ខេត្តកំពង់ចាម៖ ក្រុមនិស្សិតស្ម័គ្រចិត្តមកពីប្រទេសជប៉ុនចំនួន១៦នាក់ មានប្រុសស្រី បាននាំគ្នាបញ្ចេញពលកម្មយ៉ាងសស្រាក់សស្រាំកាយដីបង្ហាប់ទីលានតារាងបាល់ទាត់ថ្មីដែលទើបនឹងបង្កើតនៅក្នុងបរិវេណអង្គការបណ្តុះបណ្តាលដើម្បីអភិវឌ្ឍន៍ធនធានមនុស្ស(T.D.O) ដែលមានទីតាំងស្ថិតនៅភូមិឡឥដ្ឋ សង្កាត់បឹង កុក ក្រុងកំពង់ចាម ។ សកម្មភាពនេះបានធ្វើឡើងកាលពីរសៀលថ្ងៃទី២៧ មីនា ២០១២ ដើម្បីត្រៀមប្រកួតបាល់ទាត់ជាមិត្តភាពកម្ពុជា-ជប៉ុនផងដែរ ។
តាមលោក ឃុន ចាន់ថុល ជំនួយការលោក ហ៊ុន ស៊ាងហុង អតីតសិស្សពូកែមកពីប្រទេសជប៉ុននិងជាប្រធានអង្គការ T.D.O ប្រាប់ឲ្យដឹងថា ដោយសារតែមើលឃើញប្រទេសជប៉ុនដែល មានការរីកចម្រើន ពិសេសខាងគ្រឿងអេឡិចត្រូនិក សូម្បីតែវិស័យសិក្សាធិការអប់រំក៏មានសន្ទុះខ្លាំងក្លា ហើយត្រូវបាននិស្សិតគ្រប់ជាតិសាសន៍មកពីតាមបណ្តាប្រទេសនានាលើសាកលលោកទៅក្រេបជញ្ជក់យកចំណេះដឹងតាមជំនាញរៀងៗខ្លួនសម្រាប់់យកទៅអភិវឌ្ឍន៍នៅប្រទេសរបស់គេវិញ ។
លោកឃុន ចាន់ថុល បន្តថា កន្លងទៅថ្មីៗនេះ លោកហ៊ុន ស៊ាងហុង និងលោកស៊ាង ប៊ុនលាង ទីប្រឹក្សាផ្ទាល់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាទីប្រឹក្សាក្រសួងមហាផ្ទៃ ព្រមទាំងទីប្រឹក្សាពិសេសរបស់អង្កការT.D.O បានទិញដីបង្កើតឡឥដ្ឋមួយ នៅភូមិឡឥដ្ឋ សង្កាត់បឹងកុកដែលមានទំហំដីធំទូលាយ សម្រាប់បង្កលក្ខណៈងាយស្រួលនៅពេលណាដែលអង្គការរបស់លោកត្រូវសាងសង់សាលារៀនត្រូវតែដឹកឥដ្ឋពីទីនេះទៅ ។ ចំណែកក្នុងពេលអនាគត នឹងត្រូវជ្រើសរើសក្មេងកំព្រាឪពុកម្តាយ ឬមានជីវភាពយ៉ាប់យឺុនមកបណ្តុះបណ្តាលរៀនសូត្រនៅក្នុងមណ្ឌលដើម្បីឲ្យមានអនាគត ។
លោកឃុន ចាន់ថុល បន្តទៀតថា ដោយសារឃើញទង្វើដ៏ល្អប្រពៃដើម្បីការរីកចម្រើននៅក្នុងសង្គមជាតិលោកNakata Shoma ប្រធាន អង្គការC.U.E នៅប្រទេសជប៉ុន បានបរិច្ចាគ ធនធានចំនួន១៥.០០០ដុល្លារ សម្រាប់ជួយ កសាងតារាងបាល់ទាត់នៅក្នុងបរិវេណរបស់អង្គការT.D.O ក្រុងកំពង់ចាម ។ ស្របពេលកំពុងដំណើរការសាងសង់ជិតរួចរាល់នោះ ក្រុម និស្សិតប្រុស-ស្រីចំនួន១៦នាក់មកពីមហាវិទ្យាល័យនៅប្រទេសជប៉ុនបានជួយកាយដីពង្រាយបង្ហាប់នៅទីលានតារាងបាល់ទាត់ ដោយចាប់ផ្តើមដំណើរការពីថ្ងៃទី២៥ មីនា និងបន្តរហូតដល់ថ្ងៃទី២៩ មីនា ២០១២ ។
លោកឃុន ចាន់ថុល បានបញ្ជាក់ថា នៅព្រឹកថ្ងៃទី២៨ មីនា មានការប្រកួតបាល់ទាត់ជាលក្ខណៈមិត្តភាពរវាងសិស្សនៅអនុវិទ្យាល័យស្មោង ស្រុកកំចាយមារ ខេត្តព្រៃវែងជាមួយនឹងក្រុមនិស្សិតជប៉ុនជាការបង្ហាញនូវបទពិសោធន៍ទៅវិញទៅមកដើម្បីឲ្យមានការរីកចម្រើន ។លោកហ៊ុន ស៊ាងហុង ប្រធានអង្គការT.D.Oជាអតីតក្មេងកំព្រាឪពុកម្តាយដែលធ្លាប់រៀនសូត្រនៅវិទ្យាល័យព្រះសីហនុ ក្រុងកំពង់ចាម មានការតស៊ូពុះពាររាល់ការលំបាកទទួលបានជោគជ័យនិងរៀនបានពូកែ ត្រូវបានមិត្តភក្តិរួមថ្នាក់ស្រឡាញ់រាប់អាន ។ មានការកត់សម្គាល់ថា គ្រាន់តែទឹកប្រាក់សប្បុរសជនមកពីប្រទេសជប៉ុនសម្រាប់់កសាងហេដ្ឋារចនាសម្ព័ន្ធនានាក្នុងប្រទេសកម្ពុជា តាមរយៈលោកប្រធានអង្គការនេះមានមិនតិចជាង១លានដុល្លារនោះទេ ៕
ចែករំលែកព័តមាននេះ