ក្រុងប៉ោយប៉ែត ៖ ទីតាំងផ្ញើម៉ូតូពេលថ្ងៃ ក្នុងបរិវេណកាស៊ីណូ ក្បែរមាត់អូរព្រំដែន និងក្បែរច្រកទ្វារអន្តរជាតិប៉ោយប៉ែត ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ត្រូវគេកត់សម្គាល់ឃើញថា បានក្លាយជាកន្លែងដែលពលករឆ្លងដែនខុសច្បាប់ចូលទៅទឹកដីថៃ ។ នៅចំណុចទីតាំងផ្ញើម៉ូតូក្បែរមាត់អូរព្រំដែននេះ គេបានទទួលផ្ញើម៉ូតូក្នុងមួយថ្ងៃៗពី២០០ទៅ៣០០គ្រឿង លុះពេលយប់គេឃើញមានពលករបាននាំគ្នាឆ្លងដែនចូលទៅដីថៃ នៅចំណុចនោះ ដោយមានជណ្តើរមួយសម្រាប់ឱ្យពលករដើរឆ្លងទៅមក ។
ជាក់ស្តែងនៅវេលាម៉ោងជិត៩យប់់ ថ្ងៃទី២៥ មីនា កន្លងមកគេឃើញមានពលករប្រុសស្រីជាច្រើនបាននាំគ្នាឆ្លងដែនចូលទៅដីថៃ ដោយគ្រប់គ្នា មានស្ពាយនិងយួរកាបូបខោអាវជាប់ខ្លួនទៀតផង ហើយខណៈអ្នកយកព័ត៌មានព្យាយាមសួរនាំពលករទាំងនេះ បែរជាមានបុគ្គលម្នាក់ចេញមុខមិនឱ្យសួរនាំ និងហាមថតរូប ហើយព្រមានចាប់ដកម៉ាស៊ីនថតទៀតផង ។ ជុំវិញបញ្ហាខាងលើនេះ លោកអនុ សេនីយ៍ទោ ឡឹក អូន មន្ត្រីប៉ូលិសអន្តោប្រវេសន៍ទទួលខុសត្រូវនៅចំណុចផ្ញើម៉ូតូជាកន្លែងកើតហេតុបានប្រាប់ថា ដោយសារលោករវល់ទៅហូបការគេទើបមានជនឆ្លៀតឱកាសនាំពលករឆ្លងដែនដោយលោកពុំបានដឹងនោះទេ ។
គេកត់សម្គាល់ថា មួយរយៈនេះ ខណៈដែលជិតដល់រដូវចូលឆ្នាំថ្មីប្រពៃណីជាតិ គេ ឃើញពលករខុសច្បាប់ ត្រូវភាគីថៃចាប់បញ្ជូន ប្រគល់ឱ្យសមត្ថកិច្ចកម្ពុជាតាមច្រកទ្វារអន្តរជាតិប៉ោយប៉ែត កាន់់តែមានចំនួនច្រើនឡើង ដោយក្នុងមួយថ្ងៃៗមាន៥ទៅ៦រថយន្ត មិនក្រោម៣០០នាក់នោះទេ ៕
ចែករំលែកព័តមាននេះ