ខេត្តឧត្តរមានជ័យ ៖ អគារការិយាល័យថ្មីរបស់ធនាគារអេស៊ីលីដា ភីអិលស៊ី សាខាខេត្តឧត្តរមានជ័យ ដែលទើបនឹងកសាងហើយនោះត្រូវបានរៀបចំពិធីសម្ពោធបើកឱ្យដំណើរការជាផ្លូវការ កាលពីថ្ងៃទី២៧ មេសា កន្លងមកនេះ ក្រោមអធិបតីភាព លោកលួន អាន អភិបាលរងខេត្ត និងលោកអ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី ។
លោកសូយ ដារិទ្ធ នាយកធនាគារអេស៊ីលីដា ភីអិលស៊ី សាខាខេត្តឧត្តរមានជ័យ បានថ្លែងថា ធនាគារអេស៊ីលីដា ភីអិលស៊ី សាខាខេត្តឧត្តរមានជ័យ បានបង្កើតឡើងនៅថ្ងៃទី១ ខែមេសា ឆ្នាំ២០០៤ ក្នុងលក្ខណៈជាការិយាល័យស្រុក តែដោយសារឧត្តមភាពទីផ្សារល្អ ក៏បានកម្លាយខ្លួនទៅជាសាខាពេញលេញ នៅថ្ងៃទី១ ខែមករា ឆ្នាំ២០០៧ ។ បច្ចុប្បន្ននេះ ធនាគារអេស៊ីលីដា ភីអិលស៊ី សាខាខេត្តឧត្តរមានជ័យ មានបណ្តាញប្រតិបត្តិការចំនួន៥ គឺ១- ការិយាល័យសាខាខេត្តឧត្តរមានជ័យ ២- ការិយាល័យស្រុកអន្លង់វែង ៣- ការិយាល័យប៉ុស្តិ៍សេវាកម្មឃុំគោកមន ស្រុកបន្ទាយអំពិល ៤- ការិយាល័យប៉ុស្តិ៍សេវាកម្មសង្កាត់អូរស្មាច់ ក្រុងសំរោង និង៥- ការិយាល័យប៉ុស្តិ៍សេវាកម្មស្រុកត្រពាំងប្រាសាទ ។ ដោយគិតត្រឹមថ្ងៃទី៣១ ខែមីនា ឆ្នាំ២០១២ ធនាគារអេស៊ីលីដា ភីអិលស៊ី សាខាខេត្តឧត្តរមានជ័យ មាន ៖
– បុគ្គលិកចំនួន៩៩នាក់ កំពុងបម្រើការងារដែលក្នុងនោះមាននារី២២នាក់ ស្មើនឹង២២ ភាគរយ
– ទ្រព្យសកម្មសរុបរបស់ធនាគារមានចំនួន១១,៧លានដុល្លារសហរដ្ឋអាមេរិក
– សមតុល្យឥណទានមានចំនួន៩,២លានដុល្លារសហរដ្ឋអាមេរិក ដែលមានអតិថិជន៤.៤៣៧នាក់
– សមតុល្យប្រាក់បញ្ញើសន្សំមានចំនួន៧,៥លានដុល្លារសហរដ្ឋអាមេរិក ដែលមានអតិថិជនចំនួន១១.០៨៧នាក់ បាននិងកំពុងដាក់ប្រាក់បញ្ញើសន្សំជាមួយធនាគារ និងអតិថិជនជាច្រើនទៀតបាននិងកំពុងប្រើប្រាស់សេវាកម្មផ្សេងៗទៀតរួមទាំងសេវា អេស៊ីលីដាយូនីធី ផងដែរ ។
– យើងមានម៉ាស៊ីនដកប្រាក់ស្វ័យប្រវត្តិ អេធីអឹម ចំនួន២គ្រឿង ១គ្រឿងនៅសាខាខេត្តឧត្តរមានជ័យ និង១គ្រឿងទៀតនៅការិយា ល័យស្រុកអន្លង់វែង សម្រាប់បម្រើសេវាដកប្រាក់ជូនដល់អតិថិជន២៤ម៉ោងក្នុង១ថ្ងៃ ៧ថ្ងៃក្នុង១សប្តាហ៍ តាមរយៈប័ណ្ណអេស៊ីលីដា ប័ណ្ណវីសា អេស៊ីលីដា និងប័ណ្ណវីសាធនាគារផ្សេង ទៀតនៅទូទាំងពិភពលោក ។
លោកបានថ្លែងបន្តថា ពេលនេះ ធនាគារអេស៊ីលីដា ភីអិលស៊ី សាខាខេត្តឧត្តរមានជ័យ បានប្តូរទីតាំងមកអគារការិយាល័យថ្មីដែលបានសាងសង់ឡើងតាមស្តង់ដាធនាគារពាណិជ្ជ ។ អគារនេះមានកម្ពស់៣ជាន់ និងមានផ្ទៃក្រឡាសម្រាប់បំពេញការងារទំហំ១.៦៤៨ម៉ែត្រការ៉េ ដែលក្នុងនោះមានសាលដ៏ធំមួយសម្រាប់ទទួលអតិថិជនទូទៅទំហំជាង១៧៤ម៉ែត្រការ៉េ។ អគារនេះអាចផ្ទុក
បុគ្គលិកបម្រើការងារបានរហូតដល់ជាង១២០នាក់ និងមានចំណតរថយន្តធំទូលាយសម្រាប់អតិថិជន និងបុគ្គលិក ។ អគារនេះ គឺសាងសង់តាមបទដ្ឋានរបស់ធនាគារអេស៊ីលីដា ដោយយកចិត្តទុកដាក់ខ្លាំងលើការរក្សាសន្តិសុខ ការការពារអគ្គិភ័យ ការបម្រុងថាមពល ផាសុកភាព និងសុវត្ថិភាពការងារ ។
លោកអ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានថ្លែងថា ធនាគារអេស៊ីលីដា បានបង្កើតឱ្យមានអារ្យភាពទាន់សម័យជានិរន្តរ៍សម្រាប់សេវាកម្មហិរញ្ញវត្ថុបែបនេះ អស់រយៈពេល២០ឆ្នាំមកហើយ ដើម្បីបម្រើសេវាកម្មហិរញ្ញវត្ថុជូនដល់អតិថិជន ទាំងវិស័យឯកជន និងវិស័យសាធារណៈ តាមរយៈសាខា និងការិយាល័យទាំង២៥៩ទូទាំងព្រះរាជាណាចក្រកម្ពុជា និងប្រទេសឡាវ ។ បច្ចុប្បន្នធនាគារអេស៊ីលីដា មានអគារការិយាល័យស្តង់ដាបែបនេះចំនួន១០២កន្លែង និងកំពុងសាងសង់បន្ថែមជាបន្តបន្ទាប់ ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់អតិថិជន ក្នុងការទាក់ទងសម្រាប់ប្រើប្រាស់សេវាហិរញ្ញវត្ថុ របស់ធនាគារអេស៊ីលីដា ជាពិសេសដើម្បីការពារសុវត្ថិភាពទ្រព្យសម្បត្តិរបស់អតិថិជនដែលបាននិងកំពុងប្រើប្រាស់សេវាធនាគារអេស៊ីលីដា ព្រមទាំងផ្តល់នូវផាសុកភាព និងសុវត្ថិភាពការងារដល់បុគ្គលិក ដែលបាននិងកំពុងបម្រើការងារជាមួយធនាគារអេស៊ីលីដា ។
លោកបន្តថា លើសពីនេះទៅទៀត ធនាគារអេស៊ីលីដា បានបង្កើតក្រុមហ៊ុនបុត្រសម្ព័ន្ធមួយចំនួនដូចជា អេស៊ីលីដា ស៊ីឃ្យូរីធី ភីអិលស៊ី និងភ្នាក់ងារចំនួន៤ទៀតដូចជា ភ្នាក់ងារបញ្ជិកាមូលបត្រ, ភ្នាក់ងារទូទាត់, ភ្នាក់ងារចុះបញ្ជីផ្ទេរមូលបត្រ និងភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ ដើម្បីធ្វើជាកម្លាំងចលករសម្រាប់ទ្រទ្រង់ការអភិវឌ្ឍវិស័យមូលបត្រ និងជំរុញឱ្យមានកំណើនសេដ្ឋកិច្ច ។ ទន្ទឹមនឹងនេះដែរ ធនាគារអេស៊ីលីដា ក៏បានបង្កើតឱ្យមានអេស៊ីលីដា ត្រេននីង សេនធ័រ ដើម្បីអភិវឌ្ឍធនធានមនុស្ស និងចូលរួមចែករំលែកបទពិសោធន៍ និងភាពជោគជ័យលើវិស័យមីក្រូហិរញ្ញវត្ថុដល់ប្រតិបត្តិករ និងស្ថាប័នមីក្រូហិរញ្ញវត្ថុ ទាំងក្នុងតំបន់និងក្រៅតំបន់ ។ ជាមួយគ្នានេះ ធនាគារអេស៊ីលីដា បានបង្កើតធនាគារបុត្រសម្ព័ន្ធនៅក្រៅប្រទេសគឺ ធនាគារអេស៊ីលីដា ឡាវ លីមីតធីត ហើយបន្តពង្រីកវិសាលភាពប្រតិបត្តិការទៅប្រទេសក្នុងតំបន់អាស៊ាន និងបណ្តាប្រទេសនៅតាមដងទន្លេមេគង្គដទៃទៀត បន្ទាប់ពីទទួលបានជោគជ័យនៅក្នុងប្រទេសឡាវ និងភូមា ។
លោកលួន អាន អភិបាលរងខេត្តឧត្តរមានជ័យបានថ្លែងថា អគារការិយាល័យថ្មីធនាគារអេស៊ីលីដា ភីអិលស៊ី សាខាខេត្តឧត្តរមានជ័យ ត្រូវបានរៀបចំឡើងស្របពេលដែលសេដ្ឋកិច្ចនៃព្រះរាជាណាចក្រកម្ពុជា ជាពិសេសខេត្តឧត្តរមានជ័យ កំពុងមានការរីកចម្រើន មានស្ថិរភាព និងមានកំណើនលើសពីការរំពឹងទុក ក្នុងរយៈពេលប៉ុន្មានឆ្នាំចុងក្រោយនេះ ។ ការវិវឌ្ឍរបស់ធនាគារអេស៊ីលីដា សាខាខេត្តឧត្តរមានជ័យ ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងថែមទាំងបានបង្ហាញពីការចូលរួមចំណែកក្នុងការអភិវឌ្ឍសេដ្ឋកិច្ចក្នុងព្រះរាជាណាចក្រកម្ពុជា ជាពិសេសនៅក្នុងខេត្តឧត្តរមានជ័យ ។ ធនាគារអេស៊ីលីដា ភីអិលស៊ី សាខាខេត្តឧត្តរមានជ័យ បានចាប់ផ្តើមប្រិតបត្តិការរបស់ខ្លួនតាំងពីឆ្នាំ២០០៤ ក្រោមរូបភាពជាការិយាល័យស្រុក ដែលធ្វើប្រតិបត្តិការពុំទាន់មានលក្ខណៈទូលំទូលាយនៅឡើងយ និងជាបន្តនៅដើមឆ្នាំ២០០៧ ធនាគារអេស៊ីលីដា ភីអិលស៊ី សាខាខេត្តឧត្តរមានជ័យ កម្លាយខ្លួនជាការិយាល័យសាខា ហើយធ្វើប្រតិបត្តិការពេញលេញ និងទូលំទូលាយលើសេវាហិរញ្ញវត្ថុទូទាំងស្រុកចំនួន៣របស់ខេត្តឧត្តរមានជ័យ ។ ក្រៅពីសេវាកម្មលើវិស័យធនាគារ ក្នុងរយៈពេលកន្លងមកនេះ ធនាគារអេស៊ីលីដា ភីអិលស៊ី សាខាខេត្តឧត្តរមានជ័យ បានខិតខំចូលរួមចំណែកក្នុងសកម្មភាពសង្គម និងលើកកម្ពស់វិស័យសិល្បៈ និងកីឡាផងដែរ ។
លោកលួន អាន បញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ស្ថានភាពអភិវឌ្ឍខេត្តឧត្តរមានជ័យ មានភាពល្អប្រសើរួមទាំងសកម្មភាពវិនិយោគ ហេដ្ឋារចនាសម្ព័ន្ធ កម្រិតជីវភាពរបស់ប្រជាពលរដ្ឋ និងស្ថិរភាពសង្គម ៕
ចែករំលែកព័តមាននេះ