អតីតរដ្ឋមន្ត្រីការបរទេសអូស្ត្រាលីកត់សំគាល់ថា កម្ពុជាកំពុងរីកលូតលាស់
ដោយ ៖ អប្សរា
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១០:១៧
ច័ន្ទថា
លោក Gareth Evans អតីតរដ្ឋមន្ត្រីក្រសួងការបរទេសអូស្ត្រាលី បានជំរាបសម្តេចតេជោ
រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន បានប្រាប់ឱ្យដឹងថា លោក Gareth Evans អតីតរដ្ឋមន្ត្រីក្រសួងការបរទេសអូស្ត្រាលី បានជំរាបសម្តេចតេជោនាយករដ្ឋមន្ត្រីថា ដំណើរទស្សនកិច្ចរបស់លោកមកកាន់ព្រះរាជាណាចក្រកម្ពុជានៅពេលនេះ គឺដើម្បីចូលរួមកិច្ចសន្ទនាអាស៊ីលីង-កម្ពុជា២០១០ ដើម្បីស្វែងយល់រវាងគ្នានិងគ្នា រវាងកម្ពុជា-អូស្ត្រាលី និងតំបន់ផ្សេងៗទៀត ព្រមទាំងអ្នកចូលរួមសំខាន់ៗផ្សេងទៀតដើម្បីឱ្យមានការយល់គ្នាទៅវិញទៅមកកាន់តែខ្លាំងឡើង ។
លោកអ៊ាង សុផល្លែត ប្រាប់ឱ្យដឹងបែបនេះនារសៀលថ្ងៃទី៣ ខែកញ្ញា ក្នុងឱកាសដែលលោកអតីតរដ្ឋមន្ត្រីក្រសួងការបរទេសអូស្ត្រាលី អញ្ជើញចូលជួបសំដែងការគួរសមជាមួយសម្តេចតេជោនាយករដ្ឋមន្ត្រីនៅទីស្តីការគណៈរដ្ឋមន្ត្រី ខណៈដែលលោកមកបំពេញទស្សនកិច្ចនៅព្រះរាជាណាចក្រកម្ពុជា ។ លោក Gareth Evans បានអបអរសាទរចំពោះសម្តេចតេជោនាយករដ្ឋមន្ត្រី ហ៊ុន សែន ដែលបានដឹកនាំព្រះរាជាណាចក្រកម្ពុជាឱ្យមានការរីកចំរើនយ៉ាងខ្លាំង ទាំងវិស័យសេដ្ឋកិច្ច នយោបាយ ស្ថិរភាព សន្តិសុខសង្គម ។ លោករំព្ញកថា លោកបានមកកាន់ព្រះរាជាណាចក្រកម្ពុជាកាលពីឆ្នាំ២០០៣ ហើយរហូតមកដល់ពេលនេះ កម្ពុជាកំពុងតែមានការរីកចំរើនលូតលាស់គួរឱ្យកត់សំគាល់ជាទីបំផុត ។
សម្តេចតេជោនាយករដ្ឋមន្ត្រី ហ៊ុន សែន បានថ្លែងអំណរគុណចំពោះលោក Gareth Evans ដែលកន្លងមកបានជួយដល់កម្ពុជា គឺសុខសន្តិភាពរបស់កម្ពុជា ដែលបានទទួលមក គឺមិនអាចកាត់ផ្តាច់បានអំពីការចូលរួមចំណែករបស់លោកឡើយ ។ សម្តេចបានថ្លែងអំណរគុណដល់ការប្រឹងប្រែងរបស់លោក Gareth Evans ក្នុងការនាំអាស៊ីលីង មកពិភាក្សានៅក្នុងព្រះរាជាណាចក្រកម្ពុជាផងដែរ ។ លោក Gareth Evans ជាមន្ត្រីការបរទេសអូស្ត្រាលីមួយរូបដែលបានយកចិត្តទុកដាក់ពីសង្គ្រាមស៊ីវិលនៅកម្ពុជា ក្នុងទសវត្សទី៨០ ហើយលោកបានដាក់ស្នើរូបមន្តក្នុងការដោះស្រាយបញ្ហាកម្ពុជានៅអង្គការសហប្រជាជាតិ ដែលរូបមន្តរបស់លោកនេះហើយបានដាស់អង្រួននៅអង្គការសហប្រជាជាតិឱ្យភ្ញាក់ពីដំណេកស្តីពីបញ្ហាកម្ពុជារហូតដល់អង្គការកំពូលក្នុងពិភពលោកនេះចូលមករៀបចំការបោះឆ្នោតនៅកម្ពុជានាឆ្នាំ១៩៩៣ និងបានដាក់អាជ្ញាធរ "អ៊ុនតាក់" នៅកម្ពុជាដើម្បីរៀបចំការបោះឆ្នោត ៕
