រាជធានីភ្នំពេញ ៖ ជនសង្ស័យពីរនាក់ប្រុសស្រីត្រូវប្រជាពលរដ្ឋចាប់ឃាត់ខ្លួនប្រគល់ឱ្យនគរបាលចាត់ការតាមផ្លូវច្បាប់បន្ទាប់ពីជននោះរួមដៃគ្នាធ្វើសកម្មភាពលួចកាបូបលុយរបស់ស្រ្តីម្នាក់នៅតូបលក់ខោអាវលេខF1.070 ក្នុងផ្សារធំថ្មី ស្ថិតក្នុងសង្កាត់ផ្សារថ្មី១ ខណ្ឌដូនពេញ កាលពីវេលាម៉ោង៦ និង៣០នាទីល្ងាច ថ្ងៃទី២៧ មីនាឆ្នាំ២០១២ ហើយព្យាយាមរត់គេចខ្លួន ។
យោងតាមរបាយការណ៍របស់នគរបាលបានឱ្យដឹងថា មុនពេលកើតហេតុមានក្រុមស្ទាវប្រុសស្រីចំនួន៤នាក់បានចូលក្នុងផ្សារធំថ្មី ហើយធ្វើសកម្មភាពបន្លំលួចកាបូបលុយ ពីស្រ្តីម្នាក់ដែលកំពុងតែឈរទិញខោអាវនៅតូបលេខអេហ្វ១.០៧០ ពេលនោះម្ចាស់តូបឃើញទាន់ក៏ស្រែកឆោឡោឡើង ។ ភ្លាមៗក្រុមក្មេងស្ទាវទាំងនោះ យល់សភាពការណ៍មិនស្រួលបាននាំគ្នារត់គេចខ្លួន តែស្រីជំទង់ស្ទាវម្នាក់ ត្រូវប្រជាពលរដ្ឋឃាត់ខ្លួនបាននៅកន្លែងកើតហេតុ ទើបឈានទៅចាប់បក្សពួកវាបន្ថែមម្នាក់ទៀត នៅម្តុំផ្សារ
ទំនើបសូរិយាហើយប្រគល់ឱ្យនគរបាលប្រចាំការក្នុងផ្សារធំថ្មីចាត់ការតាមផ្លូវច្បាប់ ។
មន្រ្តីនគរបាលបានឱ្យដឹងថា ជនសង្ស័យលួចកាបូបលុយក្នុងផ្សារធំថ្មីដែលអស់លក្ខណ៍ត្រូវ បានឃាត់ខ្លួននោះម្នាក់ឈ្មោះកែវពិសី ភេទស្រីអាយុ១៧ឆ្នាំ ស្នាក់នៅផ្ទះលេខ១០៣ ផ្លូវលេខ២០៣ សង្កាត់ផ្សារដេប៉ូ២ ខណ្ឌទួលគោក និងម្នាក់ទៀតឈ្មោះភួង វិសាល ភេទប្រុស អាយុ២០ឆ្នាំ ស្នាក់នៅផ្ទះលេខ១១ ផ្លូវលេខ២១៣ សង្កាត់វាលវង់ ខណ្ឌ៧មករា ៕
ចែករំលែកព័តមាននេះ