អ្នកវិទ្យាសាស្ត្របាននិយាយថា ផ្លែប៊័រ(Avocado)អាចជាអាវុធមួយប្រយុទ្ធប្រឆាំងភាពចាស់ទៅតាមអាយុនិងជំងឺ ។ ប្រេងដែលគេចម្រាញ់ពីផ្លែឈើប្រភេទនេះត្រូវបានបង្ហាញនៅក្នុងការពិសោធថា វាមានប្រសិទ្ធភាពប្រឆាំងនឹងរ៉ាឌីកាល់សេរី(ជាប្រភេទម៉ូលេគុលគ្រោះថ្នាក់ម្យ៉ាងនៅក្នុងខ្លួនមនុស្ស)។ ទាំងនេះជារឿងសាមញ្ញនៅក្នុងកន្លែងផ្ទុកកោសិកាមានភ្នាសបិទជិត mitochondria(គឺជាកន្លែងស្តុកដ៏តូចមួយនៅក្នុងកោសិការបស់យើងដែលបំលែងអាហារទទួលទានឱ្យទៅជាថាមពល) ។
មានសកាសធាតុគីមីប្រឆាំងអុកស៊ីដកម្មជាច្រើនរបស់បន្លែនិងផ្លែឈើដូចជាការ៉ុតនិងប៉េងប៉ោះដែលសុទ្ធតែអាចកំទេចចោលនូវរ៉ាឌីកាល់សេរី ប៉ុន្តែពួកវាទាំងនេះមិនអាចធ្វើដំណើរចូលក្នុងកន្លែងផ្ទុកកោសិកា mitochondriaបានទេ។ មានតែសកាសធាតុគីមីប្រឆាំងអុកស៊ីដកម្មក្នុងផ្លែប៊័រប៉ុណ្ណោះដែលអាចចូលទៅបាន ។លោក Christian Cortes-Rojoអ្នកស្រាវជ្រាវបានថ្លែងថា ៖«បញ្ហាគឺថា សភាសធាតុគីមីប្រឆាំងអុកស៊ីដកម្មនៅក្នុងផ្លែឈើផ្សេងមិនអាចចូលក្នុង mitochondriaបាន ។ ដូច្នេះរ៉ាឌីកាល់សេរីបានបន្តបំផ្លាញ mitochondriaធ្វើឱ្យការផលិតថាមពលត្រូវបញ្ឈប់ ហើយកោសិកាទាំងឡាយក៏ងាប់»។
ចំណែកការសិក្សាមួយដែលបានចេញផ្សាយកាលពីខែកុម្ភៈកន្លងមកបានរកឃើញពីអត្ថប្រយោជន៍ផ្លែប៊័រផងដែរ។ ពួកគេថា ផ្លែប៊័រជាពិសេសផ្លែប៊័រដាំនៅប្រទេសស៊ីលីមានសមាសធាតុពីធម្មជាតិមួយប្រភេទដែលអាចប្រឆាំងទៅនឹងជំងឺស៊ាំនឹងថ្នាំAntibiotics(antibiotic-resistant infections)បាន។ សមាសធាតុដែលមាននៅក្នុងផ្លែប៊័រនេះអាចទប់ស្កាត់ប្រភេទបាក់តេរី staphylococciមានពណ៌លឿងមិនឱ្យទៅរំលាយប្រសិទ្ធភាពថ្នាំAntibioticsបាន។ បាក់តេរីទាំងនេះហើយដែលជាអ្នកបង្កឱ្យមានរោគឆ្លងនៅក្នុងដំបៅដែលកើតពីការវះកាត់។ វាបានបង្កើតជាភាពស៊ាំនៅក្នុងខ្លួនមនុស្សយ៉ាងឆាប់រហ័ស ។
លោក Jes Gitz Hollerនិស្សិតវេជ្ជបណ្ឌិតមកពីសាកលវិទ្យាល័យ University of Copenhagenរបស់ដាណឺម៉ាកបានធ្វើការងារពិសោធន៍ស្រាវជ្រាវនេះជាមួយមនុស្សមួយចំនួននៅប្រទេសស៊ីលី។ គាត់បាននិយាយថា៖«ខ្ញុំបានរកឃើញសារធាតុពីធម្មជាតិមួយនៅក្នុងផ្លែប៊័រនៅស៊ីលីដែលមានសកម្មភាពសម្រាប់ការព្យាបាល។ សមាសធាតុពីធម្មជាតិនេះ មានសក្តានុពលយ៉ាងអស្ចារ្យបំផុត ហើយប្រហែលជាក្នុងរយៈពេលមួយវែងជាងនេះយើងនឹងអាចបង្កើតបានជាឱសថដ៏មានប្រសិទ្ធិភាពមួយប្រភេទដើម្បីប្រឆាំងនឹងបាក់តេរី staphylococci។ តែក្នុងពេលនេះពុំទាន់មានផលិតផលបែបនេះនៅលើទីផ្សារនៅឡើយទេ»។
បាក់តេរី staphylococciឬ Staphylococcusដែលមានពណ៌លឿងគឺជាមូលហេតុបង្កដ៏សាមញ្ញបំផុតនៃការឆ្លងមេរោគចំពោះដំបៅដែលកើតក្រោយពីការវះកាត់រួច។ បាក់តេរីនេះក៏អាចជាមូលហេតុបង្កឱ្យទៅជាជំងឺច្រើនប្រភេទដែលកើតពីរបួសនិងការពុលអាហារផងដែរដែលជំងឺទាំងនេះសុទ្ធតែអាចធ្វើឱ្យស្លាប់បាន តួយ៉ាងដូចជា ជំងឺរលាកភ្នាសខាងក្នុងរបស់បេះដូង(Endocarditis)និងជំងឺមេរោគឆ្លងរាលដាលក្នុងឈាម(Septicemia)ជាដើម ៕
ចែករំលែកព័តមាននេះ