ទីបំផុតកញ្ចប់ថវិកា៦លាននិង១សែនដុល្លារអាមេរិកនៃកម្មវិធីប្រកួតWaste Management Phoenix Openត្រូវបានវាយបំបែកដោយកីឡាករម្ចាស់ផ្ទះអាមេរិកKyle Stanley។ នៅលើទីលានប្រកួតក្នុងទីក្រុងScottsdaleរដ្ឋអារីហ្សូណាកាលពីថ្ងៃអាទិត្យទី៥កុម្ភៈ កីឡាករStanleyបានវេចយកទៅផ្ទះវិញនូវទឹកប្រាក់រង្វាន់១លាននិងជិត១០ម៉ឺនដុល្លារ បន្ទាប់ពីបានយកឈ្នះជើងឯកក្នុងលទ្ធផលសរុប ១៥អាន់ឌ័រ ២៦៩។
ជ័យជម្នះនេះបានកើតឡើងបន្ទាប់ពីគេធ្វើបាន៦ អាន់ឌ័រប៉ា ៦៥បន្ថែមទៀតក្នុងជុំផ្តាច់ព្រ័ត្រ។ គេបានថ្លែងថា ៖«ខ្ញុំពិតជាមិនដឹងថា ឥឡូវនេះខ្ញុំកំពុងគិតពីអ្វីឡើយ ។ អ្វីដែលចាំបាច់តែមួយគត់គឺផ្តោតលើការប្រកួត ខ្ញុំចាំបាច់ត្រូវតែទុកលទ្ធផលកាលពីសប្តាហ៍មុនមួយឡែកសិន»។ ពេលនោះ Stanleyបានយំសាជាថ្មី តែការយំក្នុងពេលនេះគឺយំដោយក្តីរំភើបចិត្តនឹងជ័យជម្នះ។ កីឡាករអាមេរិករូបនេះបានបន្តថា៖«ខ្ញុំសូមថ្លែងអំណរគុណដល់អ្នកម្តាយនិងលោកឪពុករបស់ខ្ញុំ ។ពួកគាត់បានធ្វើរឿងជាច្រើនសម្រាប់ខ្ញុំ។ ខ្ញុំមិនអាចរកពាក្យអ្វីមកថ្លែងបានទេ»។
ចំណាត់ថ្នាក់លេខ២បានទៅលើកីឡាករ Ben Crane។ Craneឆ្លងកាត់៤ជុំប្រកួតធ្វើបានលទ្ធផលសរុប ១៤អាន់ឌ័រ ២៧០ នាំមុខ១សត់លើកីឡាករ Spencer Levin។ Levinឆ្លងកាត់៤ជុំប្រកួតដណ្តើមបានចំណាត់ថ្នាក់លេខ៣ស្ទួនជាមួយលទ្ធផលសរុប១៣អាន់ឌ័រ ២៧១។ ជាច្រើនឆ្នាំមកនេះ កីឡាករ Levinពុំធ្លាប់បានយកឈ្នះពានជើងឯក PGA Tourណាមួយនៅឡើយទេ ។ អំឡុងការប្រកួត គេដណ្តើមបានការនាំមុខលេខ១ស្ទួនក្រោយធ្វើបាន១បឺឌីនៅឡូទី១៤។ តែជាអកុសលគេធ្វើមិនបានល្អនៅឡូទី១៥ដែលមាន៥ប៉ា ។
កីឡាករ Stanleyបាននិយាយថា៖«ខ្ញុំពិតជាសោកស្តាយចំពោះកីឡាករ Levin។ យើងពិតជាមិនចង់ជូនពរឱ្យកីឡាករណាម្នាក់ទទួលលទ្ធផលបែបនេះទេ។ គេគឺជាកីឡាករជើងខ្លាំងម្នាក់ ។ ខ្ញុំសោកស្តាយខ្លាំងណាស់ »។ កីឡាករអាមេរិក Phil Mickelsonបញ្ចប់ការប្រកួតស្ថិតនៅចំណាត់ថ្នាក់លេខ២៦ស្ទួនបន្ទាប់ពីធ្វើបានលទ្ធផលសរុប ៦អាន់ឌ័រ ២៧៨។ ចំណែកទឹកប្រាក់រង្វាន់វិញ កីឡាករBen និង Crane(លេខ២)ទទួលបានជាង៦៥ម៉ឺនដុល្លារ។ ឯកីឡាករ Spencer Levin(លេខ៣)ទទួលបានជាង៤១ម៉ឺនដុល្លារ ៕
ចែករំលែកព័តមាននេះ