រាជធានីភ្នំពេញ ៖ យុវជនម្នាក់រយះបាតដៃជិតដាច់មេដៃខាងឆ្វេង ខណៈចោរម្នាក់ហៅជិះឌុបយកទៅធ្វើសកម្មភាពប្រុងប្លន់យកម៉ូតូឌ្រីមសេ១២៥ ស៊េរី២០១០ ពណ៌ខ្មៅ ប៉ុន្ដែប្រវាយប្រតប់គ្នាមិនឈ្នះជនរងគ្រោះ រត់គេចចូលព្រៃបាត់ស្រមោល កាលពីវេលាម៉ោង៧និង១០នាទីយប់ថ្ងៃទី២៧ មីនា នៅតាមផ្លូវណរប្រ៊ីត ស្ថិតក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ ។
ជនរងគ្រោះមានឈ្មោះតុង ស៊ីថា ភេទប្រុស អាយុ២៣ឆ្នាំ ជាជាងកាត់ខោអាវ ស្នាក់នៅផ្ទះជួលក្នុងសង្កាត់ស្ទឹងមានជ័យ ខណ្ឌមានជ័យ មានស្រុកកំណើតភូមិបូពល ឃុំព្រៃរំដេង ស្រុកគិរីវង្ស ខេត្ដតាកែវ ឱ្យដឹងថា ពេលទំនេរពីការងារខ្លួនតែងឆ្លៀតពេលរត់ម៉ូតូឌុប ។ ប្រភពដដែលបន្ដថា នៅយប់កើតហេតុខ្លួនបានជិះម៉ូតូចេញពីផ្ទះឆ្ពោះទៅផ្សារហេង លី តាមផ្លូវលេខ២៧១ ខណៈជិះទៅដល់មុខផ្ទះសំណាក់អង្គរបុរី ស្រាប់តែមានមនុស្សប្រុសម្នាក់មានអាយុប្រហាក់ប្រហែលនឹងខ្លួនដែរ បានហៅឱ្យឌុបទៅកន្លែងវាយកូនគោលនៅតាមផ្លូវណរប្រ៊ីត ។
ប្រភពបានបន្ដទៀតថា លុះមកដល់ចំណុចកើតហេតុស្រាប់តែចោរម្នាក់នោះយកកាំបិតចុងស្រួចដកចេញទៅចាក់លើខ្លួន ប៉ុន្ដែចាប់ជាប់ទើបបណ្ដាលឱ្យមុតរយះបាតដៃជិតដាច់មេដៃ ហើយបានប្រវាយប្រតប់ទៅវិញទៅមក ។ ភ្លាមៗនោះចោរទំនងជាតដៃមិនឈ្នះក៏រត់គេចខ្លួនចូលព្រៃបាត់ស្រមោលទៅ៕
ចែករំលែកព័តមាននេះ