រាជធានីភ្នំពេញថ្ងៃទី២៤ មេសា ឆ្នាំ២០១២ ៖ ថ្ងៃនេះក្រុមហ៊ុន Panasonic បានប្រកាសបើកសម្ពោធមជ្ឈមណ្ឌលបម្រើអតិថិជនរបស់ខ្លួននៅប្រទេសកម្ពុជា នៅតំបន់ពាណិជ្ជកម្មកណ្តាលរាជធានីភ្នំពេញ ។ មជ្ឈមណ្ឌលនេះ ត្រូវបានគ្រប់គ្រងដោយអគ្គនាយកលោក Hidehiko Kondo រួមជាមួយក្រុមការងារគាំទ្រដែលមាននិយោជិតក្នុងស្រុកចំនួន៧នាក់ ។
លោក Kondo អគ្គនាយកមជ្ឈមណ្ឌលបម្រើអតិថិជន Panasonic ក្នុងប្រទេសកម្ពុជា បានមានប្រសាសន៍ថា «ការបើកមជ្ឈមណ្ឌលបម្រើអតិថិជននេះ បង្ហាញនូវការប្តេជ្ញាចិត្តរបស់ក្រុមហ៊ុន Panasonic ក្នុងការផ្តល់ការគាំទ្រក្រោយពេលលក់ដ៏ល្អបំផុត ដល់អតិថិជនរបស់យើងនៅប្រទេសកម្ពុជា ។ មជ្ឈមណ្ឌលនេះ នឹងពង្រឹងការជឿទុកចិត្តរបស់អតិថិជន ក្នុងការប្រើប្រាស់ផលិតផលឈានមុខថ្មីៗរបស់ Panasonic » ។
ផលិតផល Panasonic ទទួលបានការពេញចិត្ត និងឱ្យតម្លៃខ្ពស់នៅប្រទេសកម្ពុជា ដោយសារដំណើរការដ៏ល្អប្រសើរ ការរចនាដ៏ស្អាត ភាពងាយស្រួលប្រើសម្រាប់អ្នកប្រើប្រាស់ ភាពអាចទុកចិត្តបាន និងគុណភាពខ្ពស់ ។ ការបម្រើអតិថិជនដែលរួមបញ្ចូលនូវសេវាកម្មក្រោយពេលលក់ គឺជាផ្នែកដ៏សំខាន់មួយនៃយុទ្ធសាស្រ្តផលិតផលរបស់ Panasonic ។ ការបង្កើតមជ្ឈមណ្ឌលបម្រើអតិថិជន នឹងធានាបាននូវការពេញចិត្តរបស់អតិថិជនកាន់តែច្រើន ព្រមទាំងពង្រឹងភាពអាចទុកចិត្តបានរបស់ Panasonic ក្នុងនាមជាម៉ាកគ្រឿងអេឡិចត្រូនិកសម្រាប់អ្នកប្រើប្រាស់នៅប្រទេសកម្ពុជា ។
លោក Yorihisa Shiokawa នាយកចាត់ការទូទៅនៃក្រុមហ៊ុន Panasonic Asia Pacific Pte Ltd បានមានប្រសាសន៍ថា «ទីតាំងភូមិសាស្រ្តជាយុទ្ធសាស្ត្រគោលនយោបាយអនុគ្រោះរបស់រដ្ឋាភិបាល ព្រមទាំងកម្លាំងពលកម្មក្នុងស្រុកវ័យក្មេង និងស្វាហាប់ ធ្វើឱ្យប្រទេសកម្ពុជាក្លាយជាទីផ្សារដ៏មានសក្តានុុពល និងភាពទាក់ទាញខ្ពស់សម្រាប់ការវិនិយោគបរទេស ។ កំណើនសេដ្ឋកិច្ចជាលំដាប់ កំពុងមានឥទ្ធិពលជាវិជ្ជមានទៅលើអំណាចទិញរបស់អ្នកប្រើប្រាស់កម្ពុជា ហើយពួកគេប្រាថ្នាចង់បាននូវគុណភាពជីវិតដ៏ប្រសើរ ។ មជ្ឈមណ្ឌលបម្រើអតិថិជនថ្មីនឹងផ្តល់ការគាំទ្រដល់អតិថិជនរបស់ Panasonic សម្រាប់ប្រភេទផលិតផលដ៏ទូលំទូលាយរបស់ខ្លួនដូចជា ម៉ាស៊ីនត្រជាក់ សម្ភារប្រើប្រាស់ក្នុងផ្ទះ ផលិតផលសោតទស្សន៍ និងផលិតផលថែរក្សាសម្ផស្ស» ។
ក្រុមហ៊ុន Panasonic Asia Pacific មានទីតាំងផលិតចំនួន៤៨កន្លែងនៅក្នុងប្រាំពីរប្រទេសក្នុងតំបន់ ដែលជាមជ្ឈមណ្ឌលសំខាន់សម្រាប់សកម្មភាពផលិតកម្មជាសកលរបស់ក្រុមហ៊ុន Panasonic ។ ដោយមានមូលដ្ឋាននៅប្រទេសសិង្ហបុរី ទីស្នាក់ការកណ្តាលរបស់ក្រុមហ៊ុន Panasonic ប្រចាំតំបន់អាស៊ីប៉ាស៊ីហ្វិក ក៏លើកកម្ពស់ដល់ការផ្តួចផ្តើមគំនិតអភិរក្សបរិស្ថាន និងលើកទឹកចិត្តដល់ការប្រើប្រាស់ផលិតផលដែលមិនប៉ះពាល់ដល់បរិស្ថាន តាមរយៈយុទ្ធនាការផ្សព្វផ្សាយការយល់ដឹងជាសាធារណៈអំពីបរិស្ថាន ដែលត្រូវបានបង្កើតឡើងសម្រាប់ប្រទេសនីមួយៗនៅក្នុងតំបន់ ។ ក្នុងកម្រិតទូលំទូលាយជាងនេះ ក្រុមហ៊ុន Panasonic Asia Pacific មានគោលដៅជាក់លាក់ក្នុងការកាត់បន្ថយការបញ្ចេញឧស្ម័នកាបូនិកក្នុងតំបន់របស់ខ្លួន ដើម្បីគាំទ្រដល់ការផ្តួចផ្តើមគំនិតផ្នែកបរិស្ថានសកលរបស់ក្រមហ៊ុន Panasonic ៕
ចែករំលែកព័តមាននេះ