ខេត្តកំពង់ចាម ៖ ថៅកែស្រីលក់ទឹកម្នាក់ត្រូវបានក្រុមចោរមួយក្រុមមានគ្នាមិនតិចជាង២នាក់នោះទេ បានវាយដំធើ្វបាបលើរាងកាយហើយរឹត.កសម្លាប់ញាត់ចូលក្នុងរោងម៉ាស៊ីនបូមទឹកនៅខាងក្រោយផ្ទះ ប្រមូលយកគ្រឿងអលង្ការអស់ជាង៧តម្លឹង លុយមួយចំនួនធំ ម៉ូតូ C125 ស៊េរី២០០៨ មួយគ្រឿង រួចគេចខ្លួនបាត់។
ហេតុការណ៍នៃអំពើប្លន់នេះបានកើតឡើងកាលពីវេលាប្រហែលចន្លោះម៉ោង៣-៤ទៀបភ្លឺថ្ងៃទី១ មេសា ២០១២ ស្ថិតនៅភូមិត្រើង ឃុំមៀន ស្រុកព្រៃឈរ។ ចំណែកកូនតូចៗ២នាក់របស់ថៅកែស្រីនេះ មិនត្រូវបានចោរវាយសម្លាប់បំបិទមាត់ទាំងពូជនោះទេ។ លោកយឹម សុខុន នាយប៉ុស្តិ៍រដ្ឋបាលឃុំមៀន ប្រាប់ឲ្យដឹងថា នៅវេលាម៉ោង៨និង៣០នាទីព្រឹកថ្ងៃទី១ មេសា ជាងសំណង់ឈ្មោះហាន ចំរើន ភេទប្រុស បានដើរទៅខាងក្រោយផ្ទះឈើចាស់ ដើម្បីបញ្ឆេះម៉ាស៊ីនបូមទឹកពេលបើកទ្វារដែកក៏ប្រទះឃើញសពស្ត្រីម្ចាស់ផ្ទះឈ្មោះសុខ ម៉េង នៅក្នុងរោងម៉ាស៊ីនបូមទឹក ដៃជាប់ចំណង និងស្នាមរឹត.កក្នុងសម្លៀកបំពាក់រាត្រី ក៏បង្កឲ្យមានការភ្ញាក់ផ្អើលឆោឡោឡើងតែម្តង។ លោកនាយប៉ុស្តិ៍រដ្ឋបាលឃុំមៀន បានប្រាប់បន្តថា ពេលដែលប្រទះឃើញសពជាងសំណង់ដែលមកស៊ីឈ្មួលធ្វើផ្ទះថ្មឲ្យថៅកែខាងលើ ប្រញាប់រាយការណ៍ប្រាប់សមត្ថកិច្ច។ បន្ទាប់ពីទទួលបានព័ត៌មានលោកវរសេនីយ៍ត្រី នួន សាម៉ន អធិការនគរបាលស្រុកព្រៃឈរបញ្ជាឱ្យដឹកនាំកម្លាំងជំនាញយុត្តិធម៌ស្រុកសហការជាមួយនគរបាលបច្ចេកទេសខេត្តត្រួតទៅពិនិត្យសព។
ក្រោយពេលពិនិត្យសពឃើញមានស្លាកស្នាមបែកចិញ្ចើមរយះហូរឈាម ដៃទាំង២ត្រូវជនល្មើសចង ដោយចំណងខ្សែភ្លើងរឹតយ៉ាងតឹង ឯ.ករឹតនឹងខ្សែលួសដោយឡែកនៅលើភ្លៅខាងឆ្វេងមានស្នាមដានស្បែកជើងឃ្លុប។ លោកឃឹម សុខុន ឱ្យដឹងថា ក្នុងអំពើប្លន់នេះសមត្ថកិច្ចពុំទាន់មានតម្រុយនៅឡើយទេ ៕
ចែករំលែកព័តមាននេះ