ខេត្តសៀមរាប ៖ ក្រោមកិច្ចសហការរវាងមន្ទីរព្យាបាលធ្មេញបស្ចិមសាខាខេត្តសៀមរាបជាមួយនឹងសាលាអន្តរជាតិហ៊្វុល ប្រៃ ក្នុងខេត្ត វេទិកាសុខភាពសាធារណៈមួយស្តីពីការថែរក្សាសុខភាពមាត់ធ្មេញ ត្រូវបានប្រារព្ធធ្វើឡើងនៅក្នុងបរិវេណនៃសាលាអន្តរជាតិហ៊្វុលប្រៃនាក្រុងសៀមរាប កាលពីព្រឹកថ្ងៃទី២៤ មីនា កន្លងទៅនេះ ក្រោមអធិបតីភាពលោក ហោ សីុនួន ប្រធានមន្ទីរព្យាបាលធ្មេញបស្ចិមសាខាខេត្តសៀមរាប លោក ស៊ុំ ប៊ុនថន នាយកសាលាអន្តរជាតិហ៊្វុលប្រៃ និងមានការចូលរួមពីសំណាក់ប្រជាពលរដ្ឋ តំណាងមាតាបិតាសិស្ស លោកគ្រូ-អ្នកគ្រូ ព្រមទាំងកុមារសិស្សទាំងពីរភេទសរុបចំនួន៣០០នាក់ ។
លោក ស៊ុំ ប៊ុនថន នាយកសាលាអន្តរជាតិហ៊្វុលប្រៃខេត្តសៀមរាប ថ្លែងឱ្យដឹងថា សាលាអន្តរជាតិហ៊្វុលប្រៃ បានបើកដំណើរការបង្រៀនរយៈពេលជិត៤ឆ្នាំមកហើយ ដោយទទួលបានការគាំទ្រពីសំណាក់ប្រជាពលរដ្ឋក្នុង និងក្រៅស្រុក ហើយបច្ចុប្បន្នសាលាមានគ្រូ២៨នាក់ និងមានសិស្សសរុបជាង៦០០នាក់ ។ ទាក់ទិនវិស័យអប់រំផ្នែកភាសាអង់គ្លេស មានគុណភាពពិតប្រាកដតាមរយៈកម្មវិធីសិក្សាទំនើបៗ ដែលសិក្សាជាមួយនឹងគ្រូខ្មែរ សាស្ត្រាចារ្យបរទេសពោរពេញដោយបទពិសោធន៍។ លោកនាយកសាលាបញ្ជាក់ដែរថា ការរួមសហការរៀបចំឱ្យមានវេទិកាស្តីពីសុខភាពមាត់ធ្មេញ និងលាប Flouride ពីសំណាក់មន្ទីរព្យាបាលធ្មេញបស្ចិមសាខាខេត្តសៀមរាបនេះ គឺជាការយកចិត្តទុកដាក់និងលើកទឹកចិត្តមួយចំពោះសិស្សានុសិស្ស ។
លោក ហោ ស៊ីនួន ប្រធានមន្ទីរព្យាបាលធ្មេញបស្ចិមសាខាខេត្តបានថ្លែងឱ្យដឹងថា មន្ទីរព្យាបាលធ្មេញបស្ចិម គឺជាមន្ទីរព្យាបាលធ្មេញមួយឈានមុខគេនៅកម្ពុជា ដែលផ្តល់នូវសេវាកម្មព្យាបាលសុខភាពមាត់ធ្មេញ ប្រកបដោយគុណភាពខ្ពស់ អនាម័យល្អ សេវាកម្មឈានមុខគេ ។ រហូតមកទល់នឹងពេលនេះមានអាយុកាលរយៈពេល១៣ឆ្នាំហើយ ព្រមទាំងបានទទួលស្គាល់លំដាប់ជាអន្តរជាតិ និងទទួលបានស្តង់ដាអន្តរជាតិ ISO9001-2008ពីចក្រភពអង់គ្លេស ។
ទាក់ទិននឹងសុខភាពមាត់ធ្មេញ មានសារសំខាន់ណាស់ ព្រោះថា ផលវិបាកនៃសុខភាពមាត់ធ្មេញរួមមាន ១-ការឈឺចាប់ ២-ប៉ះពាល់ដល់ការទទួលទានអាហារ ៣-ប៉ះពាល់ដល់ការសិក្សា និងការងារផ្សេងៗ ៤-ប៉ះពាល់ដល់ការប្រាស្រ័យទាក់ទង ៥-ខាតបង់ថវិកា និងពេលវេលា ។ ហើយអត្ថប្រយោជន៍ និងគោលបំណងនៃការរៀបចំឱ្យមានវេទិកាសុខភាពសាធារណៈនេះគឺ ១-ដើម្បីផ្តល់នូវសកម្មភាពសប្បុរសធម៌លើការពិនិត្យសុខភាពមាត់ធ្មេញ និងលាបFlouride ផ្តល់ជូនប្រជាពលរដ្ឋជាមាតាបិតា និងសិស្សក្នុងសាលាដោយឥតគិតថ្លៃ និង២-ដើម្បីលើកកម្ពស់ផ្នែកសុខភាពមាត់ធ្មេញ និងការថែរក្សាឱ្យបានត្រឹមត្រូវតាមវេជ្ជបញ្ជារបស់ទន្តបណ្ឌិត ។
លោកបានសំណូមពរផងដែរដល់ប្រជាពលរដ្ឋ និងកុមារសិស្សទាំងអស់ ធ្វើយ៉ាងណាត្រូវយកចិត្តទុកដាក់ថែរក្សាសុខភាពមាត់ធ្មេញឱ្យបានល្អត្រឹមត្រូវ ជាពិសេសគួរតែទៅជួបទន្តបណ្ឌិតយ៉ាងហោចណាស់៦ខែម្តង។ វេទិកាសាធារណៈស្តីពីការថែរក្សាសុខភាពមាត់ធ្មេញនេះ ក៏មានការផ្តល់នូវរង្វាន់ជូនដល់ក្រុមកុមារសិស្ស ដែលចូលរួមនិងលេងកម្សាន្តផងដែរ ៕
ចែករំលែកព័តមាននេះ