កងឆ្មាំឆ្នេរសមុទ្រកូរ៉េខាងត្បូងរាយការណ៍ថា មន្ត្រីកូរ៉េខាងត្បូង៤នាក់បានត្រូវរបួសនាព្រឹកថ្ងៃទី៣០មេសាក្រោយពីពួកគេឡើងទៅលើនាវាចិនមួយគ្រឿងចំណុះ២២៧តោន សង្ស័យចូលនេសាទដោយខុសច្បាប់ក្នុងដែនទឹកកូរ៉េខាងត្បូង។
ឧប្បត្តិហេតុនេះកើតឡើងនាវេលាម៉ោង២និង៣០នាទីរំលងអធ្រាត្រក្នុងដែនទឹកចម្ងាយ៧២គ.ម ភាគពាយ័ព្យ កោះ HEUKSAN តំបន់ស៊ីណាន ខេត្ត JEOLLA ខាងត្បូង ។ មន្ត្រីម្នាក់ដែលឡើងទៅលើនាវាចិននោះដែរបានធ្លាក់ទៅក្នុងទឹកសមុទ្រក្រោយពីគេវាយតែត្រូវបានជួយសង្គ្រោះដោយនាវាមួយរបស់កងឆ្មាំឆ្នេរសមុទ្រ ។ មន្ត្រី៣នាក់ទៀតរងរបួសក្រោយការវាយប្រហាររបស់ពួកអ្នកនេសាទចិនដែលប្រើកាំបិត ។
សម្រាប់ពេលនេះស្ថានភាពរបួសរបស់ពួកគេនៅពុំទាន់ដឹងពិតប្រាកដនៅឡើយ ។ ពួកគេត្រូវដឹកតាមឧទ្ធម្ភាគចក្រមកកាន់មន្ទីរពេទ្យមួយស្ថិតនៅទីក្រុងជាប់សមុទ្រ MOKPO ចម្ងាយ410គ.មខាងត្បូងក្រុងសេអ៊ូល ហើយកំពុងទទួលការព្យាបាល ។ កងឆ្មាំឆ្នេរសមុទ្រកូរ៉េខាងត្បូងបានចាប់នាវាចិននោះហើយចាប់ខ្លួនសមាជិកក្រុមនាវិក៩នាក់ ៕
ចែករំលែកព័តមាននេះ