រាជធានីភ្នំពេញ៖ នៅសណ្ឋាគារឡឺរ៉ូយ៉ាល់កាលពីយប់ថ្ងៃទី២៣ មេសា ក្រុមហ៊ុនNokia បានរៀបចំពិធីប្រកាសចេញលក់ទូរស័ព្ទNokia ស៊េរីថ្មី ដែលមានអេក្រង់Touch ផង និងប៊ូតុងចុចផង គឺទូរស័ព្ទNokia Asha202 ។
ដោយមានអេក្រង់Touchទំហំ២,៤អ៊ីញ ទូរស័ព្ទ Nokia Asha202 បង្កភាពងាយស្រួលជូនអ្នកប្រើប្រាស់ក្នុងការបើកអុីនធើរណេត និងបើកកម្មវិធីផ្សេងៗ។ ទន្ទឹមនឹងភាពងាយស្រួល ក្នុងការប្តូរស៊ីមដោយមិនបាច់បិទទូរស័ព្ទ Nokia Asha202 មានមុខងារ SIM Manager ដែលអាចឱ្យអ្នកប្រើប្រាស់កំណត់លក្ខខណ្ឌទៅលើស៊ីមកាតបានច្រើនរហូតដល់ទៅ៥ស៊ីមកាត ។ ក្រៅពីនេះ វាមានម៉ាស៊ីនថតទំហំ២មេហ្កាភិចសែល មុខងារសម្រាប់ចាក់ចម្រៀង និងបើក វិទ្យុអេហ្វអឹម Bluetoothនិងអាចបញ្ចូលអង្គចងចាំ បន្ថែមបានរហូតដល់ទៅ 32GBទៀត ផង ។ ទូរស័ព្ទស៊ីមពីរ Nokia Asha202 នឹងមានដាក់លក់នៅកម្ពុជាចាប់ពីថ្ងៃនេះតទៅ ហើយក្នុងតម្លៃលក់រាយប្រហាក់ប្រហែល៨៤ ដុល្លារ ។
នៅក្នុងNokia Asha 202 មានNokia Browser វាជាបច្ចេកវិទ្យាបង្រួមទិន្នន័យថ្មីរបស់ Nokia ដែលផ្តល់ជូនអ្នកប្រើប្រាស់នូវបទពិសោធន៍ភ្ជាប់អុីនធើរណេតដ៏ល្អប្រពៃ។ បច្ចេកវិទ្យានេះជួយចូលរួមចំណែកសន្សំសំចៃទាំងពេលវេលា និងចំណាយក្នុងការទាញយកទិន្នន័យ ហេតុដូច្នេះហើយទើបវាត្រូវបានអតិថិជននៅជុំវិញពិភពលោកយកវាទៅប្រើប្រាស់រៀងរាល់វិនាទី ។នៅក្នុងឱកាសប្រកាសចេញលក់ Nokia Asha 202 លោក Jerry Manus អគ្គនាយកនៃប្រតិបត្តិការក្រុមហ៊ុនNokiaប្រចាំនៅកម្ពុជា-ឡាវ បានលើកបញ្ជាក់ថា «អ្វីដែលកាន់តែពិសេសមិនធ្លាប់មានពីមុនគឺNokia Asha 202 មានផ្តល់ជូននូវហ្គេមEA ដ៏ពេញនិយមចំនួន៤០ ហ្គេម ដោយឥតគិតថ្លៃទៀតផង ដោយរាប់បញ្ចូលទាំង Tetris, Need for Speed, The Run និង Bejeweled ផង ។ ហ្គេមទាំងនេះបើគិតជាទឹកប្រាក់គឺមានតម្លៃប្រហាក់ប្រហែល១០០ដុល្លារ ប៉ុន្តែត្រូវបានយកមកផ្តល់ជូនដោយឥតគិតថ្លៃ ក្នុងរយៈពេល៦០ថ្ងៃគិតចាប់ពីថ្ងៃដែលអ្នកប្រើប្រាស់ចូលទៅទាញយកពីNokia Store»។
លោកJerry បានបន្ថែមទៀតថា Kokia Asha 202 ផ្តល់ជូនអ្នកប្រើប្រាស់នូវមធ្យោបាយទំនាក់ទំនងគ្នាយ៉ាងទាន់សម័យដូចជាអ៊ីមែល Messenger និងការបញ្ជូនរូបភាព ឬវីដេអូ ចែកគ្នាមើលតាមរយៈបណ្តាញសង្គមជាដើម ។
Kokia Asha 202 បំពាក់ដោយថ្មមាត្រដ្ឋាន Li-lon 1020mAh (BL-5C) ធានាបាននូវរយៈពេលបើកចោលរហូតដល់៤០០ម៉ោង និយាយជាប់រហូតបាន៥ម៉ោង និងចាក់ចម្រៀងជាប់រហូតបាន២៥ម៉ោង ។ អតិថិជនអាចជ្រើសរើសពណ៌ដ៏ស្រស់ស្អាតគួរឱ្យទាក់ទាញមានច្រើនពណ៌គឺពណ៌ខ្មៅសបែបទឹកប្រាក់ ក្រហមចាស់ ប្រផេះ និងសបែបទឹកមាស ៕
ចែករំលែកព័តមាននេះ