រាជធានីភ្នំពេញ ៖ កិច្ចប្រជុំមួយបានធ្វើឡើងនៅក្នុងសាលប្រជុំបេឡាជាតិរបបសន្ដិសុខសង្គម ក្រោមអធិបតីលោកកាន់ ម៉ន រដ្ឋលេខាធិការក្រសួងការងារនិងបណ្ដុះបណ្ដាលវិជ្ជាជីវៈដែលផ្ដោតទៅលើវិធានការទប់ស្កាត់ករណីគ្រោះថ្នាក់ពេលធ្វើដំណើររបស់កម្មករនិយោជិត ហើយក្រសួងបានចាត់ទុកគ្រោះថ្នាក់ចរាចរណ៍ទៅលើកម្មករនិយោជិតពេលធ្វើដំណើរថា ជាឃាតករលាក់មុខដ៏សាហាវដែលបានសម្លាប់កម្មករនិយោជិត រួមទាំងប្រជាពលរដ្ឋស្លូតត្រង់ស្ទើរាល់ថ្ងៃ។ ការប្រជុំនេះធ្វើឡើងកាលពីវេលាម៉ោង៨និង៣០នាទីព្រឹកថ្ងៃទី២៨ មីនា ដោយមានការចូលរួមពីនាយកបេឡាជាតិ ប្រធានគណៈកម្មកាសិក្សាស្រាវជ្រាវទប់ស្កាត់ករណីសន្លប់ និងបង្ការគ្រោះថ្នាក់ការងារ និងតំណាងក្រសួងមហាផ្ទៃ តំណាងក្រសួួងសុខាភិបាល និងមន្ដ្រីនគរបាលចរាចរណ៍មកពីស្នងការដ្ឋានរាជធានីភ្នំពេញផងដែរ។
លោកកាន់ ម៉ន បានមានប្រសាសន៍នៅកិច្ចប្រជុំនេះថា កិច្ចប្រជុំថ្ងៃនេះគឺជាការផ្ដួចផ្ដើមពិភាក្សារៀបចំវិធានការទប់ស្កាត់ករណីគ្រោះថ្នាក់ពេលធ្វើដំណើររបស់កម្មករនិយោជិតដោយសហការគ្នាណែនាំនិងផ្សព្វផ្សាយអប់រំបន្ដដល់បងប្អូនកម្មករពិសេស អ្នកបើកបរត្រូវឈរលើស្មារតីទទួលខុសត្រូវខ្ពស់ប្រុងប្រយ័ត្នមិនប្រើគ្រឿងស្រវឹង យោគយល់គ្នាក្នុងនាមជាអ្នកបើកបរដូចគ្នា ត្រួតពិនិត្យយានយន្តរបស់ខ្លួនតាមលក្ខណៈបច្ចេកទេសជាប្រចាំ និងមិនត្រូវផ្ទុកកម្មករនិយោជិតលើសកំណត់ ឬឱ្យកម្មករឈរ ឬតោងដែលងាយនឹងរងគ្រោះថ្នាក់ជាយថាហេតុ ព្រោះនេះជាចំណុចសំខាន់ដែលអ្នកបើកបរត្រូវចូលរួមអនុវត្ដច្បាប់ស្ដីពីចរាចរណ៍ផ្លូវគោក។ លោកកាន់ ម៉ន បានមានប្រសាសន៍បន្ដទៀតថា យោងតាមរបាយការណ៍របស់បេឡាជាតិរបបសន្ដិសុខសង្គមគិតត្រឹមឆ្នាំ២០១១ សមាជិកនៃបេឡាជាតិរបបសន្ដិសុខសង្គមដែលទទួលរងគ្រោះថ្នាក់ក្នុងពេលធ្វើដំណើរសរុប៣.៥៦៥នាក់ ស្រី២.៣៤៨នាក់ ក្នុងនោះរងរបួសស្រាល៣.១៩៤នាក់ ស្រី២.១៧៦នាក់ រងរបួសធ្ងន់៣៣២នាក់ ស្រី១៥៨នាក់ ចំណែកអ្នកស្លាប់សរុប៣៩នាក់ ស្រី១៤នាក់ ។
លោកកាន់ ម៉ន បន្តថា ក្នុងយេៈពេលជិត៣ខែដើមឆ្នាំ២០១២នេះមានសមាជិករបស់បេឡាជាតិរបបសន្ដិសុខសង្គមទទួលរងគ្រោះថ្នាក់ក្នុងពេលធ្វើដំណើរសរុប៦០៤នាក់ ស្រី៣៦៣នាក់ រងរបួសស្រាល៥២២នាក់ ស្រី៣២៧នាក់ រងរបួសធ្ងន់៦៨នាក់ ស្រី៣៣នាក់ ប្រុស៣៥នាក់និងចំណែកអ្នកស្លាប់សរុប១៤នាក់ ស្រី៣នាក់៕
ចែករំលែកព័តមាននេះ