រាជធានីភ្នំពេញ ៖ និស្សិតស្រីម្នាក់ជាកូនអ្នកមាន ត្រូវបានចោរលួចចាក់សោយករថយន្តម៉ាកកាមរីស៊េរី២០០៧ ហាយប្រ៊ីដទៅបាត់ ខណៈនាងអង្គុយញ៉ាំប្រហិតចៀន-ពងទាកូន នៅទីប្រជុំជនអ៊ូអរ តាមផ្លូវលេខ៣៥៧ ភូមិដើមមក្លឿ សង្កាត់ច្បារអំពៅទី១ ខណ្ឌមានជ័យ បង្កឱ្យមានការភ្ញាក់ផ្អើល និងសោកស្តាយយ៉ាងខ្លាំងកាលពីវេលាម៉ោង៥ និង៣០នាទីល្ងាច ថ្ងៃទី២៧ មីនា ២០១២ ។
នារីម្ចាស់រថយន្តឈ្មោះសេរី សុភាវី អាយុ២០ឆ្នាំ ជាកូនអ្នកមានស្តុកស្តម្ភម្នាក់ ក្នុងរាជធានី ភ្នំពេញ ចំណែករថយន្តដែលចោរលួចយ៉ាងព្រហើន និងលឿនមិនគួរឱ្យជឿនោះ ម៉ាកកាមរី ហាយប្រ៊ីដ ស៊េរីឆ្នាំ២០០៧ ពណ៌ស្ករ ពាក់ស្លាកលេខភ្នំពេញ 2U 7576 ។ តាមប្រភពព័ត៌មានពីកន្លែងកើេតហេតុបានឱ្យដឹងថា មុនដំបូងនាងស្រស់ស្អាត និស្សិតម្នាក់នេះ បើករថយន្តចូលមកសំចតនៅកន្លែងកើតហេតុ ខាងលើ គឺទុកនៅឆ្ងាយពីខ្លួនប្រមាណ១០០ម៉ែត្រ មើលឃើញជ្រងងោៗ ហើយនាងចូលទៅញ៉ាំប្រហិតចៀន ពងទាកូន… ភ្លេចខ្លួនប្រមាណ២០នាទី ពេលងាកសម្លឹងមកមើលរថយន្ត ស្រាប់តែបាត់ឈឹងតែម្តង ។
កញ្ញាម្ចាស់រថយន្តសម្តែងភាពស្រឡាំងកាំងផ្អើលឆោឡោ ប្រញាប់ទៅប្តឹងប៉ូលិស និងចាកចេញទៅផ្ទះបាត់ទៅ …។ ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ