អ្នកនាំពាក្យម្នាក់របស់អ.ស.បនៅក្រុងរ៉ង់ហ្គូនគូសបញ្ជាក់ថា អគ្គលេខាធិការអ.ស.បលោកបានគីមូន បានអញ្ជើញមកដល់ប្រទេសភូមាកាលពីថ្ងៃទី២៩ មេសា ដើម្បីបំពេញទស្សនកិច្ច៣ថ្ងៃមួយនៅទីនោះដែលក្នុងអំឡុងពេលនៃទស្សនកិច្ចនេះលោកត្រូវជួបជាមួយមេដឹកនាំប្រឆាំងលោកស្រីអ៊ួងសាន់ស៊ូជី និងលោកប្រធានាធិបតីថេនសេន ។
កាលពីប៉ុន្មានថ្ងៃមុននេះលោកបានគីមូន វាយតម្លៃថា ប្រទេសភូមា ស្ថិតក្នុងពេលវេលាសំខាន់មួយនៃការឆ្លងកាត់ ។ ពេលស្នាក់អាស្រ័យនៅភូមាលោកត្រូវជួបជាលើកដំបូងនាថ្ងៃទី១ ឧសភាជាមួយលោកស្រីស៊ូជីនៅក្រុងរ៉ង់ហ្គូន ។ លោកត្រូវថ្លែងសុន្ទរកថាមួយនាថ្ងៃទី៣០ មេសា នៅក្រុងណៃពិដោ នៅមុខសភាភូមា ក៏ប៉ុន្តែដោយអវត្តមានរបស់លោកស្រីស៊ូជីនិងបណ្តាសមាជិកសភានៃគណបក្សលោកស្រីដែលបដិសេធពុំចូលរួមធ្វើសច្ចាប្រណិធានសន្យាថែរក្សារដ្ឋធម្មនុញ្ញហើយទាមទារមិនបានសម្រេចឱ្យគេប្តូរពាក្យសម្បថមកត្រឹមពាក្យថាគោរពរដ្ឋធម្មនុញ្ញវិញ ៕
ចែករំលែកព័តមាននេះ