ខេត្តកំពង់ឆ្នាំង ៖ បុរសម្នាក់បានរងរបួសយ៉ាងធ្ងន់ធ្ងររហូតសន្លប់ជាង១២ម៉ោងហើយ នៅមិនទាន់ដឹងខ្លួនទៀតបន្ទាប់ពីត្រូវជនពុំស្គាល់មុខលួចវាយតាមផ្លូវ ខណៈត្រឡប់មកពីហូបការបងប្អូនវិញ ។ ហេតុការណ៍ស្ទាក់វាយបុរសខាងលើបានកើតឡើងកាលពីវេលាម៉ោង១០និង៣០នាទីយប់ថ្ងៃទី២៧ មីនា នៅតាមផ្លូវស្ថិតក្នុងភូមិទឹកហូត ឃុំទឹកហូត ស្រុករលាប្អៀរ ។
តាមការរៀបរាប់របស់ក្រុមគ្រួសារបានឱ្យដឹងថា ជនរងគ្រោះឈ្មោះលុយ លាវ អាយុ៣១ឆ្នាំ រស់នៅភូមិទឹកហូត ។ នៅថ្ងៃកើតហេតុជនរងគ្រោះបានទៅហូបការបងប្អូននៅចុងភូមិទឹកហូត ហើយក៏នៅរាំលេងកម្សាន្តរហូតដល់យប់ជ្រៅ ទើបត្រឡប់មកផ្ទះវិញ ដោយថ្មើរជើង លុះមកដល់ពាក់កណ្តាលផ្លូវត្រូវជនពុំស្គាល់មុខមួយក្រុមព្រួតវាយរហូតដល់សន្លប់ ហើយត្រូវបានអ្នកភូមិប្រទះឃើញក៏ជួយដឹកទៅសង្គ្រោះនៅមន្ទីរពេទ្យខេត្ត ។ ជនរងគ្រោះត្រូវគេវាយចំក្បាលផ្នែកខាងក្រោយដែលសន្លប់រហូតម៉ោង១២ថ្ងៃត្រង់ថ្ងៃទី២៨ មីនា នេះនៅពុំទាន់ដឹងខ្លួននៅឡើយទេ។
នគរបាលមូលដ្ឋានបានឱ្យដឹងតាមទូរស័ព្ទថា ជនរងគ្រោះពេលរាំធុងបាស់មានទំនាស់ជាមួយជនមួយក្រុមទៀតដោយសាររាំជាន់ជើងគ្នា ទើបបណ្តាលឱ្យគេស្ទាក់វាយបែបនេះ ៕
ចែករំលែកព័តមាននេះ