ប្រធានាធិបតីអាមេរិកលោកបារ៉ាក់ អូបាម៉ា ថ្លែងកាលពីថ្ងៃទី៣០មេសាថាសម្ព័ន្ធភាពរវាងសហរដ្ឋអាមេរិកនិងជប៉ុននឹងនៅតែជាសរសរនៃសន្តិភាពនិងសន្តិសុខក្នុងតំបន់អាស៊ី-ប៉ាស៊ីហ្វិក ។
លោកអូបាម៉ា ថ្លែងបែបនេះក្នុងសន្និសីទសារព័ត៌មានមួយជាមួយនាយករដ្ឋមន្ត្រីជប៉ុនលោកយូស៊ីហ៊ីកូណូដាដោយក្នុងឱកាសនោះលោកប្រកាសថាប្រទេសទាំង២បានព្រមព្រៀងគ្នាលើទស្សនៈរួមថ្មី ចំពោះសម្ព័ន្ធភាពនាពេលអនាគត។
លោកអូបាម៉ា មានប្រសាសន៍ថា យើងជឿជាក់ថា សម្ព័ន្ធភាពរវាងសហរដ្ឋអាមេរិកនិងជប៉ុននឹងនៅពុំត្រឹមតែជាគ្រឹះនៃសន្តិសុខនិងភាពរុងរឿងរបស់ប្រទេសយើងទាំង២ប៉ុណ្ណោះទេ តែក៏ជាសរសរនៃសន្តិភាពនិងសន្តិសុខក្នុងតំបន់ផងដែរ ។ លោកបានរំលឹកពីកិច្ចព្រមព្រៀងដែលចុះហត្ថលេខាកាលពីសបប្តាហ៍មុនរវាងរដ្ឋាភិបាលទាំង២ហើយដែលការអនុវត្តកិច្ចព្រមព្រៀងនោះទាហានម៉ារីនអាមេរិក៩.០០០នាក់ត្រូវដកចេញពីកោះអូគីណាវ៉ា ទៅកាន់កោះហ្គាម ឬទីតាំងដទៃៗទៀតនៅអាស៊ីនិងប៉ាស៊ីហ្វិក ប្រការនេះឆ្លុះបញ្ចាំងពីការខិតខំប្រឹងប្រែងទាំងឡាយរបស់យើងដើម្បីធ្វើទំនើបកម្មជំហរការពាររបស់អាមេរិកនៅអាស៊ី-ប៉ាស៊ីហ្វិក ។ លោកបន្តថា ប្រការនេះក៏នឹងកាត់បន្ថយផងដែរ នូវផលប៉ះពាល់លើប្រជាជននៅកោះអូគីណាវ៉ា៕
ចែករំលែកព័តមាននេះ