រាជធានីភ្នំពេញ ៖ អំពើហិង្សាមួយបានកើតឡើងដែលបង្កដោយបុគ្គលិកពេទ្យឯកជនមួយល្បីខាង កាប់ឆៅនៅទួលគោកស្រវឹងធ្លាក់ភ្នែកមានគូកនបួនប្រាំនាក់ខ្លះដោះអាវ ខ្លះពាក់អាវមិនសមជាពេទ្យបានវាយដំទៅលើប្រជាជនពីរនាក់ បណ្តាលឲ្យបែកក្បាលហូរឈាមកក្លាក់ ព្រោះតែខឹងប្រជាជនមិនឲ្យយកជនរងគ្រោះក្នុងហេតុការណ៍គ្រោះថ្នាក់ចរា ចរណ៍នៅចំណុចកែងផ្លូវលេខ១៣ និងផ្លូវលេខ១៣៦ ស្ថិតក្នុងសង្កាត់ផ្សារកណ្តាល១ ខណ្ឌដូនពេញ កាលពីវេលាម៉ោង៣និង៥០នាទីទៀបភ្លឺថ្ងៃទី២៧ មីនា ២០១២។
អំពើ ហិង្សានេះត្រូវប្រជាជនដែលឃើញហេតុការណ៍មិនអាចទទួលយកបានក៏នាំគ្នា ចោមរោមវាយតបតទៅលើជនអគតិទាំងនោះរហូតដណ្តើមបានវិទ្យុទាក់ទងមួយគ្រឿង (អាយឌី) និងច្រវាក់មួយខ្សែប្រវែងមួយមែ៉ត្រប្រគល់ឲ្យនគរបាល។ ប្រជាជនដែលក្តៅប្រហាយ និងបុគ្គលិកពេទ្យឯកជនអនាធិបតេយ្យប្រើអំពើហិង្សាលើប្រជាជន ព្រោះខឹងមិនឲ្យយកអ្នករបួសក្នុងគ្រោះថ្នាក់ចរាចរណ៍ដាក់ក្នុងរថយន្ត របស់ខ្លួននោះបានរៀបរាប់ឲ្យកាសែតកោះសន្តិភាពដឹងថា មុនពេលផ្ទុះអំពើហិង្សានេះមានករណីគ្រោះថ្នាក់ចរាចរណ៍រវាងម៉ូតូម៉ាក ត្រៃ និងម៉ូតូវ៉េវអាល់ហ្វានៅចំណុចកែងផ្លូវលេខ១៣៦ និងលេខ១៣ ស្ថិតក្នុងសង្កាត់ផ្សារកណ្តាល១ ខណ្ឌដូនពេញ នៅវេលាម៉ោង៣និង៥០នាទីទៀបភ្លឺថ្ងៃទី២៧ មីនា បណ្តាលឲ្យភាគីម៉ូតូរងរបួសទាំងសងខាង។
បន្តិចក្រោយមកក៏មាន រថយន្តពេទ្យឯកជនមួយគ្រឿងគ្មានស្លាកលេខតែមានបិទលេខទូរស័ព្ទ ០៩៧ ៩០០ ៩០៩០ បានមកដល់ចំណុចកើតហេតុបើកទ្វាររថយន្តឃើញមានបុគ្គលិកបួន នាក់ខ្លះពាក់អាវខ្លះដោះអាវ ហើយស្ថិតក្នុងភាពស្រវឹងធ្លាក់ភ្នែកនាំគ្នាលើកជនរងគ្រោះដាក់រថយន្ត ទាំងគ្មានជំនាញជាពេទ្យបន្តិចណាសោះ។ ពេលនោះត្រូវបានប្រជាជនដែលឈរមើលគ្រោះថ្នាក់ចរាចរណ៍នាំគ្នា រារាំងមិនឲ្យយកជនរងគ្រោះដាក់ក្នុងរថយន្តពេទ្យត្រឹមត្រូវអត់ ជំនាញនោះទេ ទំនងជាគាត់យល់ឃើញថា ពេទ្យស្អីស្រវឹងធ្លាក់ភ្នែកគ្មានឯកសណ្ឋានជាគ្រូពេទ្យត្រឹមត្រូវ ខ្លះពាក់អាវខ្លះដោះអាវចាប់ជនរងគ្រោះបញ្ចូលរថយន្តដូចចោរប្លន់អ៊ីចឹង។ ឃើញមានការរារាំងពីសំណាក់ប្រជាជន ស្រាប់តែពួកខាងរថយន្តពេទ្យបាននាំគ្នាប្រើអំពើហិង្សាយកច្រវាក់ ប្រវែងមួយម៉ែត្រ និងអាយឌីវាយទៅលើប្រជាជនទាំងកំរោល បណ្តាលឲ្យបុរសពីរនាក់បែកក្បាលហូរឈាមកក្លាក់ជោកអាវ ព្រមទាំងស្រែកឲ្យបក្សពួកទៅយកកាំភ្លើងអាកាមកបាញ់សម្លាប់ប្រជាជនដែល រារាំងពួកគេទៀតផង។
បុរសម្នាក់ទំនងជាមន្រ្តីរាជការក៏បាននិយាយ ថា ភ្លាមៗនោះប្រជាជនជាច្រើននាក់ខ្លះជាអ្នករត់ម៉ូតូឌុបខ្លះ ជាអ្នករត់រ៉ឺម៉កម៉ូតូបានផ្ទុះកំហឹងឡើងចូលទៅវាយតបតលើបុគ្គលិក រថយន្តពេទ្យឯកជនអនាធិបតេយ្យ បណ្តាលឲ្យបុគ្គលិកពេទ្យអគតិទាំងនោះនាំគ្នារត់ចូលរថយន្ត បើកគេចទៅបាត់គួរឱ្យជិនឆ្អន់ ។ ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ