រាជធានីភ្នំពេញ ៖ គណៈកម្មាធិការបក្សប្រជាជនកម្ពុជាខណ្ឌប្ញស្សីកែវ កាលពីរសៀលថ្ងៃទី២៥ មេសា បាននាំយកអំណោយទៅចែកជូនដល់ប្រជាពលរដ្ឋរងគ្រោះដោយសារខ្យល់ព្យុះចំនួន១២គ្រួសារ នៅក្នុងភូមិចំបក់មាស និងភូមិក្តីចាស់ សង្កាត់បាក់ខែង ខណ្ឌប្ញស្សីកែវ ។ ចូលរួមនៅក្នុងពិធីចែកអំណោយនោះមាន លោកស្រី អួង សុផល្លា ប្រធានសមាគមនារីកម្ពុជាដើម្បីសន្តិភាពនិងអភិវឌ្ឍន៍ខណ្ឌប្ញស្សីកែវ និងជាតំណាងលោកឃ្លាំង ហួត ប្រធានគណៈកម្មាធិការបក្សប្រជាជនកម្ពុជាខណ្ឌ ព្រមទាំងសមាជិកសមាជិកាបក្សយ៉ាងច្រើនកុះករ ។
អំណោយដែលនាំយកទៅចែកជូនក្នុងឱកាសនោះ សម្រាប់ប្រជាពលរដ្ឋ៣គ្រួសារ ដែលត្រូវខ្យល់ព្យុះរលំផ្ទះទាំងស្រុង ក្នុង១ គ្រួសារទទួលបានអង្ករ៥០គីឡូក្រាម មី២កេស ទឹកត្រី១យួរ ទឹកស៊ីអ៊ីវ១យួរ ត្រីខ១០កំប៉ុង កន្ទេល១ មុង១ ភួយ១ សារុង១ ធុងទឹកជ័រធំ១ តង់១ ថវិកា២០ម៉ឺនរៀល ។ សម្រាប់ប្រជាពល រដ្ឋ៩គ្រួសារដែលត្រូវខ្យល់ព្យុះរបើកដំបូលក្នុង១គ្រួសារៗទទួលបានអង្ករ២០គីឡូក្រាម មី១កេស ទឹកត្រី១យួរ ទឹកស៊ីអ៊ីវ១យួរ សារុង១ និងថវិកា១០ម៉ឺនរៀល ។
លោក ញឹក ស៊ីផុន ចៅសង្កាត់បាក់ខែង បានឱ្យដឹងថា កាលពីថ្ងៃទី២១ មេសា វេលាម៉ោង៦និង៣០នាទីល្ងាច ប្រជាពលរដ្ឋចំនួន១២គ្រួសាររស់នៅភូមិក្តីចាស់ និងភូមិចំបក់មាស បានរងគ្រោះដោយខ្យល់ព្យុះ ដែល៣គ្រួសាររលំផ្ទះទាំងស្រុង និង៩គ្រួសារត្រូវខ្យល់បោកបក់របើកដំបូល ។ បន្ទាប់ពីមានប្រជាពលរដ្ឋរងគ្រោះ ក្រុមការងារចុះជួយសង្កាត់បាក់ខែងក៏ បានចុះសាកសួរសុខទុក្ខ និងនាំយកអំណោយសង្គ្រោះបន្ទាន់ទៅចែកជូនដល់ប្រជាពលរដ្ឋក្នុង១គ្រួសារៗថវិកា១០ម៉ឺនរៀល ហើយរាយការណ៍ទៅគណបក្សប្រជាជនកម្ពុជាខណ្ឌប្ញស្សីកែវ នាំអំណោយមកចែកជូនបន្តទៀតនៅពេលនេះ ។
លោកស្រីអួង សុផល្លា ជំនួសមុខឱ្យក្រុមការងារគណបក្សប្រជាជនកម្ពុជា បានចូលរួមរំលែកទុក្ខជាមួយបងប្អូនរងគ្រោះទាំងអស់។ បន្ទាប់ពីទទួលបានព័ត៌មានពីបងប្អូនរងគ្រោះគណៈកម្មាធិការបក្សប្រជាជនកម្ពុជាខណ្ឌប្ញស្សីកែវ ដែលមានលោកឃ្លាំង ហួត ជាប្រធាន បានគិតគូរជាខ្លាំងចំពោះបងប្អូន ហើយនាំយកអំណោយមកចែកជូនបងប្អូននៅពេលនេះ ។
អំណោយទាំងនេះ មិនអាចបំពេញតម្រូវការគ្រប់គ្រាន់ដល់បងប្អូននោះទេ តែជាការចូលរួមចែករំលែកជួយសម្រួលដល់ការលំបាកដល់បងប្អូនបានមួយគ្រា ។ ម៉្យាងទៀត នេះបញ្ជាក់ពីការយកចិត្តទុកដាក់របស់គណបក្សប្រជាជនកម្ពុជា ចំពោះប្រជាពលរដ្ឋរងគ្រោះ ដែលទីណាមានការលំបាកគឺមានគណបក្សប្រជាជនកម្ពុជា ។ ក្រៅពីអំណោយរបស់គណបក្សប្រជាជនកម្ពុជានៅមានអំណោយរបស់កាកបាទក្រហមកម្ពុជាទៀតដែលនឹងនាំយកមកចែកជូននៅពេលក្រោយទៀត ។
នៅក្នុងឱកាសនោះ លោកស្រី អួង សុផល្លា ក៏បានឧបត្ថម្ភថវិកាផ្ទាល់ខ្លួនជូនដល់ស្ត្រីពិការវ័យក្មេងម្នាក់ឈ្មោះ សុផាន់ ណារ៉ាលីដា អាយុ១៧ឆ្នាំ នូវទឹកប្រាក់៥ម៉ឺនរៀល និងសារុង១ និងឧបត្ថម្ភកង់១គ្រឿងជូនដល់កូនលោកចក់ ស្រ៊ីម ជាគ្រួសាររងគ្រោះខ្យល់ព្យុះរលំផ្ទះ ៕
ចែករំលែកព័តមាននេះ