«យ៉ូដា» ឆ្កែដ៏អាក្រក់បំផុតនៅលើពិភពលោកបានងាប់នៅក្នុងអាយុ១៥ឆ្នាំ កាលពីថ្ងៃ សៅរ៍ទី១៧ មីនា ក្រោយពីកាន់តំណែងនោះ មិនបានមួយឆ្នាំផង ។ យ៉ូដា ឈ្នះលើការប្រកួតឆ្កែអាក្រក់បំផុតនៅលើពិភពលោក ប្រចាំឆ្នាំ២០១១ ដែលរៀបចំឡើងនៅទីក្រុងប៉េតាលូម៉ា រដ្ឋកាលីហ្វ័រនីញ៉ា សហរដ្ឋអាេមរិក កាលពីខែមិថុនា ២០១១ ទទួលប្រាក់រង្វាន់១០០០ដុល្លារ និងពានជើងឯកធំជាងខ្លួនវាដល់ទៅ១៥ដងឯណោះ ។
ឆ្កែដែលមានលក្ខណៈចម្លែក គឺមានរោមបះ មានអណ្តាតលៀនចេញខាងក្រៅ និងជើងវែង ប៉ុន្តែគ្មានរោម និងមានទម្ងន់៨០០ក្រាម ធ្លាប់រស់នៅដ៏ពិបាក នៅមុនពេលដែលលោកធើរី ស៊ូម៉ាកហ្គើ អ្នករស់ក្នុងទីក្រុងហេនហ្វត រដ្ឋកាលីហ្វ័រនីញ៉ា ប្រទះឃើញវា ត្រូវគេបោះបង់ចោលនៅឯអគារមួយ ។ ពីដំបូង ម្ចាស់នឹកស្មានថា វាជាកណ្តុរ ព្រោះមានដងខ្លួនតូច ហើយបានយកទៅទៅចិញ្ចឹម ។ ក្រោយពេលយ៉ូដាទទួលរង្វាន់ជាឆ្កែដ៏អាក្រក់បំផុតនៅលើពិភពលោក ក៏ទទួលភាពល្បីល្បាញ និងបានបង្ហាញមុខនៅក្នុងទូរទស្សន៍ ។
លោកវិកហ្គើរ ដឺអាម៉ន គណៈកម្មការរៀបចំការប្រកួតឆ្កែអាក្រក់បំផុតនៅលើពិភពលោកបានឱ្យដឹងថា ទោះបីជាយូ៉ដាងាប់ ប៉ុន្តែកេរ្តិ៍ឈ្មោះរបស់វានៅតែស្ថិតនៅលើពិភពលោកបន្តទៀត ដរាបណាមានការប្រកួតជាថ្មីដែលធ្វើឡើងនៅខែមិថុនាខាងមុខ ៕
ចែករំលែកព័តមាននេះ