រដ្ឋអាជ្ញាអាមេរិកបាននិយាយកាលពីថ្ងៃសុក្រកន្លងទៅថា ខ្លួនបានទម្លាក់ចោលការស៊ើបអង្កេតលើកីឡាករប្រណាំងកង់ឡេន អាមស្រ្តងរួមនិងបណ្តាកីឡាករប្រណាំងកង់ដទៃទៀតហើយ។ សេចក្តីថ្លែងការណ៍មួយដោយមេធាវីសហរដ្ឋអាមេរិកលោក Andre Birotte jnrបានបញ្ជាក់ថាការិយាល័យ Birotteនឹងបិទការស៊ើបអង្កេតទៅលើការចោទប្រកាន់ពីបទប្រព្រឹត្តបទឧក្រិដ្ឋរបស់សមាជិកក្រុមប្រណាំងកង់អាជីពមួយដែលអាមស្ត្រងមានចំណែកក្នុងនោះ។ សេចក្តីថ្លែងការណ៍បាននិយាយទៀតថា៖«មេធាវីសហរដ្ឋអាមេរិកបានបញ្ជាក់ថា ការប្រកាសជាសាធារណៈពាក់ព័ន្ធនឹងការស៊ើបអង្កេតត្រូវបានធានាដោយរបាយការណ៍មួយចំនួនស្តីអំពីការស៊ើបអង្កេតតាមរយៈការផ្សព្វផ្សាយជុំវិញពិភពលោក» ។
ឡេន អាមស្ត្រងដែលបានយកឈ្នះជើងឯកប្រណាំងកង់ Tour de Franceចាប់ពីឆ្នាំ១៩៩៩ដល់ឆ្នាំ២០០៥តែងតែបានបដិសេធរៀងរហូតមកថាខ្លួនមិនដែលបានប្រើប្រាស់សារធាតុហាមឃាត់អំឡុងការប្រណាំងនោះទេ។ តែទីបំផុតរូបគេនៅតែក្លាយទៅជាប្រធានបទនៃការស៊ើបអង្កេតដោយរដ្ឋអាជ្ញាសហព័ន្ធដែលព្យាយាមរកឱ្យឃើញថាតើ ក្រុម US Postalដែលអាមស្ត្រងជាអ្នកបង្កើតមានការពាក់ព័ន្ធនឹងការប្រើប្រាស់សារធាតុញៀន ឬយ៉ាងណា។ ការស៊ើបអង្កេតត្រូវបានធ្វើឱ្យផុសផុលឡើងដោយអន្លើពីសំណាក់កីឡាករអាមេរិកហ្វ្លយ លែនឌីសដែលអះអាងថា អាមស្ត្រងបង្រៀនរូបគេពីបច្ចេកទេសប្រើប្រាស់សារធាតុហាមឃាត់អំឡុងពួកគេទាំង២នៅជាមិត្តរួមក្រុមជាមួយគ្នា។
កាលពីខែមីនាឆ្នាំទៅមិញ សមាជិកសភា Congressរបស់អាមេរិកលោក Jack Kingstonបានរិះគន់ការស៊ើបអង្កេតដោយនិយាយថា គាត់មិនជឿប្រភពដែលគេប្រើលើការស៊ើបអង្កេតទាំងអស់មានប្រសិទ្ធភាពទេ។ កាលពីខែកក្កដា អាមស្ត្រងបានប្រមូលផ្តុំមនុស្សមួយក្រុមដើម្បីតវ៉ាប្រឆាំងនឹងអ្នកស៊ើបអង្កេតក៏ដូចជាកាសែត New York TimesនិងWall Streetដែលបានផ្សព្វផ្សាយព័ត៌មានខ្វះការពិត។ អាមស្រ្តងយល់ថា ការចុះផ្សាយដោយកង្វះខាតព័ត៌មានពិតនឹងធ្វើឱ្យសាធារណជនភ័ន្តច្រឡំ ជាពិសេសគឺបំផ្លាញកិត្តិយសរបស់ខ្លួន។ នៅក្នុងការបិទការស៊ើបអង្កេតលើកនេះ ការិយាល័យBirotteមិនបានប្រាប់ឱ្យដឹងពីមូលហេតុឡើយ ៕
ចែករំលែកព័តមាននេះ