រាជធានីភ្នំពេញ ៖ កាលពីម៉ោង១រំលងអធ្រាត្រថ្ងៃទី២៧ មីនា ក្មេងទំនើង២ក្រុមដេញកាប់ ចាក់គ្នា និងគប់ដុំថ្មដាក់គ្នាយ៉ាងអនាធិបតេយ្យនៅមុខក្លឹបស្ពេស៍ តាមបណ្តោយមហាវិថីព្រះមុនីវង្ស ក្នុងសង្កាត់មិត្តភាព ខណ្ឌ៧មករា ។
ឈ្មោះធី សុធា ភេទប្រុស អាយុ១៨ឆ្នាំ អ្នករត់តុនៅភោជនីយដ្ឋានមួយ ស្នាក់នៅក្រោយវិទ្យាល័យសុធារស ក្នុងសង្កាត់ទន្លេបាសាក់ ខណ្ឌចំការមន ដែលត្រូវកងរាជអាវុធហត្ថឃាត់ខ្លួនឱ្យដឹងថា ក្រុមរបស់គេមានគ្នា៨នាក់ ជិះម៉ូតូ៣គ្រឿងម៉ាកឌ្រីម សេ១២៥ ស៊េរី២០០៨ ម៉ាកឌ្រីម សេ១១០ ស៊េរី២០១២ និងម៉ាកអាយខនទៅអង្គុយលេងនៅមុខណាហ្គាវើល ស្រាប់តែមានជនមួយក្រុមទៀតមានគ្នា៦នាក់ ជិះម៉ូតូទៅរករឿងឈ្លោះប្រកែកជាមួយពួកគេ ហើយបោះពាក្យសម្តីថាបើចង់ជួបពួកគេទៅចាំនៅមុខក្លឹបស្ពេស៍ចុះ ។
ប្រភពដដែលបន្តទៀតថា បន្ទាប់មកពួកគេក៏ទៅចាំក្រុមនោះនៅមុខក្លឹបស្ពេស៍ ។ ពេលឃើញក្រុមនោះចេញពីក្លឹប ពួកគេប្រដាប់ដោយដាវសាមូរ៉ៃ និងកាំបិតបានរត់ទៅដេញកាប់ និងចាក់ បណ្តាលឱ្យរងរបួសម្នាក់ ។ ស្របពេលនោះកងរាជអាវុធហត្ថដើរល្បាតឃើញក៏ដេញតាមចាប់ បណ្តាលឱ្យម៉ូតូឌ្រីម សេ១២៥ ស៊េរី២០០៨ ជិះគ្នា២នាក់ ជ្រុលទៅបុកគំរបលូបាក់ខ្នងក្រោយខ្ទេចបើកទៅមុខលែងរួច និងម្នាក់រត់ទៅជិះម៉ូតូអាយខន នៅសល់តែរូបគេ (ធី សុធា) រត់ទៅពួននៅក្នុងហាង អ៊ីនធើរណេត ក៏ត្រូវកងរាជអាវុធហត្ថចាប់បានយកទៅសាកសួរ ។
ឈ្មោះពេជ្រ សត្យា ភេទប្រុស អាយុ២១ឆ្នាំ ជានិស្សិត និងជាក្រុមម្ខាងទៀត ដែលរងរបួសបែកត្របកភ្នែកស្តាំ និងម្នាក់ទៀតឈ្មោះប៊ុន សុខពិសិដ្ឋ អាយុ២៣ឆ្នាំ ជិះម៉ូតូស្គូពី ទាំងពីរនាក់ស្នាក់នៅផ្ទះជួលក្នុងសង្កាត់ទួលសង្កែ ខណ្ឌឫស្សីកែវ និយាយថា ពួកគេមានគ្នា៦នាក់ មិនបានទៅមុខណាហ្គាវើលដូចពួកបង្ករបួសចោទប្រកាន់ទេ ព្រោះថាពួកគេចេញពីផ្ទះនៅម៉ោង១០យប់ ហើយក៏នាំគ្នាទៅរាំកម្សាន្តនៅក្លឹបស្ពេស៍ ។ ពេលចេញពីក្លឹបវិញ ស្រាប់តែត្រូវក្រុមនោះវាយប្រហារតែម្តង ។
ប្រភពដដែលបន្តថា ពេលពួកគេចូលទៅអង្គុយលើសាឡុងផឹកស៊ី ហើយឡើងរាំកម្សាន្តឃើញក្រុមជនបង្ករបួសនៅអង្គុយសាឡុងជិតគ្នា។ ពេលឡើងរាំក្រុមនោះចេះតែតាមរករឿងពួកគេ ។ បន្ទាប់មកឈ្មោះពេជ្រ សត្យាដើរទៅជល់កែវជាមួយភ្ញៀវដែលអង្គុយនៅសាឡុងជិតក្រុមជនបង្ករបួស ហើយក្រុមភ្ញៀវនោះក៏ស្គាល់ក្រុមបង្ករបួសដែរ និងបានជល់កែវជុំគ្នា ។ ឈ្មោះពេជ្រ សត្យា បាននិយាយទៅកាន់ក្រុមបង្ករបួសថា «សុទ្ធតែគ្នាឯងទេ កុំប្រកាន់អី» រួចក៏ត្រឡប់ទៅអង្គុយរៀងខ្លួនវិញ ។ លុះពេលរាំបន្តទៀតស្រាប់តែបាត់ក្រុមបង្ករបួសពីលើសាឡុងអស់រលីងនៅសល់តែនារីម្នាក់អង្គុយនៅលើសាឡុងនោះ ។
ប្រភពដដែលបន្តថា បន្ទាប់ពីពួកគេគិតលុយរួចរាល់ ហើយដើរចេញប្រុងទៅយករថយន្ត និងម៉ូតូ ស្រាប់តែត្រូវជនបង្ករបួសស្ទុះទៅកាប់ និងចាក់ធ្វើឱ្យពួកគេរត់ប្រសាចតែម្តង។ ស្របពេលក្រុមទាំងពីរកំពុងប៉ះទង្គិចគ្នានោះយុវជនឈ្មោះហេង កក្កដា ដែលដើរចេញពីក្នុងក្លឹបក៏ត្រូវគេគប់ដុំថ្មចំបណ្តាលឱ្យរងរបួសដែរ ។ ជនបង្ករបួសដែលកងរាជអាវុធហត្ថឃាត់ខ្លួនបានម្នាក់នោះ និងម៉ូតូដែលខូចខាតត្រូវនគរបាលរក្សាទុកនៅប៉ុស្តិ៍អូរឫស្សីទី៤ ៕
ចែករំលែកព័តមាននេះ