ខេត្តបន្ទាយមានជ័យ ៖ បុរសម្នាក់ជាប់សង្ស័យពីបទបង្កហិង្សាបណ្តាលឱ្យមនុស្សម្នាក់ ស្លាប់ ត្រូវនគរបាលស្រុកមង្គលបុរីចំនួន១៧នាក់ ដឹកនាំដោយលោកវរសេនីយ៍ត្រី យ៉ត សុផល អធិការស្រុកហ៊ុមព័ទ្ធចាប់ខ្លួនកាលពីវេលាម៉ោង៩ព្រឹកថ្ងៃទី២៦ មីនា នៅភូមិចម្ការចេក ឃុំរហាត់ទឹក ស្រុកមង្គលបុរី ។
លោកវរសេនីយ៍ត្រី យ៉ត សុផល ឱ្យដឹងថា ជនជាប់ចោទឈ្មោះ ឈាន វង់ អាយុ២៧ឆ្នាំ រស់នៅភូមិចំការចេក បានចាប់ឈ្មោះ នុត ភិន ភេទប្រុស អាយុ៤៨ឆ្នាំ នៅភូមិជាមួយគ្នា និងជាមាជីដូនមួយ អុកនឹងជង្គង់ត្រង់ដើមទ្រូងចំនួន២ជង្គង់បណ្តាលឱ្យស្លាប់ ។ ឈ្មោះ ឈាន វង់ ធ្វើបែបនោះ ព្រោះខឹងដាស់ នុត ភិន មិនព្រមក្រោក ពេលស្រវឹងដេកតាមផ្លូវ ។
លោកអធិការនគរបាលស្រុកបន្តថា សាក្សីប្រាប់សមត្ថកិច្ចថា ឈ្មោះ នុត ភិន តាមទម្លាប់របស់គាត់ឱ្យតែស្រវឹង គឺដេកតាមផ្លូវ ឬក៏តាមផ្ទះសាច់ញាតិក្នុងភូមិ ។ ដោយឡែកកាលពីវេលាម៉ោង៦ល្ងាចថ្ងៃទី២៥ មីនា មិនដឹងគាត់មកពីផឹកឯណាទេ ដើរទ្រេតទ្រោត ហើយដេកតាមផ្លូវ។ ឃើញបែបនោះឈ្មោះ ឈាន វង់ បានដើរទៅដាស់ តែគាត់នៅក្រាញននាលមិនព្រមងើបទេ។ ដោយឈាន វង់ អត់ទ្រាំមិនបានក៏ចាប់អុកនឹងជង្គង់ចំនួន២ជង្គង់ រួចអៀវយកទៅ ដាក់ឱ្យដេកលើគ្រែក្រោមផ្ទះឈ្មោះ ងួន សំរិទ្ធ ហៅ ម៉ៅ ។ បន្ទាប់មកនៅព្រឹកម៉ោង៩ថ្ងៃទី២៦ មីនា ឈ្មោះ សយ លឹម ឃើញបុរស នុត ភិន ស្លាប់បាត់ទៅហើយ ។
លោកអធិការបញ្ជាក់ថា បន្ទាប់ពីទទួលបានព័ត៌មានភ្លាម លោកដឹកនាំសមត្ថកិច្ចចំនួន១៧នាក់ ទៅហ៊ុមព័ទ្ធផ្ទះ ឈ្មោះ នុត វង់ ដែលបម្រុងរត់គេចខ្លួនក្រោយពីដឹងថា មាជីដូនមួយរបស់ខ្លួនស្លាប់ ។ សមត្ថកិច្ចឃាត់ខ្លួនជនជាប់ចោទទាន់ពេល បញ្ជូននៅអធិការដ្ឋាននគរបាលស្រុក ដើម្បីរៀបចំសំណុំរឿងបញ្ជូនទៅស្នងការដ្ឋាននគរបាលខេត្ត ចាត់ការបន្ត ៕
ចែករំលែកព័តមាននេះ