រាជធានីភ្នំពេញ ៖ មានការភ្ញាក់ផ្អើលមួយនិងធ្វើឱ្យកម្លាំងសមត្ថកិច្ចនគរបាលប៉េអឹមរត់ជាន់ជើងគ្នា ខណៈពេលរថយន្តមួយគ្រឿងម៉ាករ៉េវហ្វ័របើកដោយបុរសចំណាស់បានបុកម៉ូតូដឹកនាំក្បួនប្រតិភូអគ្គបញ្ជាការភូមិន្ទថៃនៅចំណុចកែងផ្លូវលេខ៥២ និង១១៤ ស្ថិតក្នុងសង្កាត់ផ្សារថ្មី១ ខណ្ឌដូនពេញ កាលពីវេលាម៉ោង២ និង៥០នាទី ថ្ងៃទី២៨ មីនា ២០១២ បើទោះបីជាមានការឲ្យសញ្ញាបញ្ជាឱ្យឈប់ពីកម្លាំងប៉េអឹម និងនគរបាលការពារនៅចំណុចនោះក៏ដោយ។
នៅក្នុងហេតុការបើករថយន្តបុកម៉ួតូដឹកនាំក្បួនប្រតិភូនេះមិនបណ្តាលឱ្យមានមនុស្សរងរបួសធ្ងន់ធ្ងរនោះទេ គ្រាន់តែម៉ូតូក្បួនខូចខាតផ្នែកខាងឆ្វេង រីឯរថយន្តបែកចង្កៀងស៊ីញ៉ូខាងស្តាំ។កម្លាំងនគរបាលដែលឈរការពារនៅចំណុចកែងផ្លូវលេខ៥១និង១១៤បានឲ្យដឹងថា នៅវេលាម៉ោងជិត៣រសៀល នាថ្ងៃកើតហេតុនោះមានក្បួនប្រតិភូមិអគ្គបញ្ជាការភូមិន្ទថៃដែលមានម៉ូតូបើកផ្លូវដោយប៉េអឹមដែលទើបតែចេញពីអគ្គបញ្ជាការក្រសួងការជាតិ លុះក្បួនមកដល់ចំណុចកែងផ្លូវលេខ៥១ និង១១៤ស្ថិតក្នុងសង្កាត់ផ្សារថ្មី១ ខណ្ឌដូនពេញ ស្រាប់តែមានរថយន្តមួយគ្រឿងម៉ាករ៉េវហ្វ័របើកបរ ដោយបុរសចំណាស់ម្នាក់ និងមានស្រ្តីម្នាក់រួមដំណើរបានបើកតាមផ្លូវលេខ៥១ឆ្ពោះទៅទិសខាងត្បូង ហើយត្រូវកម្លាំងនគរបាលនិងប៉េអឹមការពារគោលដៅនោះលើកសញ្ញាបញ្ជាឲ្យឈប់ ដើម្បីរង់ចាំក្បួនប្រតិភូទៅផុតសិន ។ ក៏ប៉ុន្តែម្ចាស់រថយន្តនៅតែបំពានព្យាយាមបើករំកិលទៅមុខដល់កែងផ្លូវលេខ១១៤ ក៏បុកជាមួយម៉ូតូប៉េអឹមនាំមុខក្បួនប្រតិភូបណ្តាលឲ្យម៉ូតូដួលកណ្តាលថ្នល់។
ភ្លាមៗនោះបណ្តាលឲ្យមានការកកស្ទះចរាចរណ៍តែត្រូវកម្លាំងចំរុះបញ្ចៀសរថយន្តក្បួនប្រតិភូមិឲ្យចេញផុតផងដែរ។ សមត្ថកិច្ចជំនាញនិយាយថា បុរសម្ចាស់រថយន្តមានឈ្មោះលី កៃម៉ាន់ អាយុ៧១ឆ្នាំ ស្នាក់នៅសង្កាត់វាលវង់ ខណ្ឌ៧មករា ក្រោយពីកើតហេតុរថយន្តបង្កត្រូវបញ្ជូនទៅទីបញ្ជាការប៉េអឹមខណ្ឌដូនពេញដើម្បីធ្វើការស្រាវជ្រាវ៕
ចែករំលែកព័តមាននេះ