ខេត្តឧត្តរមានជ័យ ៖ ប្រជាពលរដ្ឋនៅក្នុងស្រុកអន្លង់វែង ដែលរងគ្រោះដោយអគ្គិភ័យឆាបឆេះលំនៅឋាននាពេលថ្មីៗកន្លងមកនេះ ចំនួន១០គ្រួសារ បានទទួលអំណោយពី
សប្បុរសជននៅក្នុងស្រុក តាមរយៈលោកអភិ បាលស្រុកអន្លង់វែង នាព្រឹកថ្ងៃទី៩ មេសា ។
លោក ញ៉ែម អេន អភិបាលរងស្រុកអន្លង់វែង បានឱ្យដឹងថា ក្រោយពីមានអគ្គិភ័យឆាបឆេះលំនៅឋានប្រជាពលរដ្ឋចំនួន១០ គ្រួសារនៅស្រុកអន្លង់វែង កាលពីពេលថ្មីៗកន្លងទៅនេះ ក្នុងនាមលោកជាអាជ្ញាធរមូលដ្ឋាន បានធ្វើការអំពាវនាវដល់សប្បុរសជនក្នុងស្រុកដូចជា ក្រុមអាជីវករ មន្ត្រីបម្រើការងារ កងកម្លាំងប្រដាប់អាវុធឱ្យចូលរួមឧបត្ថម្ភ ជាការអនុវត្តទៅតាមអនុសាសន៍របស់សម្តេចអគ្គមហាសេនាបតីតេជោ ហ៊ុុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺមិនទុកឱ្យប្រជាពលរដ្ឋណាម្នាក់ស្លាប់ដោយអត់អាហារឡើយ ។ លោក ញ៉ែម អេន បានបញ្ជាក់ថា អំណោយសប្បុរសជនក្នុងស្រុកទាំងនោះ គឺបានមកពីលោកអនុ សេនីយ៍ទោយ៉ុង គឹមលេង មន្ត្រីប៉េអឹមខេត្តប្រចាំទិសស្រុកអន្លង់វែង ព្រមទាំងភរិយា នូវអង្ករចំនួន១០ការុងស្មើនឹង៥០០គីឡូក្រាម វិទ្យុសម្រាប់ទាក់ទងចំនួន១ អង់តែនវិទ្យុចំនួន១០ ស័ង្កសីចំនួន១០សន្លឹក និងថវិកាចំនួន១០០ដុល្លារ លោកមុត មេន មេភូមិថ្នល់កែងព្រមទាំងភរិយាជួយឧត្ថម្ភសារុងចំនួន១០ និងលោកធីព្រមទាំងភរិយាជួយឧត្ថម្ភថវិកាចំនួន១០០ដុល្លារអាមេ
រិក ។
លោកអភិបាលរងស្រុកបានបញ្ជាក់ថា អំណោយទាំងអស់នេះ ក្នុងមួយគ្រួសារត្រូវទទួលបានអង្ករចំនួន៥០គីឡូក្រាម សារុងចំនួន១ និងថវិកាមួួយចំនួនសម្រាប់ឱកាសបុណ្យចូលឆ្នាំ ។ ប្រជាពលរដ្ឋទាំង១០គ្រួសារ បានថ្លែងអំណរគុណដល់សប្បុរជនទាំងអស់ដែលបានជួយឧបត្តម្ភដល់ក្រុមគ្រួសាររបស់ពួកគាត់ដែលរងគ្រោះដោយអគ្គិភ័យឆាបឆេះលំនៅឋាន សូមឱ្យម្ចាស់ទានជួបប្រទះតែសេចក្តីសុខ និងសេចក្តីចម្រើន ៕
ចែករំលែកព័តមាននេះ