រាជធានីភ្នំពេញ ៖ សាលាដំបូងរាជធានីភ្នំពេញ បានសម្រេចឃុំខ្លួនបណ្តោះអាសន្នទៅលើយុវជនកូនអ្នកមានម្នាក់ដាក់ពន្ធនាគារព្រៃសកាលពីរសៀលថ្ងៃទី២៨ មីនា រង់ចាំការសម្រេចអង្គសេចក្តី ដើម្បីផ្តន្ទាទោសតាមផ្លូវច្បាប់ស្តីពីការបង្ក្រាបបទល្មើស គ្រឿងញៀន ។
សំណុំរឿងខាងលើ មានជនសង្ស័យ២នាក់ ម្នាក់ឈ្មោះផូ ផានិត អាយុ២៤ឆ្នាំ និងម្នាក់ទៀតឈ្មោះម៉ី ចាន់ស័ក្តិដា អាយុ២៥ឆ្នាំ ។ ជនសង្ស័យទាំងពីរនាក់ជាសិស្សដូចគ្នា។ តុលាការបានសម្រេចឃុំខ្លួនបណ្តោះអាសន្នទៅលើជនសង្ស័យម្នាក់ឈ្មោះផូ ផានិត តែឈ្មោះម៉ី ចាន់ស័ក្តិដា ពុំបានឃុំខ្លួនទេ ។
លោកវរសេនីយ៍ទោជួន ណារិន្ទ ប្រធានការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញឱ្យដឹងថាកាលពីវេលាម៉ោង៤ទៀបភ្លឺ ថ្ងៃទី២៥ មីនា កម្លាំងល្បាតតាមដងផ្លូវសាធារណៈនៃការិយាល័យនគរបាលព្រហ្មទណ្ឌបានជួបជនសង្ស័យ២នាក់ នៅចំណុចគល់ស្ពានលូទឹកស្អុយ បឹងសាឡាង ដែលពួកគេកំពុងជិះម៉ូតូ១គ្រឿង ម៉ាក SL ពណ៌ទឹកប្រាក់ ។ លោកជួន ណារិន្ទ បន្តថា ដោយមានការសង្ស័យកម្លាំងជំនាញព្រហ្មទណ្ឌរបស់លោកបានសុំការអនុញ្ញាតឃាត់ខ្លួន ដើម្បីឆែកឆេរ ដោយសង្ស័យជាមុខសញ្ញាប្លន់ប្រដាប់អាវុធ ។ ពេលឃាត់ខ្លួនឆែកឆេរ ក៏រកឃើញថ្នាំញៀនប្រភេទម៉ាទឹកកកចំនួន៦កញ្ចប់តូច ដែលពួកគេលាក់ក្រោមកែបម៉ូតូបំណងយកទៅលក់ឱ្យក្រុមក្មេងស្ទាវនៅម្តុំផ្ទះសំណាក់ផ្កាឈូកទិព្វ ត្រង់ម្តុំភ្លើងស្តុបអាងទឹកអូឡាំពិក ។
ក្រោយពីកម្លាំងជំនាញបានស្រាវជ្រាវឃើញថា ជនសង្ស័យផូ ផានិត ជាប់ពាក់ព័ន្ធករណីជួញដូរគ្រឿងញៀន ដែលត្រូវឃុំខ្លួនបណ្តោះអាសន្ន តែឈ្មោះម៉ី ចាន់សក្តិដា ជាប់ពាក់ព័ន្ធករណីរំលោភលើសេចក្តីទុកចិត្ត ដោយយកម៉ូតូរបស់គេម៉ាកស្គូពីគ្រឿងញៀន បែរជាមិនត្រូវបានឃុំខ្លួនទៅវិញ៕
ចែករំលែកព័តមាននេះ