ស្រុកអារញ្ញ ខេត្តស្រះកែវ (ថៃ) ៖ អាជ្ញាធរនិងសមត្ថកិច្ចខេត្ត២ជាប់ព្រំដែនគឺ ខេត្តបន្ទាយមានជ័យ របស់កម្ពុជានិងខេត្តស្រះកែវរបស់ថៃ នៅរសៀលថ្ងៃទី៤ ឧសភា បានជួបប្រជុំគ្នាជាផ្លូវការនៅសាលប្រជុំរបស់សាលាស្រុកអារញ្ញ ខេត្តស្រះកែវ ដើម្បីរកវិធីក្នុងការទប់ស្កាត់ពលករចំណាកស្រុករបស់កម្ពុជាកុំឱ្យឆ្លងដែនខុសច្បាប់តទៅទៀត។ ដោយសារមួយរយៈកន្លងមកនេះពលករខ្មែរបានសម្រុកឆ្លងដែនខុសច្បាប់ មានចំនួនកាន់តែច្រើន ហើយក៏រងនូវគ្រោះថ្នាក់ច្រើនទៀតផង។
ប្រតិភូរបស់ភាគីកម្ពុជាដឹកនាំដោយលោកទ្រី ណារិន អភិបាលរងខេត្តបន្ទាយមានជ័យ លោកសំ ជិត ស្នងការរងទទួលបន្ទុកព្រំដែន លោកម៉ែន ភិរម្យ មេបញ្ជាការរងកងរាជអាវុធហត្ថខេត្ត លោកអភិបាលក្រុងប៉ោយប៉ែត លោកមេបញ្ជាការ មេបញ្ជាការរងវរការពារព្រំដែនគោកទាំង៤ និងអាជ្ញាធរ ព្រមទាំងសមត្ថកិច្ចតាមស្រុកទាំងអស់ ដែលនៅជាប់ព្រំដែន ក្នុងនោះគេឃើញមានទាំងវត្តមានលោកនេត សារី អគ្គកុងស៊ុលខ្មែរប្រចាំប្រទេសថៃផងដែរ ។ ចំណែកភាគីថៃដឹកនាំដោយលោកគិទិនុប ប៉ាដុន អភិបាលរងខេត្តស្រះកែវ និងមេបញ្ជាការរងមកពីអង្គភាពពាក់ព័ន្ធក្នុងខេត្តជាប់ព្រំដែនកម្ពុជា-ថៃ ។
ក្នុងកិច្ចប្រជុំនោះលោកទ្រី ណារិន បានលើកឡើងជាសំណូមពរក្នុងនាមអាជ្ញាធរខេត្តបន្ទាយមានជ័យ ដល់ភាគីថៃសុំឱ្យជួយទប់ស្កាត់ពលករចំណាកស្រុកតាមបន្ទាត់ព្រំដែនខេត្តបន្ទាយមានជ័យ ដែលមានប្រវែង៥៣គីឡូម៉ែត្រ សម្រាប់ពលករទាំងឡាយណា ដែលឆ្លងដែនដោយខុសច្បាប់។ ប៉ុន្តែសម្រាប់ប្រជាពលរដ្ឋដែលឆ្លងទៅមក ទៅព្រឹកវិលល្ងាច សុំឱ្យអាជ្ញាធរឬសមត្ថកិច្ចថៃជួយទទួលខុសត្រូវទាំងទៅទាំងមកឱ្យមានភាពរលូនផង ។
ជាការឆ្លើយតប លោកគិទិនុប ប៉ាដុន ជួសមុខឱ្យអាជ្ញាធរខេត្តស្រះកែវបានលើកឡើងថា សម្រាប់អាជ្ញាធរ និងសមត្ថកិច្ចថៃតែងតែជួយទប់ស្កាត់រាល់ពលករខុសច្បាប់ជារៀងរាល់ថ្ងៃ និងសុំឱ្យភាគីកម្ពុជាជួយទប់ស្កាត់ដោយខ្លួនឯងផង ។
ជាមួយនេះលោកទ្រី ណារិន បានស្នើសុំឱ្យភាគីថៃ កុំប្រើអំពើហិង្សា ឬប្រើអាវុធ ហើយបើចាប់បានពលករខុសច្បាប់ត្រូវផ្តល់ព័ត៌មានមក ឬបញ្ជូនមក ។ សំណូមពរនេះលោកអភិបាលរងខេត្តស្រះកែវ បានឆ្លើយតបថា អាជ្ញាធរនិងសមត្ថកិច្ចថៃក្នុងខេត្តស្រះកែវពុំដែលប្រើអំពើហិង្សាទៅលើពលករខ្មែរក្រោយការចាប់បាននោះ
ទេ ។
លោកអភិបាលរងរូបនេះបន្តថា ចំពោះចំណាត់ការទប់ស្កាត់ ខាងភាគីថៃទទួលយក ប៉ុន្តែសុំឱ្យភាគីកម្ពុជាគួរតែមានវិធានការទៅលើពលករខុសច្បាប់ទាំងឡាយណា ដែលចាប់បញ្ជូនច្រើនដងទៅហើយ នៅតែឃើញលួចចូលទៅវិញមានមុខដដែល ព្រោះពលករខុសច្បាប់ដែលចាប់បានភាគច្រើនជាមនុស្សដដែលៗ ។ លោកគិទិ នុប៉ាដុន បន្តថា កត្តាដែលធ្វើឱ្យពលករខ្មែរចេះតែមកធ្វើការនៅស្រុកថៃកាន់តែច្រើន ដោយសារទី១តម្លៃការងារបានថ្លៃ មួយថ្ងៃ៣០០បាត។ ទី២ដោយសារការធ្វើការនៅស្រុកថៃបានថ្លៃជាងនៅស្រុកខ្មែរ។
ប្រតិភូខេត្តបន្ទាយមានជ័យដែលចេញទៅប្រជុំជាមួយភាគីថៃត្រូវបានមន្ត្រីខេត្តប្រាប់ឱ្យដឹងថា គឺអនុវត្តតាម ស.ជ.ណ របស់ក្រសួងមហាផ្ទៃចុះថ្ងៃទី៣០ មេសា ឱ្យអាជ្ញាធរខេត្តជួបប្រជុំពិភាក្សា និងសហការឱ្យបានជិតស្និទ្ធជាមួយខេត្តជាប់ព្រំដែននៃប្រទេសថៃ ដើម្បីជួយមានវិធានការឱ្យបានម៉ឺនមា៉ត់ ទប់ស្កាត់កុំឱ្យប្រជាពលរដ្ឋខ្មែរឆ្លងដែនទៅប្រទេសថៃដោយខុសច្បាប់បន្តទៀត ។ យោងតាម ស.ជ.ណ របស់ក្រសួងមហាផ្ទៃនេះ មិនមែនសម្រាប់តែខេត្តបន្ទាយមានជ័យមួយនោះទេ គឺសម្រាប់ខេត្តជាប់ព្រំដែនទាំងអស់ ដូចជាខេត្តបាត់ដំបង ប៉ៃលិន ព្រះវិហារ និងឧត្តរមានជ័យ ជាដើម ៕
ចែករំលែកព័តមាននេះ