកមន្ត្រីសង្កាត់រដ្ឋបាលព្រៃឈើត្រូវប្រជាពលរដ្ឋបញ្ជូនទៅសង្គ្រោះនៅមន្ទីរពេទ្យ ៕
ចែករំលែកព័តមាននេះ