*កីឡាករផាភ្លីវ ឆេនកូ ខ្សែប្រយុទ្ធក្រុមជម្រើសជាតិរុស្ស៊ី ចាកចេញពីក្លឹបទៅលេងឱ្យក្លឹប Lokomotiv
កីឡាកររ៉ូម៉ាន់ ផាភ្លីវឆេនកូ ខ្សែប្រយុទ្ធបម្រុងរបស់ក្លឹប Spurs បានចាកចេញពីក្លឹបក្រោយពីចុះហត្ថលេខារយៈពេល៣ឆ្នាំកន្លះផ្លាស់ទៅក្លឹប Lokomotiv ជាស្រុកកំណើត ។ ការផ្លាស់ក្លឹបខាងលើមិនបានបង្ហើបឱ្យដឹងពីតម្លៃខ្លួនទេ ប៉ុន្តែរំពឹងថា តម្លៃខ្លួនរបស់ខ្សែប្រយុទ្ធរូបនេះមានប្រហែល៨លានផោន ។ ស្របពេលជាមួយគ្នានេះដែរ វ៉េបសាយរបស់ក្លឹប Lokomotiv បានបង្ហើបឱ្យដឹងថា «កីឡាកររ៉ូម៉ាន់ ផាភ្លីវឆេនកូ បានចុះហត្ថលេខាជាមួយក្លឹប ក្នុងកិច្ចសន្យារយៈពេល៣ឆ្នាំកន្លះ» ។ គួរបញ្ជាក់ថា ការផ្លាស់ចេញរបស់កីឡាកររូបនេះ ព្រោះស្ថានភាពលេងនៅក្នុងក្លឹប Spurs មានលក្ខណៈជាកីឡាករបម្រុង មិនបានចូលលេងញឹកញាប់ ទើបសម្រេចចិត្តផ្លាស់ទៅលេងឱ្យក្លឹបក្នុងក្របខណ្ឌបាល់ទាត់រុស្ស៊ីដែលជាស្រុកកំណើតវិញ ។
*ក្លឹប AC Milan ចុះហត្ថលេខាខ្ចីកីឡាករសាលឡេ ម៉ុនតារី ពីក្លឹប Inter Milan
ក្លឹប Inter Milan បានសម្រេចចិត្តបញ្ចេញកីឡាករសាលឡេ ម៉ុនតារី ខ្សែបម្រើក្រុមជម្រើសជាតិហ្គាណា ទៅលេងឱ្យក្លឹប AC Milan ក្នុងកិច្ចសន្យាខ្ចី រហូតដល់ចប់រដូវកាលនៅក្នុងអំឡុងពេលចុងក្រោយនៃការបិទទីផ្សារជុំទី២ ក្នុងខែមករា ។ កីឡាករអាយុ២៧ឆ្នាំរូបនេះ ដែលធ្លាប់ឆ្លងកាត់បទពិសោធន៍ជាមួយក្លឹបកំពូលដូចជាក្លឹប Portsmouth និង Sunderland ជាដើម បច្ចុប្បន្នបានចូលទៅលេងឱ្យក្លឹប AC Milan ដែលកំពុងបាត់បង់កីឡាករល្បីៗជាច្រើននាក់ដោយសាររបួស ។ កីឡាកររូបនេះបានបញ្ជាក់ថា ការមកលេងនៅក្លឹប AC Milan លើកនេះ ស្ថិតនៅក្នុងកិច្ចសន្យាខ្ចី ប៉ុន្តែមិនបានបង្ហើបឱ្យដឹងពីប្រាក់ឈ្នួលទេ ។
*ក្លឹប Mainz របស់អាល្លឺម៉ង់ទិញកីឡាករម៉ូហាម៉េដ ស៊ីដាន ខ្សែប្រយុទ្ធក្លឹប Dortmund
Mainz ដែលជាក្លឹបល្បីមួយក្នុងក្របខណ្ឌ Bundesliga អាល្លឺម៉ង់ បានទិញកីឡាករម៉ូហាម៉េដ ស៊ីដាន ខ្សែប្រយុទ្ធក្រុមជម្រើសជាតិអេហ្ស៊ីប ដោយចុះហត្ថលេខារហូតចប់រដូវកាលនេះ រួមទាំងអាចបន្តកិច្ចសន្យាបន្ថែមបានរយៈពេល២ឆ្នាំទៀត ក្រោយពីចប់កិច្ចសន្យាចាស់ ប៉ុន្តែមិនមានការបញ្ជាក់ពីតម្លៃខ្លួនអ្វីឡើយ ។ កីឡាករស៊ីដាន បង្ហាញថា ខ្លួនមានសេចក្តីសុខដែលការផ្លាស់ក្លឹបបានបញ្ចប់រួចរាល់មុនពេលបិទទីផ្សារដោះដូរជុំទី២ ។ ខ្លួនត្រូវការវិលទៅលេងនៅក្លឹប Mainz ហើយការផ្លាស់ក្លឹបនេះធ្វើឱ្យខ្លួនអាចចូលលេងបានគ្រប់គ្រាន់ និងមិនបានក្លាយជាកីឡាករបម្រុងដូចនៅក្លឹប Dortmund។
*ក្លឹប Sunderland ខ្ចីកីឡាករវ៉េន ប្រ៊ីដ ពីក្លឹប Man City រហូតបញ្ចប់រដូវកាល២០១១-២០១២
កីឡាករវ៉េនប្រ៊ីដ ខ្សែការពារបម្រុងរបស់ក្លឹប Man City បានផ្លាស់ទៅលេងឱ្យក្លឹប Sunderland ជាគូប្រជែងនៅក្នុងលីក ដោយកិច្ចសន្យាខ្ចីរហូតដល់ចប់រដូវកាល កាលពីថ្ងៃទី៣១ មករា កន្លងមក ។ លោកម៉ាទីន អូនីល អ្នកចាត់ការទូទៅក្លឹប Sunderland បានបង្ហាញនូវក្តីសង្ឃឹមថា បទពិសោធន៍ និងសមត្ថភាពរបស់គេអាចជួយក្លឹបបានច្រើនរហូតដល់ដំណាច់រដូវកាលនេះ ។ គួរបញ្ជាក់ថា អតីតខ្សែការពារក្រុមជម្រើសជាតិអង់គ្លេសអាយុ៣១ឆ្នាំរូបនេះ ទើបចូលលេងឱ្យក្លឹប Man City ក្រោមការដឹកនាំរបស់លោករ៉ូប៊ែរតូ ម៉ាន់សីុនី គ្រូបង្វឹកជនជាតិអ៊ីតាលី បានតែ១លើកក្នុងរដូវកាលនេះ ក្នុងការប្រកួត Carling Cup ដោយឈ្នះក្លឹប Birmingham ២-០ កាលពីថ្ងៃទី២១ កញ្ញា ឆ្នាំកន្លងទៅ ។
*ក្លឹប Everton ត្រៀមបង្ហាញខ្លួនកីឡាករយេឡាវិក ដែលផ្លាស់ចេញពីក្លឹប Rangers
ក្លឹប Everton អាចព្រមព្រៀងលើតម្លៃខ្លួនកីឡាករនីគីហ្គា យេឡាវិក ខ្សែប្រយុទ្ធក្រុមជម្រើសជាតិក្រូអាស៊ី របស់ក្លឹប Rangers រួចរាល់ហើយ និងនៅសល់តែកិច្ចសន្យាផ្ទាល់ជាមួយខ្សែប្រយុទ្ធខាងលើប៉ុណ្ណោះ ក្រោយពីកីឡាករយេឡាវិក បង្ហាញទម្រង់លេងនៅក្នុងលីកកំពូលរបស់ស្កុតឡែន ដោយលេចធ្លោក្នុងអំឡុងពេលពាក់កណ្តាលរដូវកាលដំបូងកន្លងមក ។ ខ្សែប្រយុទ្ធអាយុ២៦ឆ្នាំរូបនេះ បានផ្លាស់ទៅលេងឱ្យក្លឹប Rangers កាលពីឆ្នាំ២០១០ ក្នុងតម្លៃខ្លួន៤លានអឺរ៉ូ ហើយចូលលេងឱ្យក្លឹបបាន៥៥លើក និងស៊ុតបញ្ចូលទីបានចំនួន៣៦គ្រាប់ ៕
ចែករំលែកព័តមាននេះ