រាជធានីភ្នំពេញ ៖ ព្រឹកថ្ងៃទី២៨ មីនា ២០១២ សាលាខណ្ឌដូនពេញ សហការ ជាមួយមន្ទីរសាធារណការ និងដឹកជញ្ជូនរាជធានីភ្នំពេញ បានធ្វើការផ្សព្វផ្សាយដល់ប្រជាពលរដ្ឋបឹងកក់នៅសាលប្រជុំខណ្ឌដូនពេញ ស្តីពីអនុវត្តផែនការជំហានទី១ ក្នុងការដាក់ប្រព័ន្ធលូ ដើម្បីរំដោះទឹកនៅតំបន់បឹងកក់ ។
ក្នុងកិច្ចប្រជុំដែលមានប្រជាពលរដ្ឋបឹងកក់ ចូលរួមនេះ លោកសាំង ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានលើកឡើងថា សាលារាជធានីភ្នំពេញនឹងអនុវត្តផែនការជំហានទី១ ក្នុងការដាក់ប្រព័ន្ធលូ ដើម្បីរំដោះទឹកនៅតំបន់បឹងកក់ ចាប់ពីថ្ងៃទី២ មេសា ២០១២ ខាងមុខនេះ ដើម្បីជួយបញ្ចៀសការលិចលង់សម្រាប់ប្រជាពលរដ្ឋ ដែលរស់នៅតំបន់នោះ ។ ប្រព័ន្ធលូដែលនឹងត្រូវរៀបចំដាក់នៅតំបន់បឹងកក់ ដើម្បីជួយបញ្ចៀសទឹកនេះ គឺលូមានមុខកាត់ទំហំ១,៥០ម៉ែត្រ ដែលនឹងចាប់ផ្តើមដាក់ពីផ្លូវលេខ៧០ និងផ្លូវលេខកា៥ ។ ក្រោយពីអនុវត្តផែនការជំហានទី១រួចហើយនោះនឹងបន្តអនុវត្តផែនការជំហានទី២ ដែលត្រូវដាក់លូប្រវែង១០០០ម៉ែត្រទៀត ត្រូវចំណាយថវិការបស់សាលារាជធានីភ្នំពេញចំនួន៥០៩.៦០២.០០០រៀល។
នាឱកាសផ្សព្វផ្សាយផែនការជំហានទី១ក្នុងការដាក់ប្រព័ន្ធលូតំបន់បឹងកក់នោះ លោកសុខ សម្បតិ្ត ជំនួយការសម្តេចអគ្គមហាសេនាបតីតេជោ ហ៊ុន សែន និងជាអភិបាលខណ្ឌដូនពេញ បានមានមតិផ្តាំផ្ញើដល់ប្រជាពលរដ្ឋបឹងកក់ ដែលចូលរួមប្រជុំនោះថា ក្នុងការអនុវត្តផែនការជំហានទី១ ក៏ដូចជាជំហានទី២ ដើម្បីដាក់ប្រព័ន្ធលូបញ្ចៀសការលិចលង់ទឹកនៅតំបន់បឹងកក់នេះ សុំឱ្យប្រជាពលរដ្ឋចូលរួមសហការឱ្យបានល្អ និងមានភាពរលូន ហើយបើមានប៉ះពាល់ប្រការណាមួយនោះ បងប្អូនប្រជាពលរដ្ឋ ពិតជាយោគយល់ ហើយលោកសង្ឃឹមថា នឹងមិនមានបាតុភាពណាមួយកើតឡើងនោះទេ ៕
ចែករំលែកព័តមាននេះ