រាជធានីភ្នំពេញ ៖ ប្រជាពលរដ្ឋរងគ្រោះដោយសារមេរោគអេដស៍-ជំងឺអេដស៍មានជីវភាពទីទ័លក្រចំនួន១៥គ្រួសារ រស់នៅសង្កាត់ វាលវង់ ខណ្ឌ៧មករា ត្រូវបានទទួលអំណោយសង្គ្រោះពី ក.ក្រ.ក សាខារាជធានីភ្នំពេញ នាល្ងាចថ្ងៃទី២៥ ខែមេសា ឆ្នាំ២០១២ នៅបរិវេណសាលាខណ្ឌ៧មករា ក្រោមអធិបតីភាព លោកជំទាវ អ៊ួន សុវណ្ណរិន្ទ ប៉ា សុជាតិវង្ស អនុប្រធានគណៈកម្មការស្វែងរកមូលនិធិសាខា ព្រមទាំងលោកជំទាវ លោកឧកញ៉ា លោក លោកស្រីក្នុងជួរគណៈកិត្ដិយសសាខា គណៈកម្មាធិការសាខា, មន្ដ្រីប្រតិបត្ដិសាខា, អនុសាខា និងអាជ្ញាធរមូលដ្ឋានជាច្រើនរូបទៀត ។
លោកជំទាវ អ៊ួន សុវណ្ណរិន្ទ ក្នុងនាមលោកប៉ា សុជាតិវង្ស ប្រធានគណៈកម្មាធិការសាខា និងជាអភិបាលរងរាជធានីភ្នំពេញ ព្រមទាំងប្រតិភូទាំងអស់បានមានប្រសាសន៍ពាំនាំនូវសេចក្ដីផ្ដាំផ្ញើសាកសួរសុខទុក្ខពីសំណាក់លោកជំទាវកិត្ដិព្រឹទ្ឋបណ្ឌិតប៊ុន រ៉ានី ហ៊ុន សែន ប្រធាន ក.ក្រ.កដែលលោកជំទាវតែងតែយកចិត្ដទុកដាក់នឹកគិតព្រួយបារម្ភពីសុខទុក្ខ និងបានក្រើនរំលឹកដល់គ្រប់បណ្ដាសាខាទាំង២៤ រាជធានី-ខេត្ដ ឱ្យយកចិត្ដទុកដាក់ឱ្យបានម៉ត់ចត់ចំពោះបងប្អូនប្រជាពលរដ្ឋយើងដែលរងគ្រោះ និងងាយរងគ្រោះដោយប្រការផ្សេងៗ ។
លោកជំទាវសូមឱ្យបងប្អូនដែលរងគ្រោះកុំអស់សង្ឃឹម បាក់ទឹកចិត្ដត្រូវនឹងនរចិត្ដ ព្រោះបងប្អូនមិនឯកោទេ នៅមាន ក.ក្រ.ក និងរាជរដ្ឋាភិបាលក៏ដូចជាអាជ្ញាធរមូលដ្ឋាននៅចាំជួយសង្គ្រោះដល់បងប្អូនជានិច្ច ដូចនេះហើយក៏សូមបងប្អូនទាំងអស់ត្រូវខិតខំតស៊ូយកចិត្ដទុកដាក់ថែរក្សាសុខភាពឱ្យបានល្អ ព្រមទាំងលេបថ្នាំឱ្យបានទៀងទាត់ទៅតាមវេជ្ជបញ្ជាដើម្បីទ្រទ្រង់ជីវិតបាន យូរអង្វែងទន្ទឹមនឹងនេះសូមកុំមានការធ្វេសប្រហែសប្រការសំខាន់មិនត្រូវចំលងទៅអ្នកដ៍ទៃ និងណែនាំដល់អ្នកដទៃឱ្យចេះការពារទប់ស្កាត់នូវការចំលងមេរោគអេដស៍នេះ ។
លោកជំទាវ បានជំរាបពីប្រភពអំណោយដែលនាំយកមកចែកជូននាពេលនេះមួយផ្នែកបានមកពីការធ្វើអាជីវកម្មផ្ទាល់របស់សាខាគឺការផលឹតទឹកបរិសុទ្ធឱរ៉ាល់ និងសេវាកម្មកំទេចសំណល់វេជ្ជសាស្ដ្រ មួយផ្នែកទៀតបានមកពីការអំពាវនាវដល់សប្បុរសជននានា និងព្រះសង្ឃតាមបណ្ដាវត្ដក្នុងរាជធានីភ្នំពេញ ។ ឆ្លៀតក្នុងឱកាសនោះដែរទាក់ទឹនទៅនឹងបញ្ហាគ្រោះថ្នាក់ចរាចរណ៍ លោកជំទាវអនុប្រធានគណៈកម្មការស្វែងរកមូលនិធិសាខាសូមអំពាវនាវក្រើនរំលឹកដល់បងប្អូនប្រជាពលរដ្ឋទាំងអស់សូមមេត្ដាបើកបរត្រូវចេះយល់យោគអធ្យាស្រ័យគ្នាទៅវិញទៅមក ជាពិសេសត្រូវគោរពច្បាប់ចរាចរណ៍ឱ្យបានភ្ជាប់ភ្ជួន ព្រមទាំងកុំពិសារជាតិស្រវឹងបើស្រវឹងកុំបើកបរ ។
ទាក់ទិនទៅនឹងបញ្ហាគ្រោះអគ្គីភ័យ លោកជំទាវក៏សូមបងប្អូនប្រជាពលរដ្ឋទាំងអស់ត្រូវមានការប្រយ័ត្នខ្ពស់ទៅលើភ្លើងអគ្គីសនី ទៀន ធូប ចង្ក្រាន ហ្គាស ឬរបស់របរដែលងាយឆាបឆេះ ដើម្បីចៀសវាងនូវគ្រោះអគ្គីភ័យដែលអាចកើតមានឡើងជាយថាហេតុ។ អំណោយសង្គ្រោះដែលសាខានាំយកមកចែកជូនដល់ប្រជាពលរដ្ឋរងគ្រោះទាំង១៥គ្រួសាររួមមាន ៖
គ្រឿងឧបភោគ បរិភោគ សំភារប្រើប្រាស់១៨មុខ ចំនួន១៥សំរាប់ និងថវិកា៧៥ម៉ឺនរៀល។ សំភារថវិកាបន្ថែមទទួលបានពីលោកជំទាវឧកញ៉ា យីន ផាន្នី ម្សៅសាប៊ូ១៥កញ្ចប់ និងអំបិលអ៊ីយ៉ូត១៥កញ្ចប់, លោកជំទាវឧកញ៉ា ភាព ហៀក ប្រេងឆា១៥ដប ទឹកដោះគោ៦០កំប៉ុង, លោកឧកញ៉ា ថៃ សេងឡុង ថវិកា១៥ម៉ឺនរៀល, លោកជំទាវ មុំ ក្រសាល ថវិកា៧៥.០០០រៀល, លោកស្រី មុំ សណ្ដាប់ ថវិកា៧៥.០០០រៀល, លោកជំទាវ ឈឹម វត្ដី ថវិកា១០០ដុល្លារសហរដ្ឋអាមេរិក, លោកជំទាវ សៅ សុផានី សរ មុនី ថវិកា២០ម៉ឺនរៀល, លោកស្រី ជា ណាវី ចាន់ ពិសី ថវិកា១៥ម៉ឺនរៀល ៕
ចែករំលែកព័តមាននេះ