រាជធានីភ្នំពេញ ៖ លោកជំទាវប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បាននាំយកអំណោយទៅចែកជូនដល់ប្រជាពលរដ្ឋខ្មែរអ៊ិស្លាមជាជនចាស់ជរា គ្មានទីពឹង អ្នកផ្ទុកមេរោគអេដស៍ កុមារកំព្រានិងជនពិការចំនួន១.០៣៧គ្រួសារមកពីខណ្ឌមានជ័យ និងខណ្ឌឫស្សីកែវ ។ ពិធីចែកអំណោយនេះធ្វើឡើងកាលពីថ្ងៃទី៥ កញ្ញានៅក្នុងបរិវេណអនុវិទ្យាល័យហ៊ុន សែន ព្រែកប្រា ។ អំណោយទាំងនោះក្នុងមួយគ្រួសារៗ ទទួលបានអង្ករ៣០គីឡូក្រាម ត្រីខ៥កំប៉ុង សារុង១ ក្រមា១ មុង១ ភួយ១ និងទឹកបរិសុទ្ធឱរ៉ាល់១កេស ។ លើសពីនេះជនពិការចំនួន៧នាក់ទៀតម្នាក់ៗ ទទួលបានរទេះជនពិការមួយគ្រឿង ។ កាកបាទក្រហមកម្ពុជាទទួលបានថវិកាពីសប្បុរសជននានាដើម្បីទិញជាស្បៀង និងសំភារទាំងនោះចែកជូនដល់ប្រជាពលរដ្ឋ ។ ចំពោះទឹកបរិសុទ្ធឱរ៉ាល់ជាអំណោយរបស់កាកបាទក្រហមកម្ពុជាសាខារាជធានីភ្នំពេញឯរទេះជនពិការជាអំណោយរបស់ក្រុមហ៊ុន ABC TISSUE PRODUC TION PTY.Ltd មកពីប្រទេសអូស្ត្រាលី ។
នៅក្នុងឱកាសនោះលោកជំទាវប៊ុន រ៉ានី ហ៊ុន សែន បានអំពាវនាវប្រជាពលរដ្ឋទាំងអស់ឱ្យខិតខំអប់រំណែនាំកូនៗឱ្យរស់នៅមានសីលធម៌ ចេះគោរពស្រលាញ់ចាស់ទុំ គ្រូបង្រៀន មិត្តភក្តិ បើរស់នៅអត់សីលធម៌ពួកគេនឹងក្លាយទៅជាជនពាល ប្រើប្រាស់គ្រឿងញៀន ប្រើប្រាស់អំពើហិង្សាដើម្បីដោះស្រាយទំនាស់ ។ លោកជំទាវបានអំពាវនាវដល់បុរសៗទាំងអស់កុំឱ្យចូលចិត្តប្រឡែងលេងនឹងល្បែងស្នេហាក្រៅផ្ទះ ដែលនាំឱ្យចំលងមេរោគអេដស៍ចូលផ្ទះសំលាប់ប្រពន្ធកូន និងខ្លួនឯង ធ្វើឱ្យគ្រួសារវិនាសសូន្យ និងសូមបុរសកុំប្រើអំពើហិង្សាក្នុងគ្រួសារធ្វើឱ្យប្រពន្ធកូនខ្មាសញាតិមិត្តជិតខាង ។ អំពើហិង្សាមិនមែនជាមធ្យោបាយដោះស្រាយបញ្ហាទេ ផ្ទុយទៅវិញវាកាន់តែបន្ថែមបញ្ហាមួយជាន់ទៀតធ្វើឱ្យបញ្ហាជាន់លើបញ្ហាកាន់តែមិនអាចដោះស្រាយបាន ។
លោកជំទាវប៊ុន រ៉ានី ហ៊ុន សែន បន្តថា រចនាសម្ព័ន្ធកាកបាទក្រហមមានរហូតទៅដល់ថ្នាក់ស្រុក ថ្នាក់ខណ្ឌទៅហើយ ដូច្នេះអាជ្ញាធរដែនដីមិនត្រូវទុកឱ្យប្រជាពលរដ្ឋណាម្នាក់ស្លាប់ដោយអត់បាយទេ ។ កាលដើមឡើយប្រជាពលរដ្ឋជនបទតែងតែបន់ស្រន់ដល់ទេវតាសុំទឹកភ្លៀងដើម្បីធ្វើស្រែចំការបង្កបង្កើនផល តែបច្ចុប្បន្នគេឃើញមានទេវតារស់កំពុងរស់នៅជាមួយប្រជាពលរដ្ឋ ជួយប្រជាពលរដ្ឋធ្វើឱ្យមានទឹកគ្រប់រដូវទៅដល់វាលស្រែនៅតាមប្រឡាយនានានៅជនបទ ។ ទេវតាទាំងនោះគឺគ្មាននរណាក្រៅពីសម្តេចទាំងបីរបស់គណបក្សប្រជាជនទេដែលបានជួយធ្វើឱ្យមានទឹកនៅតាមប្រឡាយសំរាប់ឱ្យប្រជាជនបង្កបង្កើនផល ៕
ចែករំលែកព័តមាននេះ