Julio Cesar Chavez Jrរក្សាបានខ្សែក្រវាត់ស្ថាប័ន WBCក្នុងប្រភេទទម្ងន់ middleweightរបស់ខ្លួនបន្ទាប់ពីបានយកឈ្នះកីឡាករ Marco Antonio Rubioដោយពិន្ទុជាឯកច្ឆ័ន្ទនៃការប្រកួតពេញ១២ទឹកនៅក្រុង San Antonioរដ្ឋតិចសាស់ សហរដ្ឋអាមេរិក កាលពីថ្ងៃទី៥ កុម្ភៈ។ បន្ទាប់ពីបញ្ចប់ការប្រកួតពេញ១២ទឹក កីឡាករChavez Jrរក្សាខ្សែក្រវាត់របស់ខ្លួនបានទាំងលំបាកក្នុងលទ្ធផលពិន្ទុ ១១៨-១១០,១១៦-១១២ និង១១៥-១១៣ ។
អំឡុងជិតចប់ការប្រកួតក្នុងទឹកទី១ Chavez Jrបានរងកណ្តាប់ដៃស្តាំមួយដៃពីកីឡាករRubio។ តែក្នុងទឹកទី៣ ការវាយសម្រុករបស់គេចាប់មានសន្ទុះខ្លាំង និងបានបញ្ជូនមួយដៃចំក្បាលគូប្រកួត។ នៅក្នុងទឹកនេះ កីឡាករទាំង២បានធ្វើឱ្យអ្នកទស្សនាហើបគូទពីកៅអីខណៈពួកគេបានប្តូរកណ្តាប់ដៃគ្នានៅចុងទឹក។ ទោះជាយ៉ាងណានៅចុងទឹកទី៤ Chavez Jrហាក់វង្វេងស្មារតីមួយពេលខ្លី បន្ទាប់ពីរងកណ្តាប់ដៃដ៏ធ្ងន់របស់កីឡាករ Rubio។ ចូលដល់ទឹកទី៥ Chavez Jrចាប់ស្តារមុខមាត់ឡើងវិញដោយបានវាយចូលដងខ្លួនRubioជាច្រើនដៃ។ បើទោះជាវាមិនបានធ្វើឱ្យRubioត្រូវអាជ្ញាកណ្តាលរាប់ក៏ដោយ តែវាក៏ធ្វើឱ្យគេឈឺចាប់បន្តិចដែរ ។
ជាថ្មីម្តងទៀតក្នុងទឹកទី៧ Rubioបានបញ្ជូនកណ្តាប់ដៃដ៏ធ្ងន់មួយលើកទៀតចំផ្ទៃមុខខាងស្តាំរបស់កីឡាករ Chavez Jr។ តែនៅក្នុងទឹកទី៨ Chavez Jrធ្វើបានល្អឡើងវិញដោយបញ្ជូនកណ្តាប់ដៃចំផ្ទៃមុខRubio យ៉ាងច្រើនធ្វើឱ្យគេវង្វេងវង្វាន់។ ក្នុងទឹកទី៩និងទី១០ Rubioមានសកម្មភាពតិចតួចប៉ុណ្ណោះ។ ដោយសង្កេតឃើញគូប្រកួតហាក់ដូចជាធ្លាក់ដៃ Chavez Jrបានបង្កើនការវាយសម្រុក។ បន្ទាប់ពីឱ្យទឹករួច ចាប់ផ្តើមទឹកទី១១ Rubioបង្កើនសកម្មភាពវាយលុកជាថ្មីម្តងទៀត ប៉ុន្តែការសម្រុកចូលរបស់គេមិនបានផលទេ និងជាញយដងត្រូវរងកណ្តាប់ដៃ Chavez Jr ហើយបានយកខ្សែរេញធ្វើជាបង្អែក ។ រីឯទឹកផ្តាច់ព្រ័ត្រ ការប្រកួតរវាងកីឡាករទាំង២មិនមានចំណុចគួរឱ្យចាប់អារម្មណ៍ប៉ុន្មានទេ ។
បន្ទាប់ពីទទួលបានជ័យជម្នះ Chavez Jrបានថ្លែងថា៖«ខ្ញុំមានបញ្ហាបន្តិចបន្តួចជាមួយនឹងទម្ងន់ខ្លួន។ បន្ទាប់ពីបញ្ចប់ទឹកទី៧និងទី៨ ជើងរបស់ខ្ញុំហាក់ដូចជាចុកស្រពន់។ ខ្ញុំពិតជាមិនចង់ឡើងវាយជាមួយគីឡូដូចជាកីឡាករ Rubioនេះម្តងទៀតទេ »។ បន្ទាប់ពីប្រកួតលើកនេះ Chavez Jrបង្កើតបានឯតទគ្គកម្មថ្មីដោយឈ្នះ៤៥លើកមិនដែលចាញ់ ស្មើ១លើក និងផ្តួលដៃគូឱ្យសន្លប់៣១លើក។ ឯកីឡាករ Rubioវិញ ការបរាជ័យរបស់គេឡើងដល់៦លើក ស្មើ១លើក ឈ្នះ៥៣លើកក្នុងនោះផ្តួលដៃគូឱ្យសន្លប់៤៧លើក ៕
ចែករំលែកព័តមាននេះ