ខេត្តកំពត ៖ កាលពីព្រឹកថ្ងៃទី២២ មេសា លោកវេជ្ជបណ្ឌិត សុះ មុះសិន រដ្ឋលេខាធិការក្រសួងធម្មការនិងសាសនា ប្រធានសមាគមនិស្សិតមូស្លីមកម្ពុជា និងជាអនុប្រធានអង្គការមូលនិធិអភិវឌ្ឍន៍មូស្លីមកម្ពុជា និងលោកជំទាវ បាននាំយកអំណោយមនុស្សធម៌របស់អង្គការមូស្លីមហិលហ្វិន នៃប្រទេសអាល្លឺម៉ង់ ទៅចែកជូនដល់ប្រជាពលរដ្ឋចំនួន១០៧គ្រួសារដែលរង គ្រោះដោយសារខ្យល់ព្យុះនៅខេត្តកំពត កាលពីថ្ងៃទី៣១ ខែមីនា កន្លងមកនេះ ។
ក្នុងឱកាសនោះក៏មានការអញ្ជើញចូលរួមពីសំណាក់លោក សា ឡេះសេន តំណាងរាស្រ្តមណ្ឌលកំពត លោក សាន់ សាប់អី អនុរដ្ឋលេខាធិការក្រសួងសុខាភិបាល អនុប្រធានសមាគមនិស្សិតមូស្លីមកម្ពុជា លោកម៉ាន សុគ្រី អនុរដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ជាអគ្គលេខាធិការរងសមាគមនិស្សិតមូស្លីមកម្ពុជា លោកវេជ្ជបណ្ឌិត ពាស់ មុស្លិម អនុប្រធានសមាគមនិស្សិតមូស្លីមកម្ពុជា អស់លោកគណៈអីុម៉ាំខេត្ត អនុប្រធានមន្ទីរធម្មការខេត្ត និងអស់លោក លោកស្រីយ៉ាងច្រើនកុះករ ។
លោកនាក់ វណ្ណារី អភិបាលក្រុងកំពត និងលោកសា ឡេះសេន តំណាងរាស្ត្រមណ្ឌលកំពត បានឱ្យដឹងថា កាលពីថ្ងៃទី៣១ ខែមីនា ឆ្នាំ ២០១២ វេលាម៉ោង១និង៣០នាទីរសៀល មានខ្យល់ព្យុះយ៉ាងខ្លាំងមួយឈ្មោះ ប៉ាខា បានបោកបក់មកលើសង្កាត់អណ្តូងខ្មែរ ត្រើយស្លា ក្រុងកំពត និងឃុំព្រៃឃ្មុំ ស្រុកទឹកឈូ បណ្តាលឱ្យខូចខាតផ្ទះប្រជាពលរដ្ឋអស់ចំនួន១០៧ខ្នង ក្នុងនោះចំនួន៧ខ្នងមានសភាពធ្ងន់ធ្ងរ តែមិនបណ្តាលឱ្យមនុស្សស្លាប់ ឬរងរបួសទេ ។ លោកអភិបាលក្រុងក៏បានថ្លែងអំណរគុណយ៉ាងជ្រាលជ្រៅចំពោះលោកវេជ្ជបណ្ឌិត សុះ មុះសិន ដែលបាននាំយកអំណោយមនុស្សធម៌ដ៏មានតម្លៃមកចែកជូនប្រជាពលរដ្ឋដែលរងគ្រោះដោយធម្មជាតិនៅពេលនេះ ។
មានប្រសាសន៍សំណេះសំណាលទៅកាន់ប្រជាពលរដ្ឋដែលរងគ្រោះ ទាំង១០៧គ្រួសារនាឱកាសនោះ លោកវេជ្ជបណ្ឌិត សុះ មុះសិនបានពាំនាំនូវការចូលរួមរំលែកទុក្ខ ពីសំណាក់អង្គការមូស្លីមហិលហ្វិន និងសប្បុរជនព្រមទាំងថ្នាក់ដឹកនាំសមាគម សមាជិក សមាជិកាទាំងអស់ ។ លោកបានថ្លែងថា ទោះបីជាអំណោយនេះមិនអាចឆ្លើយតបបានទាំងស្រុងចំពោះការខ្វះខាតរបស់បងប្អូនយ៉ាងណាក៏ដោយ ក៏ប៉ុន្តែអាចជួយសម្រាលនូវការលំបាកខ្វះខាតរបស់បងប្អូនបានមួយគ្រាដែរ ។ ដូចនេះ សូមបងប្អូនខិតខំប្រឹងប្រែងបង្កបង្កើនផល និងប្រកបមុខរបរផ្សេងៗដោយខ្លួនឯងបន្ថែមទៀត ទើបធ្វើឱ្យជីវភាពរស់នៅប្រសើរឡើងវិញ ។
លោកវេជ្ជបណ្ឌិតបានជម្រាបថា អង្គការមូស្លីមហិលហ្វិន ប្រទេសអាល្លឺម៉ង់ បានផ្តល់ថវិកាជំនួយសង្គ្រោះបន្ទាន់ដល់ប្រជាពលរដ្ឋកម្ពុជាសរុបចំនួន២៧៤គ្រួសារ គឺនៅខេត្តកំពតចំនួន១០៧គ្រួសារ ខេត្តបន្ទាយមានជ័យចំនួន១១៩គ្រួសារ ខេត្តកំពង់ឆ្នាំង២៣គ្រួសារ ខេត្តកណ្តាល២៥គ្រួសារ ហើយសមាគមនិស្សិតមូស្លីមកម្ពុជា ដែលជាអ្នកអនុវត្តគម្រោង នឹងធ្វើការបែងចែកឱ្យបានដល់ដៃប្រជាពលរដ្ឋដែលរងគ្រោះខាងលើ ឱ្យបានមុនដំណាច់ខែមេសានេះ ។
លោកវេជ្ជបណ្ឌិត សុះ មុះសិន បានបញ្ជាក់បន្ថែមថា កន្លងមកក៏ដូចជាបច្ចុប្បន្ន អង្គការមូស្លីមហិលហ្វិន តែងតែឆ្លើយតបយ៉ាងទាន់ពេលវេលា ហើយមិនរើសអើងចំពោះសាសនា ជាតិសាសន៍ ពណ៌សម្បុរនោះទេ ។ ជាក់ស្តែងកន្លងមក នៅប្រទេសកម្ពុជា មានគ្រោះធម្មជាតិ ដោយទឹកជំនន់ អគ្គិភ័យ អង្គការហិលហ្វិន តែងតែផ្តល់អំណោយមនុស្សធម៌តាមរយៈសមាគមនិស្សិតមូស្លីមកម្ពុជាយកមកចែកជូនដល់ជនរងគ្រោះជាបន្តបន្ទាប់ ។
បន្ទាប់មក លោកវេជ្ជបណ្ឌិត បានអញ្ជើញចែកអំណោយសង្គ្រោះរបស់អង្គការមូស្លីមហិលហ្វិន ជូនដល់ប្រជា ពលរដ្ឋរងគ្រោះចំនួន១០៧គ្រួសារ ដែលអញ្ជើញមកពីសង្កាត់អណ្តូងខ្មែរ ត្រើយស្លា ក្រុងកំពត និងឃុំព្រៃឃ្មុំ ស្រុកទឹកឈូ ខេត្តកំពត ក្នុងមួយគ្រួសារៗទទួលបានអង្ករ២៥គីឡូក្រាម មី១កេស ស្ករស៤គីឡូក្រាម អំបិល២គីឡូក្រាម ត្រីខ៥កំប៉ុង ប្រេងឆា២ដប និងថវិកា១២៥.០០០រៀល ៕
ចែករំលែកព័តមាននេះ