រាជធានីភ្នំពេញ ៖ជនសង្ស័យ២នាក់ ត្រូវប៉ូលិសសង្កាត់ស្វាយប៉ាក រួមទាំងប្រជាពលរដ្ឋនាំគ្នាដេញចាប់បានបន្ទាប់ពីស្ទាក់ផ្លូវប្លន់ម៉ូតូម៉ាកស្គូពី ពីស្ត្រីម្នាក់ តែមិនបានសម្រេច ។ អំពើប្លន់នេះកើតឡើងកាលពីវេលាម៉ោង៥និង៣០នាទីល្ងាចថ្ងៃទី២៨ មីនា នៅចំណុចផ្លូវចូលទីក្រុងរណបហ្គ្រេនភ្នំពេញ ស្ថិតនៅក្រុមទី១៦ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ។ ជនសង្ស័យ ១-ឈ្មោះ យ៉េន ពិសី ភេទប្រុស អាយុ១៦ឆ្នាំ ជាសិស្ស ស្នាក់នៅផ្ទះជួល ក្នុងភូមិផ្សារតូច សង្កាត់ទួលសង្កែ ខណ្ឌឫស្សីកែវ ២-ឈ្មោះ ស៊ន តុលា ភេទប្រុស អាយុ១៦ឆ្នាំ ជាសិស្ស រស់នៅភូមិផ្សារតូច សង្កាត់ទួលសង្កែ ។ ចំណែកម្ចាស់ម៉ូតូ ដែលត្រូវចោរប្លន់ឈ្មោះ ហេង ចាន់ថា ភេទស្រី អាយុ២២ឆ្នាំ រស់នៅផ្ទះលេខ៥៥៤E ផ្លូវលេខ៥៩៨ ភូមិស្វាយប៉ាក ក្បែរកន្លែងកើតហេតុ ។
មន្ត្រីប៉ូលិសប៉ុស្តិ៍ស្វាយប៉ាកឱ្យដឹងថា ជនសង្ស័យ២នាក់នោះបានស្ទាក់ផ្លូវស្ត្រីរងគ្រោះប្លន់យកម៉ូតូម៉ាកស្គូពី ពាក់ស្លាកលេខភ្នំពេញ ១AV ១០១៤ តែត្រូវប៉ូលិសដើរល្បាតចាប់ខ្លួនបានទាំងពីរនាក់ ។
ប្រភពព័ត៌មានឱ្យដឹងថា នាង ហេង ចាន់ថា ជិះម៉ូតូ ដើរលេងលំហែកាយនៅតាមសួនច្បារ ផ្លូវចូលទីក្រុងរណបហ្គ្រេនភ្នំពេញ លុះត្រឡប់ទៅផ្ទះចេញមកវិញបានបន្តិចស្រាប់តែត្រូវជន២នាក់នោះ កំពុងអង្គុយលេងលើសួន ស្ទុះទៅស្ទាក់ផ្លូវចាប់ដៃម៉ូតូ និងវាយគំរាមឱ្យចេញពីម៉ូតូ តែនាងមិនព្រមចុះចេញពីម៉ូតូទេ គឺឱបកម៉ូតូជាប់ ។ ឃើញបែបនោះជនម្នាក់លោតធាក់នាង តែនាងនៅតែក្រាញននាលមិនព្រមចេញ ព្រមទាំងស្រែកចោរៗ។ គាប់ជួនពេលនោះមានប្រជាពលរដ្ឋចំនួន២នាក់ជិះម៉ូតូមួយគ្រឿងទៅដល់ទើបចោរទាំង២នាក់រត់គេចខ្លួន ។ ប្រជាពលរដ្ឋនាំគ្នាដេញចាប់ចោររហូតដល់ផ្លូវលេខ៥៩៨ ទើបកម្លាំងល្បាតរបស់ប៉ុស្តិ៍ស្វាយប៉ាកឃើញជួយចាប់បានចោរទាំងពីររនាក់ រួចបញ្ជូនទៅកាន់ប៉ុស្តិ៍សាកសួរ និងនាំបន្តទៅកាន់អធិការដ្ឋានខណ្ឌឫស្សីកែវ ដើម្បីចាត់ការតាមច្បាប់ ៕
ចែករំលែកព័តមាននេះ