សាក្សី និងប្រភពព័ត៌មានសន្តិសុខរាយការណ៍ថា ពួកជនប្រដាប់អាវុធបានវាយប្រហារកាលពីព្រឹកថ្ងៃទី២៩ មេសា លើកន្លែងប្រជុំមួយរបស់សហគមន៍គ្រឹស្តនៅក្រុងកាណូ ភាគខាងជើងនីហ្សេរីយ៉ាបណ្តាលឱ្យមនុស្សស្លាប់យ៉ាងតិច១៥នាក់ ហើយជាច្រើននាក់ទៀតត្រូវរបួស។
សាក្សីនិយាយថា បានឃើញគេទាញសាកសពមនុស្សប្រមាណជា១៥នាក់ចេញពីអគារ ។ ការផ្ទុះនានា និងការបាញ់ប្រហារបានកើតមានក្នុងសាលប្រជុំធំនៃសាកលវិទ្យាល័យដែលប្រើប្រាស់ដោយពួកគ្រឹស្តសម្រាប់ជាកន្លែងជួបជុំគ្នា។ ពួកអ្នកវាយប្រហារប្រដាប់ដោយកាំភ្លើង និងគ្រឿងផ្ទុះបានលុកចូលខាងក្នុង ហើយវាយប្រហារលើពួកគ្រឹស្ត ។ កងទ័ពនិយាយថា បានវាយរុញច្រានការវាយលុកនេះ ហើយឡោមព័ទ្ធតំបន់នោះ ។ ការវាយប្រហារមានរយៈពេល៣០នាទី ។
ក្នុងសេចក្តីប្រកាសមួយលោក FEDERICO LOMBARDI អ្នកនាំពាក្យរបស់បុរីវ៉ាទីកង់និយាយថា ការវាយប្រហារភេរវកម្មថ្មីៗនៅនីហ្សេរីយ៉ាក្នុងឱកាសនៃពិធីទាំងឡាយរបស់ពួកគ្រឹស្តគឺជាអំពើដ៏សែនទារុណនិងគួរឱ្យស្អប់ខ្ពើមដែលត្រូវថ្កោលទោសយ៉ាងមឺុងម៉ាត់បំផុត ។ពួកសកម្មប្រយុទ្ធនៃក្រុមអ៊ិស្លាមបូកូ ហារ៉ាម ដែលចង់បង្កើតច្បាប់អ៊ិស្លាមនៅភាគខាងជើងនីហ្សេរីយ៉ាបានសម្លាប់មនុស្សជាច្រើនរយនាក់តាំងពីដើមឆ្នាំនេះមក ៕
ចែករំលែកព័តមាននេះ