អ្នកទទួលខុសត្រូវប៉ាឡេស្ទីនម្នាក់អះអាងកាលពីថ្ងៃទី៦ កុម្ភៈ ថា ប្រធានាធិបតីប៉ាឡេស្ទីន លោកម៉ាមូដ អាប់បាស់ នឹងដឹកនាំរដ្ឋាភិបាលបណ្តោះអាសន្នមួយរហូតដល់ការបោះឆ្នោត ។ នេះបើតាមកិច្ចព្រមព្រៀងមួយរវាងចលនាហ្វាតាហ៍របស់លោក និងក្រុមហាម៉ាស់។ អ្នកទទួលខុសត្រូវរូបនេះ ដែលចូលរួមក្នុងកិច្ចប្រជុំអន្តរប៉ាឡេស្ទីននៅក្រុងដូហា បញ្ជាក់ថា ភាគីទាំង២បានព្រមព្រៀងគ្នាថា លោកប្រធានាធិបតីអាប់បាស់ នឹងដឹកនាំរដ្ឋាភិបាលស្រុះស្រួលជាតិមួយដែលរួមមានពួកអ្នកឯករាជ្យ និងពួកអ្នកបច្ចេកទេសទទួលបន្ទុកត្រួតពិនិត្យការបោះឆ្នោត។
កិច្ចប្រជុំរវាងលោកអាប់បាស់ និងប្រមុខក្រុមហាម៉ាស់ លោកខាឡេដ មីចាអាល់ ប្រព្រឹត្តទៅនៅក្រុងដូហា ក្រោមការឧបត្ថម្ភរបស់បណ្តាអ្នកទទួលខុសត្រូវកាតា ដែលចូលរួមយ៉ាងសកម្មក្នុងការបង្រួបបង្រួមប៉ាឡេស្ទីន ។ កិច្ចប្រជុំថ្មីគ្រោងធ្វើនាព្រឹកថ្ងៃទី៦ កុម្ភៈ រវាងមេដឹកនាំនៃក្រុមប៉ាឡេស្ទីនទាំង២ និងព្រះអង្គម្ចាស់រាជទាយាទកាតា ស៊ិក តាមីម ប៊ីន ហាម៉ាដ អាល់ថានី ដែលក្នុងកិច្ចប្រជុំនោះកិច្ចព្រមព្រៀងនេះនឹងត្រូវប្រកាស។
លោកអាប់បាស់ និងលោកមឺចា អាល់ បានព្រមព្រៀងគ្នាកាលពីថ្ងៃទី៥ កុម្ភៈ ពីភាពចាំបាច់នៃការរៀបចំដោយឆាប់រហ័សនូវការបោះឆ្នោតប្រធានាធិបតី សភា និងក្រុមប្រឹក្សាជាតិប៉ាឡេស្ទីន ៕
ចែករំលែកព័តមាននេះ