ថៃហ្គ័រ វូដ និងភរិយាប្រកាសលែងលះជាផ្លូវការ
ដោយ ៖ ប្រុសកោះ
ថ្ងៃអង្គារ ទី២៤ ខែសីហា ឆ្នាំ២០១០ ម៉ោង ១៥:២០
គេហទំព័របរទេស
ហ្គ័រ វូដ និងភរិយាសញ្ជាតិស៊ុយអែត នាងអេលីន ន័រឌីហ្រេ្គន
បន្ទាប់ពីការជ្រួលច្របល់ក្នុងរឿងសហាយស្មន់អស់រយៈពេល៩ខែរួចមក កីឡាករថៃហ្គ័រ វូដក្នុងពេលឥឡូវនេះបានបើកទំព័រថ្មីនៃជីវិតរបស់ខ្លួនហើយ។ នៅក្នុងសវនាការដែលមាន រយៈពេលមិនដល់១០នាទីនៅក្នុងតុលាការ រដ្ឋ ផ្លរីដា ថៃហ្គ័រ វូដ និងភរិយាសញ្ជាតិស៊ុយអែត នាងអេលីន ន័រឌីហ្រេ្គនបានប្រកាសលែងលះគ្នា ជាផ្លូវការនៅថ្ងៃចន្ទសប្តាហ៍នេះ។ និយាយនៅក្នុងសេចក្តីថ្លែងការណ៍រួមមួយដែលបញ្ចេញឲ្យដឹងតាមរយៈមេធាវីរបស់ពួកគេ វូដនិងនាងអេលីនបានបញ្ជាក់ថា៖ «ពួកយើងពិតជាមានការសោកស្តាយដែលចំណងអាពាហ៍ពិពាហ៍របស់យើងត្រូវបានបញ្ចប់ ហើយយើងសូមជូនពរឲ្យគ្នាបានសេចក្តីសុខសប្បាយទៅថ្ងៃអនាគត»។ ការលែងលះគ្នាត្រូវបានធ្វើឡើង ភ្លាមៗនៅក្នុងតុលាការ Bay County Circuit Court ដែលស្ថិតនៅក្នុងទីក្រុងប៉ាណាម៉ាស៊ីធី រដ្ឋ ផ្លរីដាចំងាយប្រមាណ៣៧៥ម៉ៃល៍ពីទីកន្លែង ដែលថៃហ្គ័រ វូដបើករថយន្តស៊ីយូវីរបស់ខ្លួនបុក គល់ឈើនៅរាត្រីថ្ងៃបុណ្យស៊ែងហ្គីវវីង។ នោះជាចំណុចផ្តើមនៃការបែកធ្លាយរឿងអាស្រូវសហាយស្មន់របស់តារាវាយកូនគោលលំដាប់ទី១ពិភពលោករូបនេះ។ ចាប់ពីពេលនោះមក ជីវិតនិងការប្រកួតរបស់ថៃហ្គ័រ វូដ ចាប់ផ្តើមមានភាពច្របូកច្របល់។ ថៃហ្គ័រ វូដ បានរៀបការជាមួយនាងអេលីននៅថ្ងៃទី៥ ខែតុលា ឆ្នាំ២០០៥នៅប្រទេសបាបេដូស និងមានកូន២នាក់(ស្រីអាយុ៣ឆ្នាំ និងប្រុសអាយុ១៨ខែ)។ បែបបទនៃការលែងលះដូចជាថៃហ្គ័រ វូដត្រូវចំណាយប្រាក់ ប៉ុន្មាននោះមិនត្រូវបានគេយកមកបង្ហាញទេ។ មានតែព័ត៌មានមួយដែលនិយាយត្រឹមថា ពួកគេនៅតែមើលថែកូនទាំងពីររួមគ្នា។
លោកថូម៉ាស់ ជេសាសូ មេធាវីរបស់ថៃហ្គ័រ វូដបាននិយាយថា រូបលោកពុំអាចបកស្រាយអំពីបញ្ហានេះបានទេ។ ដោយត្រូវបានសួរថា តើហេតុអ្វីបានជាត្រូវជ្រើសរើសការដាក់ពាក្យប្តឹងនៅក្រុងប៉ាណាម៉ាស៊ីធី? លោកឆ្លើយថានេះជាការសម្រេចចិត្តរួមគ្នារវាងមេធាវីទាំងសងខាង។
លោកម៉ាក ស្ទេនបឺក ភ្នាក់ងារតំណាងថៃហ្គ័រ វូដបានបដិសេធមិនធ្វើអត្ថាធិប្បាយជុំវិញរឿងក្តីលែងលះនេះ។ឯម្តាយរបស់នាងអេលីន អ្នកស្រីបាបូ ហូមបឺក ក៏មិនបានថ្លែងពីអ្វីដែរ។
សម្រាប់ថៃហ្គ័រ វូដ បន្ទាប់ពីបានលេចធ្លាយរឿងអាស្រូវផិតក្បត់រួចមក រូបគេបានខាតបង់អស់ប្រាក់ជាច្រើនលានដុល្លារជាពិសេសរឿងនេះបានធ្វើឲ្យអាប់មុខមាត់ក្នុងនាមជាកីឡាករកំពូលលើលោក។រយៈពេល១ខែបន្ទាប់ពីរឿងអាស្រូវរបស់គេបានលេចឮជាសាធារណៈ វូដបានចំណាយពេលពីរខែដើម្បីព្យាបាលជំងឺញៀនសិចរបស់ខ្លួននៅឯគ្លីនិកមីស៊ីស៊ីពីដែលការព្យាបាលនោះ វូដសង្ឃឹមថា នឹងអាចជួយសង្គ្រោះចំណងអាពាហ៍ពិពាហ៍របស់ខ្លួនបាន។ នៅក្នុងសេចក្តីថ្លែងការណ៍រួមបន្ទាប់ពីការលែងលះ ថៃហ្គ័រ វូដនិងនាងអេលីនបាននិយាយថា៖«ទោះបីពួកយើងមិនស្ថិតនៅជាប្តីប្រពន្ធជាមួយគ្នា តែពួកយើងនៅតែជាឪពុកនិងម្តាយរបស់កូនៗទាំងពីរ ហើយសុភមង្គលរបស់ពួកគេគឺជាបញ្ញាយ៉ាងសំខាន់មួយសម្រាប់ពួកយើងទាំងពីរ នាក់» ៕
