កីឡាករបែលហ្ស៊ិកថំ ប៊ូណិនបានបើករដូវកាលប្រណាំងឆ្នាំថ្មីរបស់ខ្លួនជាមួយជ័យជម្នះក្នុងដំណាក់បើកឆាកកម្មវិធី Tour of Qatar ឆ្នាំ2012កាលពីថ្ងៃអាទិត្យទី៥ កុម្ភៈ កន្លងមក។ ការប្រណាំងក្នុងដំណាក់នេះត្រូវបានបញ្ចប់នៅទីលានវាយកូនហ្គោល Doha Golf Club ស្ថិតក្នុងទីក្រុងដូហា ប្រទេសកាតា។ ប៊ូណិនដែលជាអ្នកជិះកង់ឱ្យក្រុមOmega Pharma-QuickStepបានយកឈ្នះដំណាក់ដែលមានចម្ងាយផ្លូវ១៤២,៥គីឡូម៉ែត្រចេញដំណើរពីទីក្រុងBarzan Towersឆ្ពោះទៅកាន់ទីលានវាយកូនហ្គោល Doha Golf Clubស្ថិតក្នុងទីក្រុងដូហាប្រទេសកាតាដោយប្រើអស់ថិរវេលា៣ម៉ោង១១នាទីនិង៣២វិនាទីយកឈ្នះកីឡាករជើងខ្លាំងរបស់អង់គ្លេស Adam Blythe ដែលជិះឱ្យក្រុម BMC Racing Teamនិងបានយកឈ្នះកីឡាករស្លូវ៉ាគី Peter Saganជិះឱ្យក្រុម Liquigas-Cannondaleដែលទាំងពីរនាក់បានប្រើថិរវេលាច្រើនជាងស្មើៗគ្នា ។
ថ្លែងបន្ទាប់ពីទទួលបានជ័យជម្នះកីឡាករប៊ូណិនបានបញ្ជាក់ដោយក្តីរីករាយថា៖«ខ្ញុំមានជំនឿចិត្តថា ខ្លួនឯងនៅតែអាចចូលរួមប្រកួតប្រជែងជាមួយបណ្តាកីឡាករខ្លាំងៗបាន។ កាលពីឆ្នាំទៅមិញ ខ្ញុំកំពុងតែសម្រាកព្យាបាលរបួសជើងឆ្វេង។ របួសនោះបានធ្វើឱ្យខ្ញុំខាតពេលអស់ជាច្រើនខែ។ បន្ទាប់ពីនោះមក ខ្ញុំក៏បានរងគ្រោះម្តងទៀតដោយបាក់ឆ្អឹងដៃនៅអំឡុងការប្រណាំងកម្មវិធី Tour of Spain។ ប៉ុន្តែក្នុងពេលនេះ អ្វីលែងកើតមានលើខ្លួនខ្ញុំទៀតហើយ។ ទីបំផុតខ្ញុំបានរួចផុតពីរបួសទាំងអស់ »។
អតីតជើងឯកពិភពលោករូបនេះបានថ្លែងទៀតថា ខ្លួនពិតជាមានការភ្ញាក់ផ្អើលខ្លាំងដែលដណ្តើមបានជ័យជម្នះក្នុងថ្ងៃអាទិត្យ។ ប៊ូណិននិយាយថា ខ្លួនបានចំណាយពេលតែ៣ម៉ោងប៉ុណ្ណោះធ្វើដំណើរមកដល់ប្រទេសកាតា ។ ឯនៅលើតារាងពេលវេលាសរុបវិញ បន្ទាប់ពីបញ្ចប់ដំណាក់ទី១នេះ កីឡាករប៊ូណិនស្ថិតនៅលំដាប់លើគេដោយប្រើថិរវេលាសរុបអស់៣ម៉ោង ១១នាទីនិង២២វិនាទីនាំមុខកីឡាករអង់គ្លេស Adam Blytheដែលប្រើអស់ថិរវេលាច្រើនជាង៤វិនាទី។ ចំណែកកីឡាករស្លូវ៉ាគី Peter Sagan ជិះឱ្យក្រុម Liquigas-Cannondaleស្ថិតនៅលំដាប់ទី៣ដោយប្រើអស់ថិរវេលាច្រើនជាង៦វិនាទី។
សូមបញ្ជាក់ថា ការប្រណាំងកម្មវិធី Tour of Qatarឆ្នាំ2012នេះចែកចេញជា៦ដំណាក់និងមានចម្ងាយផ្លូវសរុប៧២៧,៣គីឡូម៉ែត្រ។ ដោយឡែកដំណាក់ទី២ដែលជាដំណាក់បន្តមានចម្ងាយផ្លូវ១១,៣គីឡូម៉ែត្រប៉ុណ្ណោះដោយការប្រណាំអធ្វើនៅជុំវិញទីក្រុងទើបបង្កើតថ្មីឈ្មោះ Lusailស្ថិតនៅភាគខាងជើងទីក្រុងដូហាប្រទេសកាតាប្រហែលជា១៥គីឡូម៉ែត្រ ៕
ចែករំលែកព័តមាននេះ