ខេត្តកណ្តាល ៖ អំណោយសប្បុរសធម៌ជា មីចំនួន៥០កេស ត្រូវបានព្រះគ្រូ នាគមុនីសត្ថាសុខុមោ នី សុវណ្ណមុនីរ៉េត ទីប្រឹក្សាផ្ទាល់សម្តេចព្រះមហាសុមេធាធិបតី នន្ទ ង៉ែត សម្តេចសង្ឃនាយកនៃព្រះរាជាណាចក្រកម្ពុជាបានប្រគល់ជូនសាខាកាកបាទក្រហមកម្ពុជាខេត្តកណ្តាល ដើម្បីសាខាយកទៅចែកជូនប្រជាពលរដ្ឋរងគ្រោះ ដោយគ្រោះមហន្តរាយខ្យល់ព្យុះសរុប៥៨គ្រួសារ នៅស្រុកចំនួន៣ ក្នុងនោះមាន ស្រុកពញាឮ មុខកំពូល និងស្រុកខ្សាច់កណ្តាល កាលពីរសៀលថ្ងៃទី២៩ ខែមេសា ឆ្នាំ២០១២ នៅកុដិលេខ២៤ វត្តនាគវ័ន រាជធានីភំ្នពេញ ។
ពិធីនេះបានប្រព្រឹត្តទៅក្រោមអធិបតីភាពលោកស្រី គង់ សារីយ៉ា នាយិកាសាខា ព្រមទាំងមានការនិមន្ត និងអញ្ជើញចូលរួមជាកិតិ្តយសព្រះសិរីមុនី ទេព កុសល គង់នៅកុដិលេខ១៧ វត្តនាគវ័ន មន្រ្តីក្រុមប្រតិបតិ្តសាខា និងពុទ្ធបរិស័ទចំណុះ ជើងវត្តមួយចំនួន ។ព្រះគ្រូនាគមុនីសត្ថាសុខុមោ នី សុវណ្ណមុនីរ៉េត មានសង្ឃដីកាសម្តែងនូវទឹកព្រះទ័យជ្រះថ្លា និងចូលរួម បានគាំទ្ររាល់សកម្មភាពរបស់កាកបាទក្រហមកម្ពុជា ក្រោមការដឹកនាំដ៏គតិបណិ្ឌតរបស់លោកជំទាវកិតិ្តព្រឹទ្ធបណិ្ឌត ប៊ុន រ៉ានី ហ៊ុន សែន ជាប្រធាន ។ ព្រះអង្គបន្តទៀតថាអំណោយដែលព្រះអង្គបានប្រគល់ជូនសាខាខេត្តនៅក្នុងឱកាសនេះគឺបានមកពីការបិណ្ឌបាត្ររបស់ព្រះ អង្គចំពោះសប្បុរសជនមួយចំនួននៅក្នុងប្រទេស និងក្រៅប្រទេសផងដែរ ។
លោកស្រី គង់ សារីយ៉ា ជំនួសមុខឲ្យថ្នាក់ដឹកនាំគណៈកម្មាធិការសាខា មានមតិសំណេះសំណាលដោយនាំមកនូវការផ្តាំផ្ញើសាកសួរសុខទុក្ខពីលោកជំទាវកិតិ្តព្រឹទ្ធបណិ្ឌត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ប្រគេន និងជូនចំពោះព្រះសង្ឃ ព្រមទាំងពុទ្ធបរិស័ទចំណុះជើងវត្តទាំងអស់ ដែលមានវត្តមាននៅទីនេះដោយកី្តនឹករឭក ។ ក្នុងនាមគណៈកម្មាធិការសាខាលោកស្រីបានថ្លែងអំណរព្រះគុណ ចំពោះទឹកព្រះទ័យដ៏សប្បុរសធម៌របស់ព្រះអង្គ ដែលកន្លងមកក៏ដូចជាបច្ចុប្បន្ន ព្រះអង្គគឺជាដៃគូ ដ៏សំខាន់មិនអាចកាត់ថ្លៃបាន ដោយបានបរិច្ចាគនូវអំណោយដ៏សប្បុរសថ្លៃថ្លាជាបន្តបន្ទាប់មកដល់សាខាកាកបាទក្រហមកម្ពុជាខេត្ត ហើយជំនួយដែលព្រះអង្គបានផ្តល់ជូនសាខានៅពេល នេះ គឺចំពេលដែលសាខាកំពុងត្រូវការជាចាំបាច់ ដើម្បីនាំយកម្ភារទាំងនេះទៅជួយសង្គ្រោះដល់ ប្រជាពលរដ្ឋរងគ្រោះដោយខ្យល់ព្យុះចំនួន៥៨ គ្រួសារនៅស្រុកចំនួន៣ ក្នុងនោះស្រុកពញាឮ ២៥គ្រួសារ, មុខកំពូល១៧គ្រួសារ និងស្រុកខ្សាច់កណ្តាលចំនួន១៦គ្រួសារ ។
សកម្មភាពនេះជាការបង្ហាញឲ្យឃើញអំពីចំណងផ្សារភ្ជាប់ មិនអាចកាត់ថ្លៃបានរវាងព្រះពុទ្ធសាសនាជាមួយនឹងសង្គម ហើយក៏ជាសិល្បៈនៃការចែករំលែក ដ៏ល្អក្នុងការជួយគ្នាទៅវិញទៅមករបស់ខ្មែរ យើង ។ លោកស្រីក៏បានសន្យាថា នឹងនាំយកអំណោយទាំងនេះទៅជួយដល់ដៃប្រជាពលរដ្ឋ ដែលកំពុងរងគ្រោះឲ្យស្របតាមគោលការណ៍ គ្រឹះទាំង៧របស់ចលនាកាកបាទក្រហម អឌ្ឍចន្ទ ក្រហម ៕
ចែករំលែកព័តមាននេះ