រាជធានីភ្នំពេញ ៖ ចោរឆក់ម្នាក់ក្នុងចំណោមគ្នា២នាក់ត្រូវបានប៉ូលិសខណ្ឌទួលគោកស្ទាក់ចាប់បានជាក់ស្ដែងនៅមុខវិទ្យាល័យជាស៊ីមសាមគ្គីក្រោយពីជននេះធ្វើសកម្មភាពឆក់កាបូបស្ដ្រីលក់ស្រាបៀរម្នាក់ ខណៈកំពុងជិះម៉ូតូតាមបណ្ដោយផ្លូវ២៧១ ក្នុងសង្កាត់ទឹកល្អក់១ ខណ្ឌទួលគោក កាលពីវេលាម៉ោង៧និង១៥នាទីយប់ថ្ងៃទី២៦ មីនា ២០១២។
ជនសង្ស័យមានឈ្មោះពៅ ចាន់តារា ភេទប្រុស អាយុ១៨ឆ្នាំ ស្នាក់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ។ ចំណែកឯស្ដ្រីរងគ្រោះឈ្មោះឌួង សុភ័ក្រ អាយុ២៩ឆ្នាំ ជាអ្នកលក់ស្រាបៀរ មានទីលំនៅក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ។ តាមការឱ្យដឹងពីស្ដ្រីរងគ្រោះថា មុនពេលកើតហេតុគាត់បានជិះម៉ូតូម៉ាក់ស្តេប តាមបណ្ដោយផ្លូវ២៧១ពីត្បូងទៅជើង ។ លុះមកដល់ចំណុចកើតហេតុ ស្រាប់តែមានជនសង្ស័យ២នាក់ជិះម៉ូតូមួយគ្រឿងម៉ាកវីវ៉ាមកអែប ហើយអ្នកជិះពីក្រោយបានឆក់យកកាបូបដែលព្យួរនៅនឹងដៃម៉ូតូគាត់ក៏ភ្ញាក់ ហើយស្រែកចោរៗ ខណៈនោះប៉ូលិសព្រហ្មទណ្ឌឃើញ ក៏ដេញតាម ដោយពួកវាបើករត់តាមបណ្ដោយផ្លូវ២៧១ ពេលនោះប៉ូលិសអន្ដរាគមន៍ឈរជើងនៅប៉ុស្ដ៍២៤ម៉ោងមុខវិទ្យាល័យជាស៊ីមសាមគ្គី ឮតាមរយៈវិទ្យុទាក់ទង ក៏ចេញមកកាក ។
ភ្លាមៗនោះក្រុមចោរឃើញប៉ូលិសបម្រុងជិះគេចចូលផ្លូវលំតូច បែរជាទៅបុកថូផ្កា បណ្ដាលឱ្យដួលក៏ត្រូវប៉ូលិសអន្ដរាគមន៍ក្របួចចាប់បានម្នាក់ ឯម្នាក់ទៀតបានរត់ចូលទៅក្រោយវិទ្យាល័យជាស៊ីមសាមគ្គីគេចខ្លួនបាត់៕
ចែករំលែកព័តមាននេះ