ខេត្តតាកែវ ៖ នារសៀលថ្ងៃទី២៣ កុម្ភៈ កន្លងមកនៅទីលានបាល់ទាត់សាលាគរុកោសល្យ និងវិក្រិតការខេត្តមន្ទីរអប់រំយុវជននិងកីឡាខេត្ត បានរៀបចំបើកការប្រកួតកីឡា
សិស្សមធ្យមសិក្សា ជ្រើសរើសជើងឯកប្រចាំឆ្នាំ២០១២ ក្រោមអធិបតីលោក ឡាយ វណ្ណៈ អភិបាលរងខេត្ត ដោយមានការអញ្ជើញចូលរួមពីលោក នុត ខុន ប្រធានមន្ទីរអប់រំយុវជននិងកីឡាខេត្ត លោក ប្រធាន-អនុប្រធានមន្ទីរជុំវិញខេត្តគណៈប្រតិភូដឹកនាំ ក្រុមកីឡាករ កីឡាការិនី និងទស្សនិកជនយ៉ាងកុះករ ។
លោក នុត ខុន ប្រធានមន្ទីរអប់រំយុវជននិងកីឡាខេត្តឱ្យដឹងថា ការប្រកួតកីឡាសិស្សមធ្យមសិក្សាជ្រើសរើសជើងឯកប្រចាំឆ្នាំ២០១២នេះ មានកីឡាករ កីឡាការិនីមកពីកម្រងមធ្យមសិក្សាស្រុក៩ ក្រុង១ លើវិញ្ញាសា បាល់ទាត់ បាល់ទះ បាល់បោះ អត្តពលកម្ម ប៉េតង់(ប៊ូល) និងប្រណាំងកង់ ដែលមានកីឡាករ កីឡាការិនីចូលរួមប្រកួតសរុប៩៣២នាក់ (ស្រី៤២៩នាក់) ។ ចំណែកប្រតិភូដឹកនាំកីឡាករមាន១៥០នាក់(ស្រី៧នាក់) ។ លោកប្រធានមន្ទីរបានបន្តទៀតថា ចំពោះបាល់ទាត់ បុរសមាន១០ក្រុម នារី៨ក្រុម បាល់ទះបុរសមាន១០ក្រុម។
នារី៨ក្រុម បាល់បោះបុរស៨ក្រុម នារី៧ក្រុម អត្តពលកម្មដើរបុរស៧ក្រុម នារី៨ក្រុម រត់ចង្ងាយបុរស៨ក្រុម នារី៨ក្រុម រត់ល្បឿនបុរស៨ក្រុម នារី៨ក្រុម លោតកម្ពស់បុរស៨ក្រុម នារី៨ក្រុម លោតចំងាយបុរស៩ក្រុម នារី៨ក្រុម។ ចោលដុំដែកបុរស៨ក្រុម នារី៩ក្រុម ប្រណាំងកង់បុរស៨ក្រុម នារី៨ក្រុម ប៉េតង់១ទល់១ បុរស៨ក្រុម នារី៩ក្រុម ២ទល់២ បុរស ៩ក្រុម នារី៨ក្រុម ៣ទល់៣ បុរស៨ក្រុម នារី៨ក្រុម ។
លោក ឡាយ វណ្ណៈ អភិបាលរងខេត្តមានប្រសាសន៍ថាការប្រកួតកីឡាសិស្សមធ្សមសិក្សាជ្រើសរើសជើងឯកប្រចាំឆ្នាំនេះពិតជាមានសារសំខាន់ណាស ់ក្នុងការទ្រទ្រង់វិស័យកីឡាឱ្យកាន់តែមានសកម្មភាពផុលផុស និងលើកកម្ពស់សមត្ថភាពរបស់ក្មួយៗទាំងអស់កាន់តែប្រសើរឡើង ហើយអ្នកទទួលបានជ័យជន្នះនឹងមានឱកាសទៅប្រកួតថ្នាក់ជាតិនៅខេត្តកំពតនាពេលខាងមុខឆាប់ៗនេះ ។ លោកអភិបាលរងខេត្តបានបន្តថា គឺក្មួយៗត្រូវយល់ថា ដើម្បីឱ្យជីវិតរបស់យើងមានអនាគតភ្លឹស្វាង ក្មួយៗត្រូវប្រកាន់ខ្ជាប់នូវឥរិយាបថល្អ និងឱ្យតម្លៃខ្លួនឯង ធ្វើជាម្ចាស់ការលើខ្លួនឯង ។
កត្តាទាំងនេះហើយនាំមកនូវសារសំខាន់ដែលយើងគ្រប់គ្នានិយាយថា កីឡាធ្វើឱ្យរាងកាយយើងមាំមួន សុខភាពល្អ មានភាពរហ័សរហួន មានបញ្ញាស្មារតីវាងវៃ និងសាមគ្គីល្អ។ ទន្ទឹមនឹងលេងកីឡា សូមក្មួយៗ ជៀសឱ្យផុតពីគ្រឿងញៀន ត្រូវខិតខំរៀនសូត្រដើម្បីចាប់យកជំនាញណាមួយសម្រាប់ចិញ្ចឹមជីវិតទៅថ្ងៃអនាគត ៕
ចែករំលែកព័តមាននេះ