រាជធានីភ្នំពេញ ៖ នាព្រឹកថ្ងៃទី២៧ ខែមេសា ឆ្នាំ២០១២ នៅកុដិលេខ២៤ វត្ដនាគវន័ រាជធានីភ្នំពេញ ព្រះគ្រូនាគ មុនីសត្ថាសុខុមោ នី សុវណ្ណមុនីរ៉េត ទីប្រឹក្សាផ្ទាល់សម្ដេចព្រះមហាសុមេធាធិបតី នន្ទ ង៉ែត សម្ដេចសង្ឃនាយកនៃព្រះរាជាណាចក្រកម្ពុជាបានប្រគល់នូវទេយ្យទានជាមីចំនួន៥០កេសជូនដល់ ក.ក្រ.ក សាខា រាជធានីភ្នំពេញដែលអញ្ជើញទៅទទួលដោយលោក គ្រួច សាមឿន នាយកប្រតិបត្ដិសាខា និងសហការី ។
ព្រះគ្រូនាគមុនីសត្ថាសុខុមោ នី សុវណ្ណមុនី រ៉េត បានមានព្រះថេរដីការគាំទ្ររាល់សកម្មភាពមនុស្សធម៌របស់សាខារាជធានីភ្នំពេញ ជាពិសេសក.ក្រ.កក្រោមការដឹកនាំដ៏ឈ្លាសវៃប្រកបដោយភាពត្រឹមត្រូវនៃលោកជំទាវកិត្ដិព្រឹទ្ឋបណ្ឌិត ប៊ុន រ៉ានី ហ៊ុន សែន ជាប្រធានក្នុងការខិតខំប្រឹងប្រែងជួយសង្គ្រោះដល់ប្រជាពលរដ្ឋដែលរងគ្រោះ និងងាយរងគ្រោះដោយប្រការផ្សេងៗ ដោយមិនប្រកាន់ពីជាតិសាសន៍ សាសនា វណ្ណៈ ពណ៌សម្បុរ ឬនិន្នាការនយោបាយអ្វីឡើយទើបថ្ងៃនេះព្រះអង្គមាននូវទេយ្យទានបន្ដិចបន្ដួចដែលបានមានសទ្ធាជ្រះថ្លារបស់បងប្អូនជាពុទ្ធបរិស័ទប្រគល់ជូនដល់សាខារាជធានីភ្នំពេញ ដើម្បីរួមចំណែកជួយសំរាលនូវ ការលំបាករបស់បងប្អូនប្រជាពលរដ្ឋដែលរងគ្រោះ ។
លោក គ្រួច សាមឿន បានមានប្រសាសន៍ពាំនាំនូវការផ្ដាំផ្ញើសាកសួរសុខទុក្ខ និងសេចក្ដីថ្លែងអំណរគុណយ៉ាងជ្រាលជ្រៅពីសំណាក់លោកប៉ា សុជាតិវង្ស ប្រធានគណៈកម្មាធិការសាខា និងជាអភិបាលរងរាជធានីភ្នំពេញ ប្រគេនចំពោះព្រះគ្រូនាគមុនីសត្ថាសុខុមោ នី សុវណ្ណមុនីរ៉េត ដែលព្រះអង្គជានិច្ចជាកាលតែងតែផ្សារភ្ជាប់គ្រាំទ្រដល់សកម្មភាពមនុស្សធម៌របស់សាខារាជធានីភ្នំពេញក្នុងការរួមចំណែកជួយរំលែកនូវការលំបាករបស់ប្រជាពលរដ្ឋដែលរងគ្រោះ ។ លោកនាយកក៏បានជំរាបប្រគេនអំពីសកម្មភាពមនុស្សធម៌របស់សាខារាជធានីភ្នំពេញ ជាពិសេស ក.ក្រ.ក ក្រោមការដឹកនាំដ៏ខ្ពង់ខ្ពស់ប្រកបដោយឈ្លាសវៃនៃលោកជំទាវ កិត្ដិព្រឹទ្ឋបណ្ឌិត ប៊ុន រ៉ានី ហ៊ុន សែន ជាប្រមុខ គឺទទួលបានការជឿជាក់គាំទ្រពីសំណាក់សប្បុរសជន គ្រប់មជ្ឍដ្ឋាន ដែលធ្វើឱ្យស្ថាប័នមនុស្សធម៌នេះមានការរីកចំរើនលូតលាស់តាំងពីថ្នាក់ជាតិរហូតដល់មូលដ្ឋាន មិនត្រឹមតែប៉ុណ្ណោះ ក.ក្រ.ក បានដើរតូនាទីយ៉ាងសកម្មជាជំនួយការឱ្យអាជ្ញាធរសាធារណៈលើវិស័យមនុស្សធម៌ថែមទៀតផង ។
ចុងបញ្ចប់លោក គ្រួច សាមឿន សូមសន្យានឹងពាំនាំនូវទេយ្យទានទាំងនេះជួយឱ្យដល់ដៃ ប្រជាពលរដ្ឋដែលរងគ្រោះ និងងាយរងគ្រោះដោយប្រការផ្សេងៗឱ្យសមស្របទៅនឹងទឹកព្រះទ័យរបស់ព្រះអង្គជាម្ចាស់ទេយ្យទាន ៕
ចែករំលែកព័តមាននេះ