ខេត្តកំពង់ឆ្នាំង ៖ បុរសម្នាក់បានត្រូវជន២នាក់បងប្អូនព្រួតគ្នាវាយនិងគប់ដុំថ្ម បណ្តាលឱ្យរបួសបែកក្បាលពីរកន្លែងដេរ៨ថ្នេរ កាលពីវេលាម៉ោង៥និង៣០នាទីល្ងាច ថ្ងៃទី២៧ មីនា នៅក្នុងភូមិក្បាលកន្លង់ ឃុំពាមឆ្កោក ស្រុកជលគិរី ខណៈមានទំនាស់គ្នារឿងលេងបាល់ភ្នាល់ដាក់លុយ ។
បុរសរងគ្រោះឈ្មោះ ហ៊ីម អ៊ឹត អាយុ៣៦ឆ្នាំ មានទីលំនៅក្នុងភូមិ ឃុំ ខាងលើ បានរៀបរាប់ថា មុនពេលកើតហេតុ គាត់បានទៅមើលគេលេងបាល់ទះ ហើយក៏ចាប់លុយភ្នាល់គ្នាជាមួយឈ្មោះ នូ នឿន ដោយចាក់មួយសិត១ម៉ឺនរៀល។ ពេលនោះគាត់ឈ្នះបានពីរសិត ហើយក៏សុំឈប់លេង ប៉ុន្តែឈ្មោះ នូ នឿន មិនព្រមឱ្យឈប់ទេហើយថែមទាំងមិនឱ្យលុយឈ្នះទៀត ទើបគាត់សុំយកតែលុយដើមរបស់គាត់វិញ ។
ក្រោយពីបានលុយហើយ គាត់ក៏ចុះកំពង់ជិះទូក ស្រាប់តែឈ្មោះ នូ នឿន និងឈ្មោះ នូ ណេង ជាបងប្អូនគប់ដុំថ្មសំដៅគាត់ ប៉ុន្តែមិនត្រូវគាត់ទេ គឺត្រូវទូក ទើបគាត់ឡើងមកវិញ ដើម្បីសួរនាំ ស្រាប់តែឈ្មោះ នូ នឿន គប់គាត់១ដុំថ្មត្រូវថ្ងាសរយះដេរ៤ថ្នេរ ចំណែកឈ្មោះនូ ណេង យកដំបងវាយក្បាលគាត់រយះដេរ៤ថ្នេរទៀត លុះប្រពន្ធគាត់ចូលឃាត់ក៏ត្រូវពីរនាក់បងប្អូននោះវាយដែរ ។ ក្រោយមក ប្រពន្ធគាត់ក៏បាននាំគាត់មកមន្ទីរពេទ្យដើម្បីព្យាបាល ៕
ចែករំលែកព័តមាននេះ