កីឡាករតឺន្នីសលំដាប់ទី១ពិភពលោកណូវ៉ាក់ យ៉ូកូវិចបានឈ្នះពានរង្វាន់កិត្តិយស Laureus World Sportsman of the Yearប្រចាំឆ្នាំ២០១១ដែលកម្មវិធីប្រគល់ពានត្រូវបានរៀបចំធ្វើនៅទីក្រុងឡុង ប្រទេសអង់គ្លេសកាលពីថ្ងៃទី៦ខែកុម្ភៈ ។ ឆ្នាំកន្លងមក យ៉ូកូវិចបានយកឈ្នះពានជើងឯកក្របខណ្ឌធំចំនួន៣។ គេបានយកឈ្នះ៤១ប្រកួតបន្តបន្ទាប់គ្នានិងស្គាល់ពាក្យថាចាញ់តែ៦លើកប៉ុណ្ណោះ ។ ពានរង្វាន់ធំដែលគេបានយកឈ្នះមានដូចជា Australian Open, Wimbledonនិង U.S Open។ គេបានចាប់ផ្តើមរដូវកាលថ្មីជាមួយនឹងការឈ្នះពានជើងឯកនៅទីក្រុង Melbourne។
ថ្លែងក្នុងពេលទទួលពានរង្វាន់កិត្តិយសលើកនេះ យ៉ូកូវិចបានថ្លែងថា៖«អ្វីដែលលេចធ្លោបំផុតសម្រាប់ខ្ញុំគឺជួបជុំជាមួយរាល់បណ្តាជនល្បីឈ្មោះក្នុងវិស័យកីឡានិងមានឱកាសបានផ្លាស់ប្តូរបទពិសោធន៍និងរឿងរ៉ាវក្នុងជីវិតជាមួយគ្នា។ វាជាបទពិសោធន៍ដ៏ភ្ញាក់ផ្អើលមួយដែលខ្ញុំមិនអាចបំភ្លេចបាន។ គ្រប់គ្នានៅទីនេះគឺសុទ្ធតែជាមនុស្សពិសេស។ ខ្ញុំគោរពពួកគេទាំងអស់នោះជាពិសេសលើស្នាដៃដែលពួកគេសម្រេចបាន»។
កីឡាករស៊ែប៊ីរូបនេះបាននិយាយថា គោលបំណងរបស់ខ្លួនក្នុងពេលឥឡូវនេះគឺធ្វើឱ្យបានដូចជាកីឡាករអូស្ត្រាលី Rod Laverដែលបានយកឈ្នះពានក្របខណ្ឌធំចំនួន២ក្នុងមួយឆ្នាំ។ គេបាននិយាយថា៖«វាពិតជាកិច្ចការដ៏លំបាកមួយតែវាធ្វើឱ្យរំភើបរីករាយ។ វាធ្វើឱ្យព្រឺសំបុរ»។ ចំណែកកីឡាវាយកូនហ្គោលវិញ ម៉ាក អ៊ីលរ៉យមកពីអៀរឡង់ឈ្នះពាន Breakthrough of the Yearខណៈដែលកីឡាករមិត្តរួមជាតិរបស់គេ ដារិន ក្លាកឈ្នះពានComeback of the Year។ អត្តពលិករត់ប្រណាំងរបស់កេនយ៉ានាង Vivian Cheruiyotដែលជាម្ចាស់ពានពិភព លោករត់ចម្ងាយ ៥ពាន់និង១០ពាន់ម៉ែត្រឈ្នះពានរង្វាន់កីឡាការិនីឆ្នើមSportswoman’s Award ៕
ចែករំលែកព័តមាននេះ