ខេត្តកំពត ៖ សពបុរសមិនស្គាល់អត្តសញ្ញាណម្នាក់ត្រូវបានប្រជាពលរដ្ឋប្រទះឃើញចងកនឹងខ្សែអំបោះសីមាភ្ជាប់នឹងដើមឈើមួយដើមទំហំប៉ុនភ្លៅ នៅក្នុងព្រៃជើងភ្នំខាងក្រោមវត្តគិរីឱសថទឹកជប់ កាលពីវេលាម៉ោង៩និង៣០នាទីព្រឹកថ្ងៃទី២៨ មីនា ២០១២ ស្ថិតក្នុងភូមិស្នំប្រាំពីរ ឃុំមាក់ប្រាង ស្រុកទឹកឈូ ។
យោងតាមសាក្សីប្រាប់ឱ្យដឹងថា នៅវេលាម៉ោងខាងលើ ពួកគាត់បានទៅធ្វើចម្ការនៅក្បែរកន្លែងកើតហេតុ ដោយមានគ្នា២នាក់ ។ ខណៈ កំពុងតែពិនិត្យទុយោទឹកដែលតពីភ្នំគិរីទឹកជប់មកចម្ការដែលពួកគាត់កំពុងថែទាំនោះ ស្រាប់តែមានធំក្លិនស្អុយ រួចក៏សួរគ្នាក្លិនអីក៏ស្អុយម៉្លេះក៏នាំគ្នាដើររកមើលក៏ប្រទះឃើញសពបុរសខាងលើតែម្តង ហើយប្រញាប់ប្រញាល់រាយ ការណ៍ ប្រាប់ប៉ុស្តិ៍រដ្ឋបាលឃុំឱ្យទៅពិនិត្យ ។
សពបុរសរងគ្រោះមានពាក់អាវឆ្នូតដៃវែង ពណ៌ផ្កាឈូក ខោជើងវែង ពណ៌ស្លែ ស្បែកជើងប៉ាត់តាមានឆ្នូតសបួន ដៃស្តាំពាក់អំបោះសីមា ពណ៌ក្រហម ព្រមទាំងពាក់ម៉ាស់ពណ៌ខៀវ ។ តាមការសន្និដ្ឋានរបស់សមត្ថកិច្ចជំនាញថា សពអាចស្លាប់ដោយអំពើឃាតកម្ម ៕
ចែករំលែកព័តមាននេះ