រាជធានីភ្នំពេញ ៖ ក្មេងប្រុសជំទង់ម្នាក់ជិះម៉ូតូលឿនពេកចាប់ហ្វ្រាំងមុខដួលបោកក្បាលម្នាក់ឯង ខណៈធ្វើដំណើរចេញពីរៀនភាសាអង់គ្លេសត្រូវជនមិនស្គាល់មុខ២នាក់ជិះម៉ូតូស្រែកហៅឱ្យឈប់ហើយដេញតាម និងគប់ដុំថ្មត្រូវឆ្អឹងជំនីរខាងឆ្វេង។ ហេតុការណ៍នេះកើតឡើងកាលពីវេលាម៉ោង៦និង៥០នាទីយប់ ថ្ងៃទី៩ មីនា នៅមុខភោជនីយដ្ឋានណាំទ្រា ត្រង់ចំណុចផ្លូវលេខ១៦៣កែងផ្លូវលេខ៤៨០ ក្នុងសង្កាត់ទួលទំពូងទី១ ខណ្ឌចំការមន ។
ជនរងគ្រោះឈ្មោះអាង សុវណ្ណរតនា ភេទប្រុស អាយុ១៥ឆ្នាំ ជាសិស្សថ្នាក់ទី៩ ស្នាក់នៅផ្ទះលេខ១០២ ផ្លូវ៣២BT សង្កាត់បឹងទំពុន ខណ្ឌមានជ័យ បានប្រាប់សមត្ថកិច្ចឱ្យដឹងថា នៅវេលាម៉ោងខាងលើ រូបគេចេញពីរៀនភាសាអង់គ្លេសនៅវិទ្យាស្ថានប៊ែលធីអន្ដរជាតិ សាខាផ្សារដើមថ្កូវ ខណៈជិះម៉ូតូសេ១២៥ ស៊េរី២០១១ ពណ៌ខ្មៅ ចេញពីរៀន ស្រាប់តែមានជនមិនស្គាល់មុខ២នាក់ ជិះម៉ូតូសេ១២៥ ពណ៌ខ្មៅ ស្រែកហៅឱ្យឈប់ ប៉ុន្ដែខ្លួនមិនព្រមឈប់ពួកគេក៏ជិះម៉ូតូដេញតាម ហើយយកដុំថ្មគប់បណ្ដាលឱ្យត្រូវឆ្អឹងជំនីរខាងឆ្វេង រហូតមកដល់មុខភោជនីយដ្ឋានណាំទ្រាមានពិធីមង្គលការដោយមានមនុស្សច្រើនខ្លួនក៏ជាន់ហ្វ្រាំងប្រថុចញុច បណ្តាលឱ្យដួលម៉ូតូបោកក្បាលនឹងថ្នល់តែម្ដង។ ចំណែកជនមិនស្គាល់មុខ២នាក់នោះបានបើកម៉ូតូគេចបាត់ទៅ ។
ទោះបីជាយ៉ាងណា ករណីនេះមិនដឹងថា ជារឿងតាមប្លន់យកម៉ូតូ ឬជារឿងគំនុំទេ សមត្ថកិច្ចកំពុងស្រាវជ្រាវបន្ដទៀតដើម្បីឱ្យដឹងថា បណ្ដាលមកពីមូលហេតុអីពិតប្រាកដ ៕
ចែករំលែកព័តមាននេះ